Read De Bibel JHF 2. Mose 18 Bible Online

2. Mose 18 - De Bibel JHF bible

2. Mose 18

¹Un Jitro, de Priesta von Midian, Moses sien Schwiavoda, hieed aules, waut Gott aun Moses un aun Israel, sienem Volkj, jedonen, daut de Har Israel ut Ägipten rutjefieet haud.

²Un Jitro, Moses sien Schwiavoda, naum Zippora, Moses siene Fru, dee hee haud trigj jeschekjt,

³un äare twee Säns, von dän, däm eenen sien Nomen Gersom wia, dan hee säd: Een Framda sie ekj jeworden em framden Launt,

⁴un de Nomen vom aundren Elieser: Dan de Gott von mienen Voda es miene Help jewast un haft mie jerat vom Farao sien Schwieet;

⁵un Jitro, Moses sien Schwiavoda, un siene Säns un siene Fru kaumen no Moses enne Wieste, wua hee aum Boajch Gottes jeloagat wia.

⁶Un hee leet Moses sajen: Ekj, Jitro, dien Schwiavoda, sie no die jekomen, un diene Fru un äare beid Säns met ar.

⁷Doa jinkj Moses rut, sienem Schwiavoda entjäajen, un bekjt sikj un kust am; un see fruagen eena däm aundren no äarem Gootgonen un jinjen em Zelt.

⁸Un Moses vetald sienem Schwiavoda aules, waut de Har aun däm Farao un aun de Ägipta jedonen haud om Israels wellen, aul de Mieej, dee see oppem Wajch jetroffen, un daut de Har an jerat haft.

⁹Un Jethro freid sikj äwa aul daut Goode, daut de Har aun Israel jedonen, daut hee an jerat haft ut de Haunt de Ägipta.

¹⁰Un Jitro säd: Jeloft es de Har, dee junt jerat haft ut de Haunt de Ägipta un ut Farao siene Haunt, dee daut Volkj jerat haft ut de Haunt de Ägipta!

¹¹Nu weet ekj, daut de Har jrata es aus aule Jetta; dan en dee Sach, woa see en Äwamoot haundelde, wia hee äwa an.

¹²Un Jitro, Moses sien Schwiavoda, neem een Brauntopfa un Schlachtopfa fa Gott; un Aaron un aule Eltestasch von Israel kaumen, om met Moses sienem Schwiavoda ver däm Aunjesecht Gottes to äten.

¹³Un daut passieed aum aundren Dach, doa sad Moses sikj, om daut Volkj too rechten; un daut Volkj stunt bie Moses von Zemorjes bat Oppenowent.

¹⁴Un Moses sien Schwiavoda sach aules, waut hee met däm Volkj deed, un hee säd: Waut es daut, daut du met däm Volkj deist? Wuarom setst du auleen, un daut Volkj steit bie die von Zemorjes bat Oppenowent?

¹⁵Un Moses säd to sienem Schwiavoda: Wiels daut Volkj no mie kjemt, om Gott too befroagen.

¹⁶Wan see eene Sach haben, soo komen see no mie, un ekj recht tweschen däm eenen un däm aundren un doo an de Sazungen Gottes un siene Jesazen to weeten.

¹⁷Doa säd Moses sien Schwiavoda to am: De Sach es nich goot, dee du deist;

¹⁸du woascht gaunz krauftloos, soo aus du, aus uk dit Volkj, daut bie die es; dan de Sach es too schwoa fa die, du kaust dee nich auleen utrechte.

¹⁹Hea blooss opp miene Stemm, ekj well die roden, un Gott woat met die sennen: Sie du fa daut Volkj ver Gott, un brinj du de Sach ver Gott;

²⁰un erkjläa an de Sazungen un de Jesazen, un doo an däm Wajch to weeten, opp däm see waundlen, un daut Woakj, daut see doonen sellen.

²¹Oba du kjikj die em gaunzen Volkj no dichtje, gottesferchtje Mana, Mana de Woahreit, dee däm ojjerajchten Jewenst haussen, un sat dee äwa an: Bowaschte äwa 1 000, Bowaschte äwa 100, Bowaschte äwa 50 un Bowaschte äwa 10,

²²daut see daut Volkj too aule Tiet rechten; un daut passieed, daut see jiedre groote Sach ver die brinjen un daut see jiedre kjliene Sach selfst rechten; soo woat et die leichta woaren, un see woaren met die droagen.

²³Wan du dit deist un Gott die daut befält, soo woascht du bestonen kjennen, un uk dit gaunze Volkj woat en Fräd aun sienem Uat komen.

²⁴Un Moses hieed opp sienem Schwiavoda siene Stemm un deed aules, waut hee jesajcht haud.

²⁵Un Moses weld dichtje Mana ut gaunz Israel un sad an aus Heipta äwa daut Volkj: Bowaschte äwa 1 000, Bowaschte äwa 100, Bowaschte äwa 50 un Bowaschte äwa 10.

²⁶Un see rechten daut Volkj too aule Tiet: De schwoare Sachen brochten see ver Moses, un jiedre kjliene Sach rechten see selfst.

²⁷Un Moses leet sienem Schwiavoda gonen, un hee jinkj en sien Launt.