Read De Bibel JHF 2. Mose 19 Bible Online

2. Mose 19 - De Bibel JHF bible

2. Mose 19

¹Aum dredden Moonat nom Utgank de Kjinja Israel ut däm Ägiptenlaunt, aun disem seljen Dach kaumen see enne Wieste Sinai:

²See jinjen von Refidim un kaumen enne Wieste Sinai un loagaden sikj enne Wieste; un Israel loagad sikj doa selfst däm Boajch jäajenäwa.

³Un Moses stieech nopp no Gott; un de Har roopt am vom Boajch too un säd: Soo saust du too Jakob sienem Hus sajen un de Kjinja Israel vekjindjen:

⁴Jie ha jeseenen, waut ekj aun de Ägipta jedonen ha, aus ekj junt jedroacht opp Odla Flichten un junt no mie jebrocht ha.

⁵Un nu, wan jie opp miene Stemm hieren un mienen Bunt hoolen woaren, soo sell jie ut aule Velkja mien Ieejentum sennen; dan de gaunze Ieed es miene;

⁶un jie sellen mie een Kjennichrikj un eene heilje Nazion sennen. Daut sent de Wieed, dee du to de Kjinja Israel räden saust.

⁷Un Moses kaum un roopt de Eltestasch vom Volkj un läd an aul dise Wieed väa, dee de Har am befoolen haud.

⁸Doa auntwuad daut gaunze Volkj metenaunda un säd: Aules, waut de Har jerät haft, well wie doonen! Un Moses brocht de Wieed vom Volkj nom Harn trigj.

⁹Un de Har säd to Moses: Kjikj, ekj woa no die komen enne dunkle Wolkj, doamet daut Volkj hieet, wan ekj met die räd, un die uk eewichlich jleewen. Un Moses deed de Wieed vom Volkj däm Harn to weeten.

¹⁰Un de Har säd to Moses: Go nom Volkj un heilj an vondoag un morjen, un daut see äare Kjleeda wauschen;

¹¹un daut see reed sent aum dredden Dach; dan aum dredden Dach woat de Har ver de Uagen von gaunzen Volkj oppem Boajch Sinai raufkomen.

¹²Un moak eene Jrens runtom daut Volkj un saj: Heet junt, oppem Boajch too gonen un siene Kaunt auntorieren; aules, waut däm Boajch aunschieet, saul Doot jemoakt woaren -

¹³kjeene Haunt saul am aunrieren - dan daut saul jesteenicht ooda doot jeschote woaren; auf Vee ooda Mensch, daut doaf nich läwen. Wan daut Bockhuarn aunhoolent blost, sellen see nom Boajch komen.

¹⁴Un Moses kaum vom Boajch nom Volkj rauf; un hee heilicht daut Volkj, un see woschen äare Kjleeda.

¹⁵Un hee säd toom Volkj: Siet reed toom dredden Dach; un kjeena kjemt de (siene) Fru too no (dicht).

¹⁶Un daut passieed aum dredden Dach, tiedich Zemorjes, doa wia Donna un Blitz un eene schwoare Wolkj oppem Boajch un eene sea stoakja Posaunenschaul; un daut gaunze Volkj zettad, daut em Loaga wia.

¹⁷Un Moses fieed daut Volkj ut däm Loaga rut, Gott entjäajen; un see stalden sikj unjen aum Boajch han.

¹⁸Un de gaunze Boajch Sinai rieekjad, doarom, daut de Har em Fia opp am rauf kjeem; un sien Ruak stieech opp, aus de Ruak von eenem Schmeltowen, un de gaunze Boajch bäbd sea.

¹⁹Un de Posaunenschaul wort emma stoakja; Moses räd, un Gott auntwuad am met eene Stemm.

²⁰Un de Har stieech oppem Boajch Sinai rauf, oppe Spetz vom Boajch; un de Har roopt Moses oppe Spetz vom Boajch, un Moses stieech nopp.

²¹Un de Har räd too Moses: Go rauf, woarn daut Volkj, daut see nich nom Harn derchbräakjen, om to kjikjen, un väle von an faulen.

²²Un uk de Priesta, dee nom Harn noda komen, sellen sikj heiljen, daut de Har nich en an ennbrakjt.

²³Un Moses säd toom Harn: Daut Volkj woat däm Boajch Sinai nich noppgonen kjennen; dan du hast ons jewoarnt un jesajcht: Moak eene Jrens om däm Boajch un heilijt am.

²⁴Un de Har säd to am: Go, go rauf, un du saust noppkomen, du un Aaron met die; oba de Priesta un daut Volkj sellen nich derchbräakjen, om nom Harn nopp too gonen, daut hee nich en an ennbrakjt.

²⁵Doa jinkj Moses rauf nom Volkj un säd daut an.