Read De Bibel JHF 2. Mose 22 Bible Online

2. Mose 22 - De Bibel JHF bible

2. Mose 22

¹Wan de Deef biem Enbräakjen jepakt woat, un hee woat jeschloagen, daut hee stoaft, soo es daut däm Schläajna kjeene Blootschult;

²wan de Sonn äwa am oppjegonen es, soo es am daut eene Blootschult. Hee saul betolen; wan hee nuscht haft, saul hee fa sien Jestolnet vekoft woaren.

³Wan daut Jestolne läwendich en siene Haunt jefungen woat, daut es een Oss ooda een Äsel ooda een Stekj Kjlienvee, saul hee daut dobbelde ersaten.

⁴Wan wäa een Flekj ooda eenen Wiengoaden aufweiden lat un hee sien Vee hanjajcht, un daut weid opp eenem aundren sienem Flekj, soo saul hee daut vom Basten von sienem Flekj un vom Basten von sienem Wiengoaden ersaten.

⁵Wan Fia utbrakjt un eene Hachelhakj errieekjt, un daut woat een Goawenhupen vebrent, ooda daut stonende Jeträajd ooda daut Flekj, soo saul hee betolen, dee däm Braunt aunjestekjt haft.

⁶Wan wäa sienem Näakjsten Jelt ooda Jereetschoft toom oppbewoaren jeft, un daut woat ut däm Maun sienem Hus jestolen, wan de Deew jefungen woat, soo saul hee daut Dobbelde ersaten;

⁷wan de Deew nich jefungen woat, soo saul de Ieejendeema vom Hus ver de Rechta gonen, auf hee nich siene Haunt nom Näakjsten sien Hab un Goot utjestrakjt haft.

⁸Bie jiedrem Faul von Truloosichkjeit - betrafs eenen Oss, een Äsel, een Stekj Kjlienvee, een Kjleet, betrafs aulem Veloarnem, wuavon maun sajcht: «Daut es et», sull dee beid äare Sach ver de Rechta komen; wäm de Rechta schuldich spräakjen, dee saul sienem Näakjsten daut Dobbelde ersaten.

⁹Wan wäa sienem Näakjsten eenen Äsel ooda eenen Oss ooda een Stekj Kjlienvee ooda irjent een Vee toom oppbewoaren jeft, un daut stoaft ooda woat beschädicht ooda wajchjefieet, un kjeena sitt daut,

¹⁰soo saul de Eit Gottes tweschen an beid sennen, auf hee nich siene Haunt nom Näakjsten sien Hab un Goot utjestrakjt haft; un sien Ieejendeema saul daut aunnämen, un jana saul nuscht ersaten.

¹¹Un wan am daut werkjlich jestolen worden es, soo saul hee daut sienem Ieejendeema betolen.

¹²Wan daut oba veräten worden es, soo saul hee daut aus Zeichnis brinjen; hee saul daut Verätne nich ersaten.

¹³Un wan wäa von sienem Näakjsten een Stekj Vee liet, un daut woat beschädicht ooda stoaft - wia sien Ieejendeema nich doabie, soo saul hee daut jewess ersaten;

¹⁴wan sien Ieejendeema doabie wia, saul hee daut nich ersaten. Wan daut jepacht wia, soo es daut en siene Pacht enhoolen.

¹⁵Un wan wäa eene Junkfru vefieet, dee nich vesproaken es, un licht bie ar, soo saul hee ar jewess derch een Brutpries sikj to Fru nämen.

¹⁶Wan äa Voda derchut doajäajen es, ar am to jäwen, soo saul hee Jelt aufwäaje nom Brutpries de Junkfru.

¹⁷Eene Zaubarin saust du nich läwen loten.

¹⁸Jiedra, dee bie eenem Vee licht, saul dootjemoakt woaren.

¹⁹Wäa de Jetta opfat un nich däm Harn auleen, saul vebaunt woaren.

²⁰Un däm Framden saust du nich bedrenjen un am nich bedrekjen, dan Framde sent jie em Ägiptenlaunt jewast.

²¹Jie sellen kjeene Wätfru un Weis bedrekjen.

²²Wan du ar irjent woo bedrekjst, soo woa ekj, wan see to mie schricht, soo woa ekj äa Schrieen jewess erhieren;

²³un mien Oaja woat entbrenne, un ekj woa junt met daut Schwieet ombrinjen, un june Frues sellen Wätfrues un june Kjinja Weise woaren.

²⁴Wan du mienem Volkj, däm Oamen bie die, Jelt liest, soo saust du am nich aus eenen Wucha behaundlen, du saust am kjeen Zins opperlajen.

²⁵Wan du von dienem Näakjsten daut Bowakjleet aus Paunt (waut toom birjen) nemst, soo saust du am däm seljen trigjjäwen, ea de Sonn unjajeit;

²⁶dan daut es siene eensje Dakj, sien Kjleet fa siene Hut; woa bennen saul hee ligjen? Un daut woat passieren, wan hee no mie schricht, soo woa ekj am erhieren, dan ekj sie jnädich.

²⁷De Rechta saust du nich lastren, un eenem Ferscht von dienem Volkj saust du nich fluchen.

²⁸Met de Rikjlichkjeit von dienem Jeträajd un dien Bastet saust du nich trigjhoolen. Däm ieeschtjebuarnen diene Säns saust du mie jäwen.

²⁹Krakjt soo saust du met dienem Oss doonen un met dienem Kjlienvee; säwen Doag saul daut bie siene Mutta sennen, aum achten Dach saust du daut mie jäwen.

³⁰Un heilje Mana sell jie mie sennen, un Fleesch, daut oppem Flekj veräten jeworden es, sell jie nich äten; daut sell jie vere Hunj schmieten.