Read De Bibel JHF 2. Mose 23 Bible Online

2. Mose 23 - De Bibel JHF bible

2. Mose 23

¹Du saust kjeen faulschet Jeräd wieda droagen; du saust diene Haunt nich däm Gottloosen rieekjen, om een onjerajchta Zeij to sennen.

²Du saust de Menj nich nogonen om Iebel to doonen; un du saust bie eenem Rajchtstriet nich auntwuaden, endäm du die no dee Väle rejchst, om daut Rajcht too bieejen.

³Un du saust däm Oamen en sienem Rajchtstriet nich vescheenren.

⁴Wan du däm Oss ooda Äsel von dienem Fiend omhäa erren auntrafst, saust du an däm seljen trigjbrinjen.

⁵Wan du däm Äsel von dienem Haussa unja Laust ligjen sitst, soo heed die, am doa ligjen to loten; du saust am aulemol opphalpen.

⁶Du saust daut Rajcht von dienem Oamen en sienem Rajchtstriet nich bieejen.

⁷Vom auffaulens Wuat saust du die aufhoolen; un däm Onschuldjen un Jerajchten saust du nich ombrinjen, dan ekj woa däm Gottloosen nich rajchtfoadjen.

⁸Un du saust kjeen Jeschenkj nämen; dan daut Jeschenkj moakt dee Seenende blint un vedreit däm Jerajchten siene Wieed.

⁹Un däm Framden saust du nich bedrekjen; jo, jie selfst weeten, woo daut däm Framden too Moot es, dan jie sent em Ägiptenlaunt Framde jewast.

¹⁰Un sas Joa saust du dien Launt beseien un siene Arnt ensaumlen;

¹¹oba aum säwenden saust du daut ruen loten, daut de Oame ut dienem Volkj doavon äten; un waut dee äwaloten, sellen de Tieren von Flekj fräten. Krakjt soo saust du met dienem Wienboajch doonen un met dienem Eeljboom.

¹²Sas Doag saust du diene Oabeit doonen; oba aum säwenden Dach saust du ruen, doamet dien Oss un dien Äsel ruen un de Sän von diene Deenstmejal un de Framda sikj erholen.

¹³Un opp aules, waut ekj junt jesajcht ha, sell jie acht haben; un de Nomes von aundre Jetta sell jie nich erwänen, hee saul en dienem Mul nich jehieet woaren.

¹⁴Dree Mol em Joa saust du mie een Fast fieren.

¹⁵Daut Fast de onjesuade Brood saust du beachten: säwen Doag saust du Onjesuadet äten, soo aus ekj die befoolen ha, to bestemde Tiet em Moonat Abib, dan aun däm seljen best du ut Ägipten rutjegonen; un maun saul nich ladich ver mienem Aunjesecht komen;

¹⁶un daut Arntefast, daut ieeschte von diene Oabeit, von däm, waut du oppem Flekj seien woascht; un daut Fast de Ensaumlunk [Arntedankfast] aum Joaresenj, wan du diene Oabeit vom Flekj enjesaumelt hast.

¹⁷Dree Mol em Joa sellen aul diene Menliche ver däm Aunjesecht von Harn, Gottes erschienen loten.

¹⁸Du saust nich daut Bloot von mienem Schlachtopfa toom Jesuaden opfren; un daut Fat von mienem Fast saul nich äwanacht bat Zemorjes bliewen.

¹⁹Daut ieeschte von dienem Launt saust du en daut Hus det Harn, von dienem Gott, brinjen. - Du saust een Bockje nich koaken enne Malkj von siene Mutta.

²⁰Kjikj, ekj schekj eenen Enjel ver die häa, om die oppem Wajch too bewoaren un die aun däm Uat to brinjen, däm ekj reedjemoakt ha.

²¹Heed die fa am un hia opp siene Stemm un sie nich wadaspanstich jäajen am; dan hee woat june Äwaträdunk nich vezeien, dan mien Nomen es en am.

²²Doch wan du opp siene Stemm hieescht un aules deist, waut ekj sajen woa, soo woa ekj diene Fiend befiende un diene Bedrenja bedrenjen.

²³Dan mien Enjel woat ver die häagonen un woat die no de Amorita un de Hetita un de Perisita un de Kanaanita, de Hewita un de Jebusita brinjen; un ekj woa an vetiljen.

²⁴Du saust die ver äare Jetta nich dol bekjen un an nich deenen, un du saust nich no äare Doten doonen; sonda du saust an gaunz un goa dolrieten un äare Biltstendasch gaunz dolbräakjen.

²⁵Un jie sellen däm Harn, junem Gott, deenen: Soo woat hee dien Broot un dien Wota säajnen, un ekj well aule Krankheit ut äare Medd wajchdoonen.

²⁶Kjeen too Schod komen un Onfruchtboare woat en dienem Launt sennen; de Zol von diene Doag woa ekj voll moaken.

²⁷Mien Schrakj woa ekj ver die häaschekjen un aule Velkja vewerren, no dän du kjemst, un aul diene Fiend dreien die däm Rigjen han.

²⁸Un ekj woa de Hornisse ver die häaschekjen, daut see ver die de Hewita, de Kanaanita un de Hetita vejoagen.

²⁹Nich en eenem Joa woa ekj an ver die vejoagen, doamet daut Launt nich eene Wieste woat, un de Tieren oppem Flekj sikj jäajen die vemieren.

³⁰Eenem nom aundren woa ekj an vetiljen, bat du fruchtboa best un daut Launt besetten kaust.

³¹Un ekj woa diene Jrensen saten vom Schelpmäa bat aun daut Mäa de Filista, un vonne Wieste bat aun däm Stroom [Efrat]; dan ekj woa de Laundesbewona en diene Haunt jäwen, daut du an ver die vedrifst.

³²Du saust met an un met äare Jetta kjeenen Bunt moaken.

³³See sellen nich en dienem Launt wonen, doamet see die nich jäajen mie too ne Sind veleiden; dan, wan du äare Jetta deenen woascht, dan woat die daut toom Faul brinjen.