Read De Bibel JHF 2. Mose 25 Bible Online

2. Mose 25 - De Bibel JHF bible

2. Mose 25

¹Un de Har räd to Moses un säd:

²Räd to de Kjinja Israel, daut see mie een Häwopfa brinjen; von eenem jiedren, dee wellich en sienem Hoaten es, sell jie mien Häwopfa nämen.

³Un dit es daut Häwopfa, daut jie von an nämen sellen: Golt un Selwa un Koppa,

⁴un blaua un rooda Purpur un Karmesin un witte Boomwoll un Kosenhoa,

⁵un root jeforwne Bockfal un Dacksfal un Akozjeholt;

⁶Eelj toom Licht, Jewerzen toom saulwen un toom goot rikjendem Rieekjastoff (Weiruak, seeta Ruak);

⁷Onukssteena un Steena toom ensaten fa daut Efod un fa daut Brostschilt.

⁸Un see sellen mie een Heilichtum moaken, daut ekj en äare Medd won.

⁹No aulem, waut ekj die wies, daut Mosta de Wonunk un daut Mosta von aul äa Jereetschoft, aulsoo sell jie daut moaken.

¹⁰Un see sellen eene Lod von Akozjeholt moaken: twee un eene haulwe Elle äare Lenj, un eene un eene haulwe Elle äare Breed, un eene un eene haulwe Elle äare Hecht.

¹¹Un du saust ar äwatrakjen met reinem Golt: Von bennen un von buten saust du ar äwatrakjen; un moak doaraun eene goldne Leest runtom.

¹²Un jeet doatoo 4 Rinj von Golt un sat dee aun äare vea Akjen, un zwoa twee Rinj aun eene Sied un twee Rinj aune aundre Sied.

¹³Un moak Stangen von Akozjeholt un äwatrakj dee met Golt.

¹⁴Un brinj de Stangen enne Rinj aune Sieden de Lod, om de Lod met dee too droagen.

¹⁵De Stangen sellen enne Rinj de Lod sennen, see sellen nich doa rutjenomen woaren.

¹⁶Un laj enne Lod daut Zeichnis, daut ekj die jäwen woa.

¹⁷Un moak een Dakjsel [Veseenungsdakjsel] von reinem Golt: twee un eene haulwe Elle siene Lenj, un eene un enne haulwe Elle siene Breed.

¹⁸Un moak twee Cherubim von Golt; en Hauntoabeit saust du an moaken aun beid Enj vom Dakjsel;

¹⁹un moak eenen Cherub aun däm Enj de eene Sied un eenen Cherub aun däm Enj de aundre Sied; ut eenem Stekj vom Dakjsel sell jie de Cherubim moaken aun siene beid Enja.

²⁰Un de Cherubim sellen de Flichten no bowen utbreeden, daut Dakjsel met äare Flichten toodakjen, un äare Aunjesechta eenaunda jäajenäwa; de Aunjesechta de Cherubim sellen opp daut Dakjsel jerecht sennen.

²¹Un laj daut Dakjsel bowen äwa de Lod; un en de Lod saust du daut Zeichnis lajen, daut ekj die jäwen woa.

²²Un doa selfst woa ekj met die toopkomen un von däm Dakjsel rauf, tweschen de twee Cherubim väa, dee oppe Zeichnislod sent, aules die too sajen, waut ekj die aun de Kjinja Israel befälen woa.

²³Un du saust eenen Desch von Akozjeholt moaken: twee Ellen siene Lenj, un eene Elle siene Breed, un eene un eene haulwe Elle siene Hecht.

²⁴Un äwatrakj am met reinem Golt un moak runtom am eenen Kraunz von Golt.

²⁵Un moak eene Leest, eene Hauntbreet, runtom, un moak eenen Kraunz ut Golt runtom aun siene Leest.

²⁶Un moak aun am 4 Rinj von Golt un sat de Rinj aun de vea Akjen, dee aun siene vea Feet sent.

²⁷Dicht unja de Leest sellen de Rinj sennen, fa de Stangen, om däm Desch too droagen.

²⁸Un moak de Stangen von Akozjeholt un äwatrakj dee met Golt, un de Desch saul doamet jedroacht woaren.

²⁹Un moak siene Kommen un siene Schiewen un siene Kaunen un siene Kuffels, met dee daut Drinkjopfa utjegoten woat; von reinem Golt saust du an moaken.

³⁰Un oppem Desch saust du emma Aunsechtsbroot lajen ver mienem Aunjesecht.

³¹Un du saust een Laumpenhoola von reinem Golt moaken; en Hauntoabeit saul daut Laumpenhoola jemoakt woaren, sien Foot un sien Jestal; siene Kjelche* (Kuffels*), siene Knoppes un siene Bloomen sellen ut eenem Stekj met am sennen.

³²Un 6 Oarms sellen von siene Sied utgonen: 3 Oarms vom Laumpenhoola aun siene eene Sied un 3 Oarms vom Laumpenhoola aun siene aundre Sied.

³³Un 3 Kjelche* (Kuffels*), aus Mandelbloomen, aun däm eenen Oarm: Knoppes un Bloomen; un 3 Kjelche*, aus Mandelbloomen, aun däm aundren Oarm: Knoppes un Bloomen; soo fa dee 6 Oarms, dee vom Laumpenhoola utgonen.

³⁴Un aun däm Laumpenhoola 4 Kjelche*, aus Mandelbloomen: Siene Knoppes un siene Bloomen;

³⁵un zwoa een Knoppen unja 2 Oarms, ut am, un wada een Knoppen unja 2 Oarms, ut am, un wada een Knoppen unja 2 Oarms, ut am, fa de 6 Oarms, dee vom Laumpenhoola utgonen.

³⁶Äare Knoppes un äare Oarms sellen ut eenem Stekj met am sennen; daut gaunze Laumpenhoola eene Hauntoabeit, von reinem Golt.

³⁷Un du saust siene 7 Laumpen moaken; un maun saul siene Laumpen aunstekjen, soo daut see jlikj ver am dachen;

³⁸un siene Dochtschearen un siene Laschheed von reinem Golt.

³⁹Ut eenem Talent reinem Golt saul maun am moaken met aul disem Jereetschoft.

⁴⁰Un kjikj, daut du an no äarem Mosta moakst, daut die oppem Boajch jewäsen worden es.