Read De Bibel JHF 2. Mose 27 Bible Online

2. Mose 27 - De Bibel JHF bible

2. Mose 27

¹Un du saust däm Aultoa von Akozjeholt moaken: fief Ellen de Lenj, un fief Ellen de Breed - vea Akjich saul de Aultoa sennen - un dree Ellen huach.

²Un moak siene Hieena aun siene vea Akjen; ut eenem Stekj sellen siene Hieena sennen; un äwatrakj am met Koppa.

³Un moak siene Tap, om am vonne Fat-Ausch too reinjen, un siene Scheflen un siene Sprenjschiewe un siene Gauflen un siene Kolpaunen; fa (un) aul sien Jereetschoft saust du von Koppa moaken.

⁴Un moak am een Fiarost aus een Nat von Koppa, un moak aun daut Nat vea koppane Rinj aun siene vea Akjen;

⁵un sat daut unja de Spunj Rinj vom Aultoa, von unjen, daut et Nat bat to Halft vom Aultoa rieekjt.

⁶Un moak Stangen fa däm Aultoa, Stangen von Akozjeholt, un äwatrakj dee met Koppa.

⁷Un siene Stangen sellen en de Rinj jestoaken woaren, daut de Stangen aun beid Sieden vom Aultoa sent, wan maun am drajcht.

⁸Holl, von Bräda saust du am moaken; soo aus die daut oppem Boajch jewäsen wort, soo saul maun am moaken.

⁹Un du saust de Wonunk eenen Väahoff moaken: Aun de Meddachsied, siedlich, Väahenjen fa däm Väahoff von fien jewäwden witte Boomwoll, 100 Ellen de Lenj aun de eene Sied;

¹⁰un siene 20 Stendasch un äare 20 Feet von Koppa, de Stendahoakes un äare dedwäa Stangen von Selwa.

¹¹Un krakjt soo aune Nuadsied en de Lenj: Väahenjen, 100 Ellen lank; un siene 20 Stendasch un äare 20 Feet von Koppa, de Stendahoakes un äare dedwäa Stangen von Selwa.

¹²Un de Breed vom Väahoff aune Wastsied: 50 Ellen Väahenjen, äare 10 Stendasch un äare 10 Feet.

¹³Un de Breed von Väahoff aune Oostsied, jäajen Sonnenoppgank, 50 Ellen:

¹⁴15 Ellen Väahenjen opp eene Sied, äare dree Stendasch un äare dree Feet;

¹⁵un aun de aundre Sied 15 Ellen Väahenjen, äare dree Stendasch un äare dree Feet;

¹⁶un fa daut Dooa von Väahoff eenen Väahank von 20 Ellen von blauen un rooden Purpur un Karmesin un fien jewäwden witte Boomwoll, en bunt jewäwden Oabeit, äare vea Stendasch un äare vea Feet.

¹⁷Aule Stendasch vom Väahoff runtom sellen met dedwäa Stangen von Selwa un äare Hoakes von Selwa un äare Feet von Koppa sennen.

¹⁸De Lenj vom Väahoff 100 Ellen, un de Breed 50 jäajen 50, un de Hecht fief Ellen, von fien jewäwden witte Boomwoll; un äare Feet von Koppa.

¹⁹Aulet Jereetschoft de Wonunk too aulem Deenst un aul äare Näajel vom Väahoff sellen von Koppa sennen.

²⁰Un du, du saust de Kjinja Israel befälen, daut see die reinet, jestaumptet Eeljboom Eelj brinjen toom Laumpenlicht, om de Laumpen bestendich auntostekjen.

²¹Em Zelt de Bejäajnunk, butrem Väahoff, dee ver däm Zeichnis es, sellen Aaron un siene Säns an reedmoaken vom Owent bat Zemorjes, ver däm Harn. Eene eewje Sazunk bie äare Jeschlajchta vonne Kjinja Israel.