Read De Bibel JHF 2. Mose 28 Bible Online

2. Mose 28 - De Bibel JHF bible

2. Mose 28

¹Un du, du saust dienen Brooda un siene Säns met am noda komen loten, ut de Medd de Kjinja Israel, om mie däm Priestadeenst uttoeewen: Aaron, Nadab un Abihu, Eleasar un Ithamar, Aaron siene Säns.

²Un du saust heilje Kjleeda fa dienem Brooda Aaron moaken too Harlichkjeit (Iea) un toom Schmuck.

³Un du saust too aulen räden, dee weisen Hoates sent, dee ekj met däm Jeist de Weisheit erfelt ha, daut see fa Aaron Kjleeda moaken, am to heilje, om mie däm Priestadeenst uttoeewen.

⁴Un dit sent de Kjleeda, dee see moaken sellen: Een Brostschilt un Efod un een Bowakjleet, un een Liefrock met flajcht Mosta jewäft, eenen Koppbaunt un een Jirtel; un see sellen heilje Kjleeda moaken fa dienen Brooda Aaron un fa siene Säns, daut see mie aus Priesta deenen.

⁵Un see sellen daut Golt un däm blauen un däm rooden Purpur un däm Karmesin un de witte Boomwoll nämen,

⁶un sellen daut Efod moaken von Golt, blauen un rooden Purpur, Karmesin en fien jewäwden witte Boomwoll, un konst jewäwden Oabeit.

⁷Daut saul 2 toop vebungne Schullastekja haben aun siene beid Enja, un soo woaren see vebungen.

⁸Un de jewäwda Jirtel, doamet daut aunjebungen woat, dee doaräwa es, saul von dee selje Oabeit met am sennen, von däm seljen Zeich, von Golt, blauen un rooden Purpur un Karmesin un fien jewäwden witte Boomwoll.

⁹Un du saust twee Onukssteena nämen un de Nomes de Säns Israels doabowen enngraviere:

¹⁰Äare sas Nomes opp däm eenen Steen un de 6 aundre Nomes opp däm aundren Steen, no äare Jeburtsräj.

¹¹En steenschnied Oabeit saul daut sennen, von Säajel graviera; de Nomes de Säns Israel saust du opp beid Steena graviere un dee met Golt enfoten loten.

¹²Un sat de beid Steena oppe Schullastekja vom Efod, aus Steen toom Jedajchnis fa de Kjinja Israel; un Aaron saul äare Nomes opp siene beid Schulren ver däm Harn toom Jedajchnis droagen.

¹³Un moak Spunj von Golt;

¹⁴un twee Kjäden von reinem Golt: Aus een Schnua saust du an moaken, jeflochte, un de jeflochtne Kjäden aun de Spunj faustmoaken.

¹⁵Un moak daut Jerechtsbrostschilt en konst jewäwden Oabeit; soo aus de Efod Oabeit saust du dee moaken: Von Golt, blauen un rooden Purpur un Karmesin un fien jewäwden witte Boomwoll saust du daut moaken.

¹⁶Veakauntich saul daut sennen, dobbelt, eene Spaun siene Lenj un eene Spaun siene Breed.

¹⁷Un besat daut met ennjesade Steena, vea Räje von Steena; eene Rieej: Sardis, Topas un Smaracht, de ieeschte Rieej;

¹⁸un de tweede Rieej: Karfunkel, Safier un Diamaunt;

¹⁹un de dredde Rieej: Opal, Achat un Amethust;

²⁰un de vieede Rieej: Chriesolit un Onniks un Jaspies; met Golt sellen see enjefot sennen en äare Spunj.

²¹Un de Steena sellen no de Nomes de Säns Israels 12 sennen, no äare Nomes; en Säajel graviea Oabeit sellen see sennen, een jiedra no sienem Nomen, fa de 12 Stam.

²²Un moak aun däm Brostschilt aus Schnua jeflochtne Kjäden, von reinem Golt.

²³Un moak aun däm Brostschilt twee Rinj von Golt, un moak de twee Rinj aun de beid Enja vom Brostschilt faust.

²⁴Un moak de twee jeflochtne Schnua von Golt aun de beid Rinj aun de Enja vom Brostschilt faust;

²⁵un de beid aundre Enja de twee jeflochtne Schnua saust du aun de beid Spunj faustmoaken un dee aun de Schullastekja vom Efod faustmoaken, aun siene väaschte Sied.

²⁶Un moak twee Rinj von Golt un moak dee aun de beid Enja vom Brostschilt faust, aun siene Soom, dee von bennen em Efod es.

²⁷Un moak twee Rinj von Golt un moak dee aun de beid Schullastekj vom Efod faust, unjen aun siene väaschte Sied, krakjt doa wua hee toop kjemt, äwa däm Jirtel vom Efod.

²⁸Un maun saul daut Brostschilt met siene Rinj aun de Rinj vom Efod binjen met eene Schnua von blauen Purpur, daut es, äwa däm Jirtel von Efod un daut Brostschilt sikj nich von däm Efod veschuwe saul.

²⁹Un Aaron saul de Nomes de Säns Israel aun däm Jerechtsbrostschilt opp sienem Hoat droagen, wan hee en daut Heilichtum nennjeit, bestendich toom Jedajchnis ver Gott.

³⁰Un laj en däm Jerechtsbrostschilt de Urim un de Thummim [Lichta un Vollkomenheit], daut see opp Aaron sienem Hoaten sent, wan hee ver Gott nennjeit; un Aaron saul bestendich daut Jerecht de Kjinja Israel opp sienem Hoaten ver Gott droagen.

³¹Un moak daut Bowakjleet vom Efod gaunz von blauen Purpur.

³²Un bowen enne Medd saul een Loch sennen; un een Soom saul runtom däm Kopploch sennen, en Wäwoabeit; aus een Loch en eenem Brostschilt saul doa sennen, daut et nich ennrit.

³³Un aun sienem Soom moak Grenautapel von blauen un rooden Purpur un Karmesin, aun sienem Soom runtom, un Kjlinja von Golt tweschen an runtom:

³⁴Een Kjlinja von Golt un een Granataupel, een Kjlinja von Golt un een Granataupel aun däm Soom runtom aum Bowakjleet.

³⁵Un Aaron saul daut aunhabe, om dän Deenst too verechten, daut sien Klank jehieet woat, wan hee en daut Heilichtum ver Gott nennjeit, un wan hee rutjeit, daut hee nich stoaft.

³⁶Un moak een Stearnblajch von reinem Golt un graviea doabowen met Säajelschreft: Heilichkjeit däm Harn!

³⁷Un doo daut aun eene Schnua von blauen Purpur; un daut saul aun däm Koppbinj sennen, aune väaschte Sied von de Koppbinj saul daut sennen.

³⁸Un daut saul aun Aaron sienem Stiern sennen, un Aaron saul de Onjerajchtichkjeiten de heilje Dinj droagen, dee de Kjinja Israel heilje woaren, bie aule Gowen äare heilje Dinj; un daut saul bestendich aun sienem Stiern sennen, toom Wooljefaulen fa an - ver Gott.

³⁹Un moak däm Liefrock von fien jewäwden witte Boomwoll, un moak eene Koppbinj von witte Boomwoll; un eenen Jirtel saust du moaken bunt jewäwden Oabeit.

⁴⁰Un Aaron siene Säns saust du Liefrakj moaken un saust an Jirtel moaken, un huage Metze saust du an moaken too Harlichkjeit (Iea) un toom Schmuck.

⁴¹Un du saust dienen Brooda Aaron doamet bekjleede un siene Säns met am; un du saust an saulwen un äare Henj fellen un an heilje, daut see mie däm Priestadeenst uteewen.

⁴²Un moak an Beenkjleeda von Boomwoll, om daut noaktje Fleesch too bedakjen; vonne Hoften bat aune Schinkjes sellen see rieekjen.

⁴³Un Aaron un siene Säns sellen dee droagen, wan see en daut Zelt de Bejäajnunk nengonen, ooda wan see nom Aultoa komen, om däm Deenst em Heilichtum too verechten, daut see kjeene Schult opp sikj loden un stoawen: Eene eewje Sazunk fa an un fa sienen Somen no am.