Read De Bibel JHF 2. Mose 29 Bible Online

2. Mose 29 - De Bibel JHF bible

2. Mose 29

¹Un dit es daut, waut du an doonen saust, an too heilje, om mie däm Priestadeenst uttoeewen: Nemm eenen jungen Boll un twee Bakj, onen Fäla,

²un onjesuadet Broot, un onjesuade Kuaken, vemischt met Eelj, un onjesuade Flade [denne, jereeschte Kuaken], jesaulft met Eelj: Von fienem Weitemäl saust du an moaken.

³Un laj an en eenen Korf un brinj dee em Korf doa, un däm jungen Boll un de twee Bakj.

⁴Un Aaron un siene Säns saust du nodakomen loten aun däm Engank vom Zelt de Bejäajnunk un an met Wota wauschen.

⁵Un du saust de Kjleeda nämen un Aaron aunkjleede met däm Liefrock un met däm Bowakjleet vom Efod un däm Efod un daut Brostschilt un daut am ombinjen met däm bunten Jirtel vom Efod.

⁶Un sat de Koppbinj opp sien Haupt un laj daut heilje Kroon aun de Koppbinj.

⁷Un nemm daut Saulweelj un jeet daut opp sien Haupt un saulw am.

⁸Un siene Säns saust du nodakomen loten un an met däm Liefrock bekjleede;

⁹un ombinj an met däm Jirtel, Aaron un siene Säns, un binj an de huage Metze om; un daut Priestatum es an to eene eewje Sazunk. Un du saust Aaron un siene Säns heilje.

¹⁰Un du saust däm jungen Boll ver daut Zelt de Bejäajnunk brinjen, un Aaron un siene Säns sellen äare Henj opp däm Boll sienen Kopp lajen.

¹¹Un schlacht däm jungen Boll ver däm Harn, aun däm Engank vom Zelt de Bejäajnunk;

¹²un nemm von däm Boll sien Bloot un doo daut met dienem Finja aun de Hieena vom Aultoa, un aulet Bloot saust du aun däm Foot vom Aultoa jeeten.

¹³Un nemm aulet Fat, daut Ennaliche bedakjt, un daut Nat äwa de Läwa un de beid Nieren un daut Fat, daut aun an es, un rieekja daut opp däm Aultoa.

¹⁴Un daut Fleesch vom Boll un siene Hut un sien Mest saust du met Fia butrem Loaga vebrennen: Daut es een Sindopfa.

¹⁵Un du saust däm eenen Bock nämen, un Aaron un siene Säns sellen äare Henj opp däm Bock sienen Kopp lajen.

¹⁶Un du saust däm Bock schlachten un sien Bloot nämen un runtom aun däm Aultoa spretzen.

¹⁷Un däm Bock saust du en Stekja schnieden un sien Ennaliche un siene Schinkjes wauschen un dee to siene Stekja un to sienem Kopp lajen.

¹⁸Un däm gaunzen Bock saust du opp däm Aultoa rieekjren: Daut es een Brauntopfa däm Harn, een leeftolja Jeroch; daut es een Fiaopfa däm Harn.

¹⁹Un du saust däm tweeden Bock nämen, un Aaron un siene Säns sellen äare Henj opp däm Bock sienen Kopp lajen.

²⁰Un du saust däm Bock schlachten un von sienem Bloot nämen un daut opp Aaron sienem rajchten Uabommel doonen un opp siene Säns äare rajchte Uabommels un opp däm Dume äare rajchte Haunt un opp de groote Tee von äarem rajchten Foot; un du saust daut Bloot runtom aun däm Aultoa spretzen.

²¹Un nemm von däm Bloot, daut opp däm Aultoa es, un von däm Saulweelj, un sprets daut opp Aaron un opp siene Kjleeda un opp siene Säns un oppe Säns äare Kjleeda met am; un hee woat heilich sennen un siene Kjleeda, un siene Säns un de Kjleeda siene Säns met am.

²²Un nemm von däm Bock daut Fat un däm Fatschwauns un daut Fat, daut et Ennaliche bedakjt, un daut Nat de Läwa un de beid Nieren un daut Fat, daut aun an es, un däm rajchten Schinkje, dan daut es een Bock de Enweiunk,

²³un een Bulkje Broot un eene Eeljkuak un eenen Flade ut däm Korf de Onjesuade Brood, dee ver däm Harn es;

²⁴un laj daut aules opp Aaron siene Henj un oppe Henj siene Säns, un schlenkja daut aus een Wäwopfa [een Opfa, daut han un häa jeschwunge woat] ver Gott.

²⁵Un nemm daut von äare Henj un rieekja daut opp däm Aultoa, opp däm Brauntopfa, toom leeftoljen Jeroch ver Gott; daut es een Fiaopfa däm Harn.

²⁶Un nemm de Brost von däm Bock de Enweiunk, dee ver Aaron es, un schlenkja daut aus een Häwopfa ver Gott; un daut saul dien Deel sennen.

²⁷Un heilj de Brost vom Wäwopfa un de Schinkjes von Häwopfa [een Opfa, daut nom Himmel jehowen un soo Gott jeweit woat; äwahaupt uk eene Gow], dee jeschwunge un dee jehowen worden es von däm Bock sienem Ennalichen, von däm, daut fa Aaron, un von däm, daut fa siene Säns es;

²⁸un daut saul Aaron un siene Säns jehieren aus eene eewje Bestemmung vonne Kjinja Israel, dan daut es een Häwopfa; un daut saul een Häwopfa sennen vonne Kjinja Israel, von äare Dankopfa [Frädensopfa]: Aus äa Häwopfa däm Harn.

²⁹Un Aaron siene heilje Kjleeda sellen fa siene Säns no am sennen, om an doabennen too saulwen un an doabennen too heilje.

³⁰Wäa von siene Säns aun siene Städ Priesta woat, daut hee em Zelt de Bejäajnunk nenn gonen woat, om em Heilichtum to deenen, dee saul de säwen Doag lank droagen.

³¹Un däm Bock de Enweiunk saust du nämen un sien Fleesch aum heiljen Uat koaken.

³²Un Aaron un siene Säns sellen daut Bockfleesch un daut Broot, daut em Korf es, aun däm Engank vom Zelt de Bejäajnunk äten:

³³See sellen daut äten, derch dee Veseenunk jeworden es, om an too weien, om an too heilje; oba een Framda saul nich doavon äten, dan daut es heilich.

³⁴Un wan von däm Fleesch de Enweiunk un von däm Broot waut äwablift bat Zemorjes, soo saust du daut Äwajebläwne met Fia vebrennen; daut saul nich jejäten woaren, dan daut es heilj.

³⁵Un du saust Aaron un siene Säns soo doonen, no aul däm, waut ekj die befoolen ha; säwen Doag saust du an enweie.

³⁶Un eenen jungen Boll aus Sindopfa saust du jieda Dach too Veseenunk opfren un däm Aultoa entsindje, endäm du Veseenunk fa am deist; un du saust am saulwen, om am to heilje.

³⁷Säwen Doag saust du fa däm Aultoa Veseenunk doonen un am heilje; un de Aultoa saul huachheilich sennen: Aules, waut däm Aultoa aunschieet, woat heilj sennen.

³⁸Un dit es daut, waut du oppem Aultoa opfren saust: twee eenjoasche Lama, jieda Dach, bestendich.

³⁹Daut eene Laum saust du Zemorjes opfren, un daut tweede Laum saust du enne Owendstunde opfren,

⁴⁰un een 10-de Deel Fienmäl, jemischt met een vieedel Hin jestaumten Eelj, un een Drinkjopfa, een vieedel Hin Wien, to däm eenen Laum.

⁴¹Un daut tweede Laum saust du tweschen de twee Owents opfren; aus daut Speisopfa un de Drinkjopfa Zemorjes, soo saust du dise opfren, toom leeftoljen Jeroch, een Fiaopfa däm Harn:

⁴²Daut saul een bestendjet Brauntopfa bie june Jeschlajchta aun däm Engank vom Zelt de Bejäajnunk ver däm Harn sennen, woa ekj met junt toopkomen woa, om doamet die to räden.

⁴³Un ekj woa doa selfst met de Kjinja Israel toopkomen, un daut [Zelt] woat jeheilicht woaren derch miene Harlichkjeit.

⁴⁴Un ekj woa daut Zelt de Bejäajnunk un däm Aultoa heilje; un Aaron un siene Säns woa ekj heilje, daut see mie däm Priestadeenst uteewen.

⁴⁵Un ekj woa enne Medd de Kjinja Israel wonen un woa äa Gott sennen.

⁴⁶Un see woaren weeten, daut ekj de Har sie, äa Gott, dee ekj an ut däm Ägiptenlaunt rutjefieet ha, om en äare Medd too wonen; ekj sie de Har, äa Gott.