Read De Bibel JHF 2. Mose 30 Bible Online

2. Mose 30 - De Bibel JHF bible

2. Mose 30

¹Un du saust eenen Rieekja Aultoa moaken toom rieekjren, von Akozjeholt saust du am moaken;

²eene Elle siene Lenj, un eene Elle siene Breed, veakauntich saul hee sennen un twee Ellen huach; ut eenem Stekj met am sellen siene Hieena sennen.

³Un äwatrakj am met reinem Golt, sien Dakjsel un siene Wenj runtom un siene Hieena; un moak am eene Leest runtom von Golt.

⁴Un moak twee goldne Rinj unja siene Leest: Aun siene beid Sieden saust du dee moaken, aun siene beid Wenj; un dee sellen fa de Stangen sennen, om am doamet too droagen.

⁵Un moak de Stangen von Akozjeholt un äwatrakj dee met Golt.

⁶Un du saust am ver dän Väahank stalen, dee ver de Zeichnislod es, däm Dakjsel jäajenäwa, daut äwa däm Zeichnis es, woa ekj met die toopkomen woa.

⁷Un Aaron saul gootrikjendet Rieekjastoff (Weiruak, seeta Ruak) opp am rieekjren; jieda Morjen, wan hee de Laumpen reedmoakt, saul hee daut rieekjren;

⁸un wan Aaron de Laumpen aunstekjt tweschen de Owendstunde, saul hee daut rieekjren: Een bestendjet Rieekjastoff (Weiruak, seeta Ruak) ver Gott bie june Jeschlajchta.

⁹Jie sellen kjeen framdet Rieekjastoff (Weiruak, seeta Ruak) opp am opfren, noch Brauntopfa, noch Speisopfa; un kjeen Drinkjopfa sell jie opp am jeeten.

¹⁰Un Aaron saul eenmol em Joa fa dee Hieena Veseenunk doonen met däm Bloot vom Sindopfa de Veseenunk; eenmol em Joa saul hee Veseenunk fa am doonen bie june Jeschlajchta: Huachheilich es hee däm Harn.

¹¹Un de Har räd too Moses un säd:

¹²Wan du de Zol de Kjinja Israel oppnämen woascht no äarem Tooproopen, soo saust du an bie äarem Tooproopen een jiedra een Leesjelt fa siene Seel däm Harn jäwen, daut kjeene Ploag unja an bie däm Tooproop entsteit.

¹³Dit sellen see jäwen, dee derch däm Tooproop jeit, de halft von eenem Schekel, nodäm Schekel von Heilichtum - (20 Gera de Schekel), de halft von eenem Schekel aus Häwopfa däm Harn.

¹⁴Jiedra dee derch däm Tooproop jeit em Ella von 20 Joa un doaräwa, saul daut Häwopfa däm Harn jäwen.

¹⁵De Rikja saul nich mea jäwen, un de Oama nich weinja aus de halft von eenem Schekel, wan jie daut Häwopfa däm Harn jäwen, om Veseenunk to doonen fa june Seelen.

¹⁶Un du saust daut Veseenungsjelt vonne Kjinja Israel nämen un daut fa däm Deenst em Zelt de Bejäajnunk jäwen; un daut saul de Kjinja Israel toom Jedajchnis ver Gott sennen, om Veseenunk to doonen fa june Seelen.

¹⁷Un de Har räd too Moses un säd:

¹⁸Moakt junt eene Komm von Koppa un sien Jestal von Koppa toom Wauschen; un stal daut opp tweschen däm Zelt de Bejäajnunk un däm Aultoa un doo Wota doa nenn.

¹⁹Un Aaron un siene Säns sellen äare Henj un äare Feet doabennen wauschen.

²⁰Wan see en daut Zelt de Bejäajnunk nengonen, sellen see sikj met Wota wauschen, daut see nich stoawen, ooda wan see nom Aultoa noda komen toom Deenst, om däm Harn een Fiaopfa too rieekjren.

²¹Un see sellen äare Henj un äare Feet wauschen, daut see nich stoawen; un daut saul an eene eewje Sazunk sennen, am un sienem Somen bie äare Jeschlajchta.

²²Un de Har räd too Moses un säd:

²³Un du, nemm die de baste Jewerzen: 500 Schekel selfst utjerande Murren, un haulf soo väl Kerneel, 250, un 250 Balsamrua,

²⁴un Kassia 500, nom Schekel vom Heilichtum, un een Hin Eeljboom Eelj;

²⁵un moak doarut een Eelj de heilje Saulwunk, eene Mischunk von jewerts Saulw, een Woakj vom Saulwmischa; daut saul een Eelj de heilje Saulwunk sennen.

²⁶Un doamet saust du daut Zelt de Bejäajnunk un de Zeichnislod saulwen,

²⁷un däm Desch un aul sien Jereetschoft, un de Laump met Jestal un sien Jereetschoft un däm Ruakaultoa,

²⁸un däm Brauntopfa-Aultoa un aul sien Jereetschoft un de Komm toom wauschen un sien Jestal,

²⁹un du saust dee heilje; un dee sellen huach heilich sennen: Aules, waut see aunrieren, woat heilich sennen.

³⁰Un Aaron un siene Säns saust du saulwen un saust an heilje, om an mie too Priesta weien.

³¹Un to de Kjinja Israel saust du soo räden: Een Eelj dee heilje Saulwunk saul mie dit sennen bie june Jeschlajchta.

³²Opp kjeen Menschenlief saul maun daut jeeten, du saust uk en dise mischunk kjeent fa junt moaken; dan daut es heilich, heilich saul junt daut sennen.

³³Wäa daut nomoakt ooda eenem Framden doavon jeft, dee saul ut sienem Volkj utjerot woaren.

³⁴Un de Har räd too Moses: Nemm die gootrikjende Jewerzen, Stakte un Ruakmuschel un Galban, gootrikjende Jewerzen un reinen Weiruak; von aulem jlikje väl saul daut sennen.

³⁵Un moak Rieekjastoff (Weiruak, seeta Ruak) doarut, no de Konst vom Saulwmischa, jesolten, rein, heilich.

³⁶Un veriew doavon too Pulwa, un laj doavon ver däm Zeichnis en daut Zelt de Bejäajnunk, woa selfst ekj met die toopkomen woa; huach heilich saul junt daut sennen.

³⁷Un daut Rieekjastoff (Weiruak, seeta Ruak), daut du moaken saust, no sienem Bestaundverältnis sell jie junt daut nich moaken; heilj däm Harn saul daut sennen.

³⁸Wäa daut nomoakt, om doaraun too rikjen, dee saul ut sienem Volkj utjerot woaren.