Read De Bibel JHF 2. Mose 36 Bible Online

2. Mose 36 - De Bibel JHF bible

2. Mose 36

¹Un Bezalel un Oholiab un aule Mana, dee een weiset Hoat hauden, en dän de Har Weisheit un Vestaunt jelajcht haud, doamet see aulet Woakj toom Deenst em Heilichtum too moaken wisten, deeden no aulem, waut de Har befoolen haud.

²Un Moses roopt Bezalel un Oholiab un jane Mana, dee een weiset Hoat hauden, en dee äare Hoaten Gott Weisheit jelajcht haud, jiedrem, däm sien Hoat bewäajd, aum Woakj too gonen, om daut to moaken.

³Un see neemen von Moses daut gaunze Häwopfa, daut de Kjinja Israel jebrocht hauden toom Woakj em Deenst aum Heilichtum, om daut to moaken; un dise brochten am noch Morjen fa Morjen friewelje Gowen.

⁴Un daut kaumen aule weis Mana, dee aum Woakj em Heilichtum oabeiden, een jiedra von sienem Woakj, daut see muaken,

⁵un räden too Moses un säden: Daut Volkj brinjt väl, mea aus jenuach fa daut Oabeitswoakj, daut de Har too moaken befoolen haft.

⁶Doa befool Moses, un maun leet eenen Roop derch daut Loaga gonen — aulsoo: Noch Maun noch Fru saul wiedahan eene Oabeit moaken fa daut Häwopfa vom Heilichtum! Un soo hieed daut Volkj opp to brinjen.

⁷Un daut Oabeitsmateriol wia jenuach fa daut gaunze Woakj, om daut to moaken; un daut bleef noch äwa.

⁸Un aule, dee een weiset Hoat hauden unja de Oabeida aum Woakj, muaken de Wonunk ut 10 Teppiche; von 10 jewäwden witte Boomwoll un blauen un rooden Purpur un Karmesin, met Cherubim en konst jewäwden Oabeit.

⁹De Lenj von eenem Teppich wia 28 Ellen, un vea Ellen de Breed von eenem Teppich; eene Mot fa aule Teppiche.

¹⁰Un hee muak fief Teppiche toop, eenen aum aundren, un hee muak wada fief Teppiche toop, eenen aum aundren.

¹¹Un hee muak Eese von blauen Purpur aun de Soom von eenem Teppich aum Enj, doa woa see toopkaumen; krakjt soo muak hee daut aum Soom de latste Teppiche woa dee toopkomen.

¹²50 Eese muak hee aun däm eenen Teppich, un 50 Eese muak hee aum Enj vom Teppich, woa dee toopjemoakt wieren, de Eese wieren eene de aundre jäajenäwa.

¹³Un hee muak 50 Klaumasch von Golt un muak de Teppiche toop, eenen aun däm aundren, met de Klaumasch, soo daut de Wonunk een Gaunzet wort.

¹⁴Un hee muak Teppiche von Kosenhoa fa daut Zelt äwa de Wonunk; 11 Teppiche muak hee.

¹⁵De Lenj von eenem Teppich wia 30 Ellen, un vea Ellen de Breed von eenem Teppich: Een Mot fa de 11 Teppiche.

¹⁶Un hee muak fief Teppiche oppoat toop un sas Teppiche oppoat.

¹⁷Un hee muak 50 Eese aun däm Soom aum Enj von eenem jiedren Teppich doa woa dee toopkaumen, un 50 Eese muak hee aun de Soom de aundre Teppiche, woa de aundre toopkaumen.

¹⁸Un hee muak 50 Klaumasch von Koppa, om daut Zelt tooptomoaken, soo daut et een Gaunzet wort.

¹⁹Un hee muak fa daut Zelt eene Dakj von root jeforwne Bockfals un eene Dakj von Dacksfals doa äwa.

²⁰Un hee muak de Bräda fa de Wonunk von Akozjeholt, toom stonen:

²¹10 Ellen de Lenj von eenem Brat, un eene un eene haulwe Elle de Breed von eenem Brat;

²²twee Taupes aun eenem Brat, eena däm aundren jäajenäwa stonent: Aulsoo muak hee aule Bräda fa de Wonunk.

²³Un hee muak de Bräda fa de Wonunk: 20 Bräda aune Meddachsied, siedlich;

²⁴un hee muak 40 Feet von Selwa unja de 20 Bräda; twee Feet unja eenem Brat fa siene twee Taupes, un wada twee Feet unja een Brat fa siene twee Taupes;

²⁵un aun de aundre Sied de Wonunk, aune Nuadsied, muak hee 20 Bräda,

²⁶un äare 40 Feet von Selwa; twee Feet unja een Brat, un wada twee Feet unja een Brat;

²⁷un aune hinjaschte Sied de Wonunk jäajen waste muak hee sas Bräda;

²⁸un twee Bräda muak hee fa de Akjen de Wonunk aune hinjaschte Sied;

²⁹un dee wieren dobbelt von unjen nohecht un wieren aun äarem bowaschten Deel met eenem Rinkj toopjemoakt; soo muak hee daut met de beid aun de beid Akjen.

³⁰Un daut wieren acht Bräda, un äare Feet von Selwa; 16 Feet, too twee Feet unja eenem Brat.

³¹Un hee muak Rijel von Akozjeholt; fief fa de Bräda aun eene Sied de Wonunk,

³²un fief Rijel fa de Bräda de aundre Sied de Wonunk, un fief Rijel fa de Bräda de Wonunk aune hinjaschte Sied jäajen Wasten;

³³un hee muak däm meddelsten Rijel enne Medd de Bräda von eenem Enj bat toom aundren derchgonent.

³⁴Un hee äwatrock de Bräda met Golt; un äare Rinj, fa de Rijel, muak hee von Golt, un äwatrock de Rijel met Golt.

³⁵Un hee muak däm Väahank von blauen un rooden Purpur un Karmesin un fien jewäwden Boomwoll; un muak Cherubim doaraun, en konst Oabeit.

³⁶Un hee muak doatoo vea Stendasch von Akozjeholt un äwatrock dee met Golt, äare Hoakes von Golt, un hee goot doatoo vea Feet von Selwa.

³⁷Un hee muak fa däm Engank em Zelt eenen Väahank von blauen un rooden Purpur un Karmesin un fien jewäwden Boomwoll, en bunt jemoakte Oabeit;

³⁸un siene fief Stendasch un äare Hoakes; un hee äwatrock äare Kjap un äare dedwäa Stangen met Golt; un äare fief Feet wieren von Koppa.