Read De Bibel JHF 2. Mose 37 Bible Online

2. Mose 37 - De Bibel JHF bible

2. Mose 37

¹Un Bezalel muak de Lod von Akozjeholt; twee un eene haulwe Elle lank, un eene un eene haulwe Elle Breet, un eene un eene haulwe Elle huach.

²Un hee äwatrock ar met reinem Golt von bennen un von buten, un muak eene goldne Leest runtom.

³Un hee goot vea goldne Rinj aun äare vea Akjen, twee Rinj aun eene Sied un twee Rinj aune aundre Sied.

⁴Un hee muak Stangen von Akozjeholt un äwatrock dee met Golt.

⁵Un hee deed de Stangen enne Rinj aune Sieden de Lod, om de Lod too droagen.

⁶Un hee muak een Dakjsel von reinem Golt; twee un eene haulwe Elle lank, un eene un eene haulwe Elle breet.

⁷Un hee muak twee Cherubim von Golt; en konstvollen Oabeit muak hee an, aun beid Enj vom Dakjsel;

⁸eenen Cherub aum Enj de eene Sied un eenen Cherub aun däm Enj de aundre Sied; ut eenem Stekj vom Dakjsel muak hee de Cherubim, aun siene beid Enja.

⁹Un de Cherubim breeden äare Flichten no bowen ut, met äare Flichten bedakjten see daut Dakjsel, un äare Jesechta wieren jäajen eenaunda; de Jesechta de Cherubim wieren jäajen daut Dakjsel jerecht.

¹⁰Un hee muak däm Desch von Akozjeholt; twee Ellen lank un eene Elle breet, un eene un eene haulwe Elle huach.

¹¹Un hee äwatrock am met reinem Golt un muak am runtom eene Leest von Golt.

¹²Un hee muak am eenen Raunt, eene Hauntbreet, runtom un muak runtom eene Leest von Golt aun sienem Raunt.

¹³Un hee goot doatoo 4 Rinj von Golt un deed de Rinj aun de vea Akjen, dee aun siene vea Feet wieren.

¹⁴Dicht aum Raunt wieren de Rinj, daut maun de Stangen doa nenn deit, om däm Desch too droagen.

¹⁵Un hee muak de Stangen von Akozjeholt un äwatrock dee met Golt, om däm Desch too droagen.

¹⁶Un hee muak daut Jereetschoft, dee oppem Desch stonen sullen; siene Kommen un siene Schiewen un siene Kaunen un siene Kuffels, met dee daut Drinkjopfa utjegoten woat, von reinem Golt.

¹⁷Un hee muak een Laumpenhoola von reinem Golt; en Hauntoabeit muak hee de Laump, sienen Foot un sien Jestal; siene Kjelche* (Kuffels*), siene Knoppes un siene Bloomen wieren ut eenem Stekj met am.

¹⁸Un 6 Oarms jinjen von siene Sieden rut; 3 Oarms vom Laumpenhoola ut siene eene Sied un 3 Oarms vom Laumpenhoola ut siene aundre Sied.

¹⁹3 Kjelche*, aus Mandelbloomen, aun däm eenen Oarm; Knoppes un Bloomen; un 3 Kjelche*, aus Mandelbloomen, aun däm aundren Oarm; Knoppes un Bloomen; soo fa de 6 Oarms, dee vom Laumpenhoola utjinjen.

²⁰Un aun däm Laumpenhoola 4 Kjelche*, aus Mandelbloomen; siene Knoppes un siene Bloomen;

²¹un zwoa een Knoppen unja 2 Oarms, ut am, un wada een Knoppen unja 2 Oarms, ut am, un wada een Knoppen unja 2 Oarms, ut am, fa de 6 Oarms, dee von am utgonen.

²²Äare Knoppes un äare Oarms wieren ut eenem Stekj met am; de gaunze Laump eene Hauntoabeit, von reinem Golt.

²³Un hee muak 7 Laumpen un siene Dachtscheea un siene Laschknoppes von reinem Golt.

²⁴Ut eenem Talent reinem Golt muak hee am un aul sien Jereetschoft.

²⁵Un hee muak däm Ruakaultoa von Akozjeholt; eene Elle siene Lenj, un eene Elle siene Breed, veakauntich, un twee Ellen huach; ut eenem Stekj met am wieren siene Hieena.

²⁶Un hee äwatrock am met reinem Golt, sien Dakjsel un siene Wenj runtom un siene Hieena; un hee muak am eene Leest runtom von Golt.

²⁷Un hee muak twee goldne Rinj, unja siene Leest, aun siene beid Sieden, aun siene beid Wenj, daut maun de Stangen doa nenn deit, om am doamet too droagen.

²⁸Un hee muak de Stangen von Akozjeholt un äwatrock dee met Golt.

²⁹Un hee muak daut heilje Saulweelj un daut reine, gootrikjende Rieekjastoff (Weiruak, seeta Ruak), een Woakj vom Saulwmischa.