Read De Bibel JHF 2. Mose 38 Bible Online

2. Mose 38 - De Bibel JHF bible

2. Mose 38

¹Un hee muak däm Brauntopfaaultoa von Akozjeholt: Siene lenj fief Ellen, un siene breed fief Ellen, veakauntich, un huach dree Ellen;

²un hee muak de Hieena aun siene vea Akjen; ut am wieren siene vea Hieena; un hee äwatrock dee met Koppa.

³Un hee muak aul daut Aultoa Jereetschoft; de Tap un de Schefflen un de Sprenjschiewe, un de Gauflen un de Kolepaune; aul sien Jereetschoft muak hee von Koppa.

⁴Un hee muak aum Aultoa een Fiarost aus een Nat ut Koppa, unja de Spunj vom Aultoa, von unjen, bat to siene Halft vom Aultoa.

⁵Un hee goot vea Rinj aun de vea Akjen aum koppanen Nat om de Stangen too hoolen.

⁶Un hee muak de Stangen von Akozjeholt un äwatrock dee met Koppa.

⁷Un hee deed de Stangen en de Rinj, aune Sieden vom Aultoa, om am doamet too droagen; holl, von Bräda muak hee am.

⁸Un hee muak de Komm toom wauschen von Koppa un sien Jestal von Koppa; von de Späjels de deenende Frues, dee doa aum Engank vom Zelt de Bejäajnunk deenden.

⁹Un hee muak däm Väahoff; aun de Meddachsied, siedlich, Väahenjen vom Väahoff von fien jewäwden witte Boomwoll, 100 Ellen;

¹⁰äare 20 Stendasch un äare 20 Feet von Koppa, de Stendahoakes un äare dedwäa Stangen von Selwa.

¹¹Un aune Nuadsied 100 Ellen; un äare 20 Stendasch un äare 20 Feet von Koppa, de Stendahoakes un äare dedwäa Stangen von Selwa.

¹²Un aune Wastsied 50 Ellen Väahenjen, äare 10 Stendasch un äare 10 Feet, de Stendahoakes un äare dedwäa Stangen von Selwa.

¹³Un aune Oostsied, jäajen Sonnenoppgank, 50 Ellen:

¹⁴50 Ellen Väahenjen opp eene Sied, äare dree Stendasch un äare dree Feet;

¹⁵un aun de aundre Sied — von dise Sied un von jane Sied vom Väahoffdooa 15 Ellen Väahenjen, äare dree Stendasch un äare dree Feet.

¹⁶Aule Väahenjen vom Väahoff runtom wieren von fien jewäwden witte Boomwoll;

¹⁷un de Feet vonne Stendasch von Koppa, de Stendahoakes un äare dedwäa Stangen von Selwa un äare Kjap met Selwa äwatrocken; un de Stendasch vom Väahoff wieren aula met dedwäa Stangen von Selwa.

¹⁸Un däm Väahank vom Väahoffdooa muak hee en bunt jewäwden Oabeit, von blauen un rooden Purpur un Karmesin un fien jewäwden witte Boomwoll; zwoa 20 Ellen de Lenj; un de Hecht, en de Breed, fief Ellen, soo aus de Väahenjen vom Väahoff;

¹⁹un äare vea Stendasch un äare vea Feet wieren von Koppa, äare Stendahoakes von Selwa un äare Kjap un äare dedwäa Stangen von Selwa.

²⁰Un aule Näajel fa de Wonunk un runtom fa däm Väahoff wieren von Koppa.

²¹Dit sent de beräakjende Kosten de Wonunk, de Zeichniswonunk, dee beräakjent wort opp Moses sien Befäl, derch däm Deenst de Leviten — unja Ithamar siene Haunt, Aaron sienem Sän, däm Priesta;

²²un Bezalel, däm Sän Uri, vom Sän Hur, vom Staum Juda, muak aules, waut de Har Moses befoolen haud;

²³un met am Oholiab, de Sän Achisamak, vom Staum Dan, een Kjensla un Konst- un Buntwäwa en blauen un rooden Purpur un Karmesin un fien jewäwden witte Boomwoll:

²⁴Aulet Golt daut toom Woakj veoabeit wort aun disem Heilichtumswoakj, daut Wäwopfagold, wia 29 Talent un 730 Schekel, nodäm Schekel vom Heilichtum.

²⁵Un daut Selwa von de Jetalde de Jemeent wia 100 Talent un 1775 Schekel, nodäm Schekel vom Heilichtum:

²⁶Een Beka oppem Kopp, de halft vom Schekel, nodäm Schekel vom Heilichtum, von eenem jiedren, dee no de Jetalde äwajinkj, von 20 Joa un doaräwa, von 603 550 Maun.

²⁷Un de 100 Talent Selwa wieren toom jeeten de Feet vom Heilichtum un de Feet vom Väahank, 100 Feet opp 100 Talent, een Talent opp eenen Foot.

²⁸Un von de 1775 Schekel muak hee de Hoakes fa de Stendasch un äwatrock äare Kjap un vebung an met de dedwäa Stangen.

²⁹Un daut Koppa vom Wäwopfa wia 70 Talent un 2400 Schekel.

³⁰Un hee muak doa rut de Feet toom Engank vom Zelt de Bejäajnunk un däm koppanen Aultoa un sien koppanet Nat un aulet Jereetschoft fa däm Aultoa;

³¹un runtom de Feet fa däm Väahoff un de Feet toom Dooa vom Väahoff un aule Näajel de Wonunk un aule Näajel runtom fa däm Väahoff.