Read De Bibel JHF 2. Mose 39 Bible Online

2. Mose 39 - De Bibel JHF bible

2. Mose 39

¹Un ut däm blauen un däm rooden Purpur un däm Karmesin muaken see de Deenstkjleeda toom Deenst em Heilichtum, un see muaken de Heilje Kjleeda fa Aaron, soo aus de Har Moses befoolen haud.

²Un hee muak daut Efod von Golt, blauen un rooden Purpur un fien jewäwden witte Boomwoll.

³Un see schluagen daut Golt denn un maun veschneet daut to Drot, toom veoabeiden met däm blauen un rooden Purpur un met däm Karmesin un fien jewäwden witte Boomwoll, en konst jewäwden Oabeit.

⁴See muaken doaraun Schullastekja dee toop pausste; aun de beid Enja worden dee toopjemoakt.

⁵Un de Konstjewäwda Jirtel, met däm dee aunjebungen worden, dee doaräwa wia, wia von däm seljen Zeich, von dee selje Oabeit; von Golt, blauen un rooden Purpur un Karmesin un fien jewäwden witte Boomwoll; soo aus de Har Moses befoolen haud.

⁶Un see muaken de Onukssteena, en Golt enjefot, enngraviet en Säajel oabeit, no de Nomes de Säns Israel.

⁷Un maun sad dee oppe Schullastekja vom Efod, aus Jedajchnissteena fa dee Kjinja Israel; soo aus de Har Moses befoolen haud.

⁸Un hee muak daut Brostschilt en Konstjewäwden Oabeit, soo aus de Efod jemoakt wia, von Golt, blauen un rooden Purpur un Karmesin un fien jewäwden witte Boomwoll.

⁹Daut wia veakauntich; daut Brostschilt muaken see dobbelt, een Spaun siene Lenj un een Spaun siene Breed, dobbelt.

¹⁰Un see felden daut met 4 Rieej Steena: Eene Rieej, Sardis, Topas un Smaracht, de ieeschte Rieej;

¹¹un de tweede Rieej: Karfunkel, Safier un Diamaunt;

¹²un de dredde Rieej: Opal, Achat un Amethust;

¹³un de vieede Rieej: Chriesolit, Onniks un Jaspies; biem Ennsaten en Golt enjefot.

¹⁴Un de Steena wieren no de Nomes de 12 Säns Israel, no äare Nomes; enngraviet, een jiedra no sienem Nomen, fa de 12 Stam.

¹⁵Un see muaken aum Brostschilt aus Schnua jeflochtne Kjäden, von reinem Golt.

¹⁶Un see muaken 2 Spunj von Golt un twee Rinj von Golt un muaken de twee Rinj aun de beid Enja vom Brostschilt faust.

¹⁷Un de twee jeflochtne Schnua von Golt muaken see aun de beid Rinj aun de Enja vom Brostschilt faust;

¹⁸un de aundre beid Enja von de twee jeflochtne Schnua muaken see aun de beid Spunj un aun de Schullastekja vom Efod faust, aun siene väaschte Sied.

¹⁹Un see muaken twee Rinj von Golt un muaken de aun de beid Enj vom Brostschilt faust, aun sienem Soom, dee no bennen han vom Efod wia, vonbennen;

²⁰un see muaken twee Rinj von Golt un muaken de aun de beid Schullastekja vom Efod faust, unjen aun siene väaschte Sied, doa woa dee toopkjemt, äwa däm Jirtel vom Efod.

²¹Un see bungen daut Brostschilt aun de Rinj vom Efod met eene purpurblaue Schnua, daut et äwa däm Jirtel vom Efod wia un daut Brostschilt sikj nich vom Efod veschuwe kunn; soo aus de Har Moses befoolen haud.

²²Un hee muak daut Bowakjleet en Wäwoabeit, gaunz von blauen Purpur.

²³Un daut Kopploch em Bowakjleet von Efod wia enne Medd, aus daut Loch bie eenem Brostschilt; eene Soom haud daut runtom aun sienem Kopploch, doamet daut nich ennrit.

²⁴Un see muaken aun däm Soom vom Bowakjleet Grenautapel von blauen un rooden Purpur un Karmesin, jeflochte.

²⁵Un see muaken Kjlinjasch von reinem Golt un saden de Kjlinjasch tweschen de Grenautapel runtom aum Soom vom Bowakjleet, tweschen de Grenautapel;

²⁶een Kjlinja un eenen Granataupel, een Kjlinja un eenen Granataupel runtom aum Soom vom Bowakjleet, om däm Deenst to doonen; soo aus de Har Moses befoolen haud.

²⁷Un see muaken de Liefrakj von fien jewäwden witte Boomwoll, en Wäwoabeit, fa Aaron un fa siene Säns;

²⁸un de Koppbinj von witte Boomwoll, un daut Koppschmuck de huage Metz von witte Boomwoll, un de boomwolne Beenkjleeda von fien jewäwden witte Boomwoll,

²⁹un däm Jirtel von fien jewäwden witte Boomwoll un von blauen un rooden Purpur un Karmesin, en bunt jewäwden Oabeit; soo aus de Har Moses befoolen haud.

³⁰Un see muaken daut Stearnblaut, daut heilje Kroon, von reinem Golt, un schreewen doabowen met Säajelschreft: Heilichkjeit däm Harn!

³¹Un bungen eene Schnua von blauen Purpur doa aun, om daut bowen aune Koppbinj faust tomoaken; soo aus de Har Moses befoolen haud.

³²Un daut wort toenj jebrocht de gaunze Oabeit aune Wonunk vom Zelt de Bejäajnunk; un de Kjinja Israel deeden aules, waut de Har Moses befoolen haud, aulsoo deeden see.

³³Un see brochten de Wonunk no Moses: Daut Zelt un aul sien Jereetschoft, siene Klaumasch, siene Bräda un siene Rijel un siene Stendasch un siene Feet;

³⁴un de Dakj von root jeforwne Bockfals un de Dakjen von Dacksfals un däm trann Väahank;

³⁵de Zeichnislod un äare Stangen un daut Dakjsel;

³⁶de Desch, aul sien Jereetschoft un de Aunsechtsbrood;

³⁷däm reinen Laumpenhoola, siene Laump, dee doatoo jemoakte Laumpen, un aul sien Jereetschoft un daut Eelj fa de Laumpen;

³⁸un däm goldnen Aultoa un daut Saulweelj un daut gootrikjende Rieekjastoff (Weiruak, seeta Ruak); un däm Väahank vom Zelt Engank;

³⁹däm koppanen Aultoa un sien koppanet Nat, siene Stangen un aul sien Jereetschoft; de Wauschkomm un sien Jestal;

⁴⁰de Väahenjen vom Väahoff, siene Stendasch un siene Feet; un däm Väahank fa de Däa vom Väahoff, siene Strenj un siene Näajel; un aulet Jereetschoft toom Deenst de Wonunk fa daut Zelt de Bejäajnunk;

⁴¹de Deenstkjleeda toom Deenst em Heilichtum, de heilje Kjleeda fa Aaron, däm Priesta, un de Kjleeda fa siene Säns, om däm Priestadeenst to doonen.

⁴²No aulem, waut de Har Moses befoolen haud, aulsoo hauden de Kjinja Israel de gaunze Oabeit jemoakt.

⁴³Un Moses sach daut gaunze Woakj, un kjikj, see hauden daut jemoakt; soo aus de Har befoolen haud, aulsoo hauden see daut jemoakt; un Moses säajend an.