Read De Bibel JHF 2. Mose 6 Bible Online

2. Mose 6 - De Bibel JHF bible

2. Mose 6

¹Un de Har räd too Moses: Nu saust du seenen, waut ekj däm Farao doonen woa; dan derch eene stoakje Haunt saul hee jedwungen woaren an gonen to loten, un derch eene stoakje Haunt saul hee jedwungen woaren an ut sienem Launt ruttojoagen.

²Un Gott räd too Moses un säd to am: Ekj sie Gott.

³Un ekj sie Abraham, Isaak un Jakob aus Gott erschienen, de Aulmajchtja; oba met mienem Nomen Har ha ekj mie an nich jeopenboat.

⁴Un uk mienen Bunt ha ekj met an oppjerecht, an daut Launt Kanaan to jäwen, daut Launt äare Framdlinkjschoft, en däm see aus Framde jewast sent.

⁵Un ekj ha uk daut Weekloagen de Kjinja Israel jehieet, dee de Ägipta toom Deenst aunholen, un ha aun mienem Bunt jedocht.

⁶Doarom saj to de Kjinja Israel: Ekj sie de Har, un ekj woa junt unja de Laustoabeide de Ägipta rutfieren, un woa junt raden ut äarem Deenst un junt erleesen met eenem utjestrakjtem Oarm un derch groote Jerechten.

⁷Un ekj well mie junt aunnämen toom Volkj un well jun Gott sennen; un jie sellen erkjanen, daut ekj de Har, jun Gott, sie, dee junt rutfieet vonne Laustoabeit de Ägipta wajch.

⁸Un ekj woa junt en daut Launt brinjen, daut däm Abraham, Isaak un Jakob to jäwen, ekj miene Haunt oppjehowen ha, un woa daut junt toom Ieejentum jäwen, ekj, Gott.

⁹Un Moses räd aulsoo to de Kjinja Israel; oba see hieeden nich opp Moses fa Onjedult un fa hoadem Deenst.

¹⁰Un de Har räd too Moses un säd:

¹¹Go nenn, räd toom Farao, däm Kjennich von Ägipten, daut hee de Kjinja Israel ut sienem Launt gonen lat.

¹²Un Moses räd ver däm Harn un säd: Kjikj, de Kjinja Israel ha nich opp mie jehieet, un woo sull de Farao opp mie hieren, doatoo ekj onbeschnäden aun Leppen sie?

¹³Un de Har räd too Moses un to Aaron un jeef an Befäl aun de Kjinja Israel un aun däm Farao, däm Kjennich von Ägipten, om de Kjinja Israel ut däm Ägiptenlaunt ruttofieren.

¹⁴Dit sent de Heipta von äare Vodahiesa: De Säns Ruben, däm Ieeschtjebuarnen Israels: Hanok un Pallu, Hezron un Karmi; daut sent de Jeschlajchta Ruben.

¹⁵Un de Säns Simeon: Jemuel un Jamin un Ohad un Jakin un Zochar un Saul, de Sän de Kanaanitarin; daut sent de Jeschlajchta Simeon.

¹⁶Un dit sent de Nomes de Säns Levi no äare Jeschlajchta: Gerson un Kehat un Merari; un de Läwensjoaren Levi wieren 137 Joa.

¹⁷De Säns Gerson: Libni un Schimi, no äare Jeschlajchta.

¹⁸Un de Säns Kehat: Amram un Jizhar un Hebron un Ussiel; un de Läwensjoaren Kehat wieren 133 Joa.

¹⁹Un de Säns Merari: Machli un Musi; daut sent de Famieljes Levi no äare Jeschlajchta.

²⁰Un Amram neem Jokebed, siene Taunte, sikj to Fru, un see jebua am Aaron un Moses; un de Läwensjoaren Amram wieren 137 Joa.

²¹Un de Säns Jizhar: Korah un Nefeg un Sikri.

²²Un de Säns Ussiel: Mischael un Elzafan un Sithri.

²³Un Aaron neem Elischeba, de Dochta Amminadab, de Sesta Nachschon, sikj to Fru; un see jebua am Nadab un Abihu, Eleasar un Ithamar.

²⁴Un de Säns Korah: Assir un Elkana un Abiasaf; daut sent de Famieljes de Korhita.

²⁵Un Eleasar, de Sän von Aaron, neem eene von de Dajchta Putiel sikj to Fru, un see jebua am Pineha; daut sent de Heipta de Vodasch de Leviten no äare Jeschlajchta.

²⁶Dis Aaron un dis Moses sent daut, to dän Gott jerät haft: Fieet de Kjinja Israel ut däm Ägiptenlaunt rut, no äare Häasch.

²⁷Dise sent daut, dee toom Farao, däm Kjennich von Ägipten, räden, om de Kjinja Israel ut Ägipten ruttofieren: Dis Moses un dis Aaron.

²⁸Un daut passieed aun däm Dach, doa de Har too Moses räd em Ägiptenlaunt,

²⁹doa räd de Har too Moses un säd: Ekj sie Gott; räd toom Farao, däm Kjennich von Ägipten aules, waut ekj to die räd. 6,

³⁰Un Moses räd ver däm Harn: Kjikj, ekj sie onbeschnäden aune Leppen, un woo sull de Farao opp mie hieren?