Read De Bibel JHF 2. Mose 7 Bible Online

2. Mose 7 - De Bibel JHF bible

2. Mose 7

¹Un de Har säd to Moses: Kjikj, ekj ha die däm Farao toom Gott jesat, un dien Brooda Aaron saul dien Profeet sennen.

²Du saust aules räden, waut ekj die befälen woa, un dien Brooda Aaron saul toom Farao räden, daut hee de Kjinja Israel ut däm Launt gonen lat.

³Un ekj well daut Hoat vom Farao hoat moaken un miene Tieekjen un miene Wunda em Ägiptenlaunt vemieren.

⁴Un de Farao woat nich opp junt hieren; un ekj woa miene Haunt aun Ägipten lajen un miene Häasch, mien Volkj, de Kjinja Israel, ut däm Ägiptenlaunt rutfieren derch groote Jerechten.

⁵Un de Ägipta sellen erkjanen, daut ekj Gott sie, wan ekj miene Haunt äwa Ägipten utstrakj un de Kjinja Israel ut äare Medd rutfieren woa.

⁶Un Moses un Aaron deeden daut; soo aus de Har an befoolen haud, aulsoo deeden see.

⁷Un Moses wia 80 Joa oolt, un Aaron 83 Joa oolt, aus see toom Farao räden.

⁸Un de Har räd too Moses un to Aaron un säd:

⁹Wan de Farao to junt räden un sajen woat: Doot een Wunda fa junt! Soo saust du too Aaron sajen: Nemm dienen Stock un schmiet am han ver däm Farao; hee saul too eene Schlang woaren.

¹⁰Un Moses un Aaron jinjen nom Farao nenn un deeden aulsoo, aus Gott befoolen haud; un Aaron schmeet sienen Stock han ver däm Farao un ver siene Kjnajchts, un hee wort ne Schlang.

¹¹Doa roopt de Farao de Weise un de Zaubra; un uk see, de ägiptische Woasaja, deeden aulsoo met äare Zaubakonste,

¹²un een jiedra schmeet sienen Stock han, un dee worden too Schlangen; oba Aaron sien Stock veschlunk äare Stakj.

¹³Un Farao sien Hoat wort hoat, un hee hieed nich opp an, soo aus Gott jerät haud.

¹⁴Un de Har räd too Moses: Daut Hoat vom Farao es vestokt; hee wäat sikj, daut Volkj gonen to loten.

¹⁵Go Zemorjes nom Farao — kjikj, hee woat rut nom Wota gonen — un go am entjäajen, aum Eewa vom Stroom, un neem däm Stock, dee en eene Schlang vewaundelt wort, en diene Haunt,

¹⁶un saj to am: De Har, dee Gott de Hebräa, haft mie no die jeschekjt un jesajcht: Lot mien Volkj gonen, daut see mie enne Wieste deenen! Oba kjikj, du hast bat nu nich jehieet.

¹⁷Soo sajcht de Har: Doaraun saust du erkjanen, daut ekj Gott sie: Kjikj, ekj well met däm Stock, dee en miene Haunt es, oppem Wota schlonen, daut em Stroom es, un daut woat en Bloot vewaundelt woaren.

¹⁸Un de Fesch, dee em Stroom sent, woaren stoawen, un de Stroom woat stinkjen, un de Ägipta woaren sikj äakjlen, Wota ut däm Stroom to drinkjen.

¹⁹Un de Har räd too Moses: Saj too Aaron: Nemm dienen Stock un strakj diene Haunt ut äwa daut Wota en Ägipten, äwa siene Flusse, äwa siene Kenole un äwa siene Läche (Kule) un äwa aul siene Wotasaumlunge, daut see too Bloot woaren; un daut woat Bloot sennen em gaunzen Ägiptenlaunt, soo aus en heltane soo uk en steenane Jefässa.

²⁰Un Moses un Aaron deeden soo, aus de Har befoolen haud; un hee hoof däm Stock un schluach daut Wota, daut em Stroom wia, ver däm Farao siene Uagen un ver de Uagen siene Kjnajchts. Doa wort aulet Wota, daut em Stroom wia, en Bloot vewaundelt;

²¹un de Fesch, dee em Stroom wieren, storwen, un de Stroom wort stinkjent, un de Ägipta kunnen daut Wota ut däm Stroom nich drinkjen; un daut Bloot wia em gaunzen Ägiptenlaunt.

²²Un de ägiptische Woasajapriesta deeden uk soo met äare Zaubakonst; un Farao sien Hoat bleef hoat, un hee hieed nich opp an, soo aus de Har jerät haud.

²³Un de Farao dreid om un jinkj en sien Hus un neem uk dit nich too Hoaten.

²⁴Un aule Ägipta growe runtom däm Stroom no Wota toom drinkjen, dan daut Wota em Stroom kunnen see nich drinkjen.

²⁵Un daut worden säwen Doag erfelt, nodäm de Har däm Stroom jeschloagen haud.

²⁶Un de Har räd too Moses: Go nom Farao nenn un saj to am: Soo sajcht de Har: Lot mien Volkj gonen, daut see mie deenen!

²⁷Un wan du die wäascht, an gonen to loten, kjikj, soo well ekj diene gaunze Jäajent met Poggen schlonen.

²⁸Un de Stroom woat von Poggen wimlen, un see woaren noppkomen un en dien Hus komen un en diene Schlopstow un opp dien Bad un enne Hiesa von diene Kjnajchts un unja dienem Volkj un en diene Owes un en diene Bakträaj.

²⁹Un de Poggen woaren noppkomen äwa die un äwa dien Volkj un äwa aul diene Kjnajchts.