Read De Bibel JHF Hiob 10 Bible Online

Hiob 10 - De Bibel JHF bible

Hiob 10

¹Miene Seel äakjelt mien Läwen; ekj well miene Kloag en mie frie Bon loten, well räden enne Bettanis miene Seel.

²Ekj well too Gott sajen: Vedaum mie nich! Lot mie weeten, wuaräwa du met mie rechst.

³Jefällt die daut, daut du bedrekjst, daut du de Oabeit von diene Henj veschmitst un äwa däm Rot de Gottloose dien Licht dachen latst?

⁴Hast du Uagen von Fleesch, ooda sitst du, aus een Mensch sitt?

⁵Sent diene Doag aus de Doag von eenem Mensch, ooda diene Joaren aus de Doag von eenem Maun,

⁶daut du no miene Ojjerajchtichkjeit sieekjst un no miene Sind forschst,

⁷doa du doch weetst, daut ekj nich schuldich sie, un daut kjeena es, dee ut diene Haunt rad?

⁸Diene Henj ha mie gaunz jemoakt un mie runtom jeschaufen, un du veschlinjst mie!

⁹Jedenkj doch, daut du mie aus Leem jemoakt hast - un nom Stoff west du mie trigjgonen loten!

¹⁰Hast du mie nich hanjegote aus Malkj, un aus Kjees mie jeronne loten?

¹¹Met Hut un Fleesch hast du mie bekjleet, un met Knoakes un Sänen mie derchjeflochten.

¹²Läwen un Jnod hast du mie erwesse, un diene Väasorj bewoat mienen Jeist.

¹³Doch soowaut haudst du en dienem Hoaten; ekj weet, daut du dit em Senn haudst:

¹⁴Wan ekj sindijd, soo woascht du mie beoobachten, un von miene Schult mie nich friespräakjen.

¹⁵Wan ekj schuldich wia, wee mie! Un wia ekj jerajcht, soo durf ekj mien Haupt nich erhäwen, saut jeworden von Schaund un mien Älent seenent.

¹⁶Un recht sikj daut nohecht, aus een Leiw woascht du mie joagen, un emma wada diene Wundakrauft aun mie erwiesen.

¹⁷Du woascht diene Zeijen mie jäajenäwa stalen un dien Oaja jäajen mie vemieren, emma wada fresche Häaschoa jäajen mie oppbeeden.

¹⁸Wuarom hast du mie ut däm Muttalief väakomen loten? Ekj wia jestorwen, un kjeen Uag haud mie seenen sullen!

¹⁹Aus wan ekj nich jewast wia, soo haud ekj sennen sullen, vom Muttalief nom Grauf jedroacht worden!

²⁰Sent miene Doag nich weinich? Lot auf, drei die von mie, daut ekj mie een bät oppmunta,

²¹ea ekj hango (un nich wadakom) en daut Launt de Diestanis un daut Doodesschauten,

²²en daut Launt, diesta aus daut Dunkel, daut Launt de Doodesschauten un de Onordninj, un woa daut Dachwoare (Dach) soo aus daut Dunkle (de Nacht) es!