Read De Bibel JHF Hiob 11 Bible Online

Hiob 11 - De Bibel JHF bible

Hiob 11

¹Un Zofar, de Naamatita, auntwuad un säd:

²Sullen de Menj de Wieed nich beauntwuat woaren, ooda sull een Schwauza rajcht haben?

³Sull dien Jeräd de Lied toom stellsennen brinjen, daut du spotten saust, un kjeena die beschämen,

⁴daut du sajen saust: Miene Lia es rein, un ekj sie rein en diene Uagen?

⁵Oba mucht Gott doch räden un siene Leppen jäajen die opmoaken,

⁶un die toweeten loten de Jeheemnise de Weisheit, daut see daut Dobbelde aun Werkjlichkjeit es! Dan must du erkjanen, daut Gott die väl Schult vezeit.

⁷Kaunst du de Deepheit Gottes errieekjen, ooda daut Wäsent vom Aulmajchtjen erkjanen?

⁸Himmelhuach sent see - waut kaust du doonen? Deepa aus de Scheol - waut kaust du weeten?

⁹Lenja aus de Ieed es äare Mot un breeda aus daut Mäa.

¹⁰Wan hee vebietrakjt un jefangen nemt un toom Jerecht vesaumelt, wäa well am dan hindren?

¹¹Dan hee kjant de faulsche Lied; un hee sitt Fräfel, onen daut hee to jäwen brukt.

¹²Uk een holla Kopp jewent Vestaunt, uk aus een Falm vom Wiltäsel aus Mensch jebuaren woat.

¹³Wan du dien Hoat rechten woascht un diene Henj no am utstrakjst, -

¹⁴wan Fräfel en diene Haunt es, soo doo daut wajch, un lot nich Orrajcht en diene Zelten wonen,

¹⁵jo, dan woascht du dien Aunjesecht Fälaloos opphäwen, un woascht faust sennen un die nich ferchten.

¹⁶Dan du woascht de Mieej vejäten, woascht aun an denkjen - aus aun äwaranendet Wota;

¹⁷un dacha aus de Meddach woat dien Läwen entstonen; mucht daut Diesta sennen - aus de Morjen woat daut woaren.

¹⁸Un du woascht Vetruen foten, wiels daut Hopninj jeft; un du woascht die omhäa kjikjen, en Sechaheit die dollajen.

¹⁹Un du woascht die loagren, un kjeena woat die oppschrakjen; un väle woaren diene Gonst sieekjen.

²⁰Oba de Gottloose Uagen woaren veschmachten; un jiedre Tooflucht es an veloaren, un äare Hopninj es daut Utpuste de Seel.