Read De Bibel JHF Hiob 12 Bible Online

Hiob 12 - De Bibel JHF bible

Hiob 12

¹Un Hiob auntwuad un säd:

²Woarhauft, jie sent dee Lied, un met junt woat de Weisheit utstoawe!

³Uk ekj ha Vestaunt aus jie; ekj sie nich jerinja aus jie; un wäa wist nich dautseljen?

⁴Ekj mott eena sennen, dee sienem Frint toom Spott es, dee too Gott roopt, un hee auntwuat am; de Jerajchta, Vollkomna es toom Spott!

⁵Däm Onjlekj foljen Veachtunk no de Jedanken de Sorjloose; see es reed fa dee, dee met däm Foot wanken.

⁶De Zelten de Vewiesta sent en Ru, un Sechaheit es fa dee, dee Gott reizen, fa dän, dee Gott - en siene Haunt fieren {Hab.1,11}.

⁷Oba froag doch daut Vee, un daut woat die lieren; un de Väajel unjrem Himmel, un daut woat die toweeten loten;

⁸ooda räd to de Ieed, un see woat die lieren; un de Fesch em Mäa woaren die daut vetalen.

⁹Wäa erkjant nich aun disem aulem, daut de Haunt Gottes soowaut jemoakt haft,

¹⁰endäm siene Haunt de Seelen von aulem Läwendjen es un de Jeist von aulem menschlichen Fleesch es.

¹¹Proowt nich daut Ua de Wieed, aus de Mulbän fa sikj de Speise schmakjt?

¹²Bie de Jreisen es Weisheit, un Ensecht bie huagem Ella.

¹³Bie am es Weisheit un Macht, sien es Rot un Ensecht.

¹⁴Kjikj, hee ritt dol, un daut woat nich wada jebut; hee schlit äwa eenem too, un daut woat nich opjemoakt.

¹⁵Kjikj, hee helt daut Wota opp, un see drieeje ut; un hee lat an loos, un see vewusten daut Launt.

¹⁶Bie am es Krauft un vollkomnet Weete; siene sent de Errende un de Errefierende.

¹⁷Hee fieet Rotjäwa beraupt (utjetrocken) wajch, un Rechta moakt hee too Noaren.

¹⁸Hee leest de Harschoft de Kjennichs opp, un schlenjt eene Fassel om äare Lenden.

¹⁹Hee fieet Priesta beraupt wajch, un Fauststonende schmitt hee om.

²⁰Toovelotje trakjt hee de Sproak trigj, un Oole nemt hee daut Uadeel.

²¹Veachtunk schedd hee oppe Adelje, un däm Jirtel de Stoakje moakt hee schlaup.

²²Daut Deepe ut de Diestanis dakjt hee op, un Doodesschauten trakjt hee väa aun daut Licht.

²³Hee vejratat Nazionen, un hee venicht an; hee breet Nazionen ut, un hee fieet an wajch.

²⁴Hee nemt vonne Heipta de Velkja de Ieed däm Vestaunt, un lat an omhäa erren enne Wieste onen Wajch;

²⁵see tauste enne Diestanis, woa kjeen Licht es, un hee moakt an omhäa errent aus eenem Bedrunknen.