Read De Bibel JHF Hiob 13 Bible Online

Hiob 13 - De Bibel JHF bible

Hiob 13

¹Kjikj, daut aules haft mien Uag jeseenen, mien Ua jehieet un sikj jemoakjt.

²Soo väl jie weeten, weet uk ekj; ekj sie nich jerinja aus jie.

³Doch toom Aulmajchtjen well ekj räden, un ver Gott mie too rajchtfoadjen wensch ekj;

⁴jie doajäajen sent Läajna, nuschtje Doktasch, jie aula!

⁵Oo daut jie doch stell wieren! Daut wudd junt too Weisheit jeräakjent.

⁶Hieet doch miene Rajchtfoadjunk, un hieet opp de Veteidjunk miene Leppen!

⁷Well jie fa Gott Orrajcht räden, un ver am Läajes räden?

⁸Well jie ver am Partie ennämen? Ooda well jie ver Gott rechten?

⁹Es daut goot fa junt, daut hee junt erforscht? Ooda woa jie am teischen, aus maun eenem Mensch teischt?

¹⁰Strofe woat hee junt, wan jie em Jeheemen de Persoon aunseenen.

¹¹Woat nich siene Huagheit junt erschrakjen, un sien Schrakj opp junt faulen?

¹²June Denkjspricha sent Spricha von Ausch, june Schutzwäa erwiest sikj aus Schutzwäa von Leem.

¹³Siet stell, lot mie, un ekj well räden, waut äwa mie uk komen mucht.

¹⁴Wuarom sull ekj mien Fleesch tweschen miene Tänen nämen, un mien Läwen miene Haunt aunvetruen?

¹⁵Kjikj, moakt hee mie doot, ekj woa opp am hopen, blooss ekj well miene Wäaj ver sienem Aunjesecht rajchtfoadjen.

¹⁶Uk daut woat mie too Radinj sennen, daut een Ruchloosa nich ver sien Aunjesecht komen doaf.

¹⁷Hieet, hieet miene Räd, un miene Erkjläarung drinjt en june Uaren!

¹⁸Kjikj doch, ekj ha de Rajchtsach reedjemoakt! Ekj weet, daut ekj rajcht behoolen woa.

¹⁹Wäa es daut, dee met mie rechten kaun? Dan nu wull ekj stellsennen un vegonen.

²⁰Blooss tweeatlei doo mie nich; dan woa ekj mie nich ver dienem Aunjesecht vestäakjen.

²¹Diene Haunt nemm von mie wajch, un dien Schrakj enjst mie nich.

²²Dan roop, un ekj well auntwuaden, ooda ekj well räden, un du auntwuad mie.

²³Wooväl Misdoten un Sinden ha ekj? Lot mie miene Äwaträdungen un miene Sinden weeten!

²⁴Wuarom vestakjst du dien Aunjesecht, un helst mie fa dienen Fiend?

²⁵West du een looset Blaut wajch schrakjen, un de drieeje Stoppel vefoljen?

²⁶Dan Bätret vehenjst du äwa mie, un latst mie de Misdot miene Jugent oawen;

²⁷un miene Feet lajst du em Stock, un beobachst aule miene Stiej, du jrenst die miene Footsohle en;

²⁸doa ekj doch vefaul aus Vefulnet, aus een Kjleet, daut de Mott vefräten haft.