Read De Bibel JHF Hiob 14 Bible Online

Hiob 14 - De Bibel JHF bible

Hiob 14

¹De Mensch, vonne Fru jebuaren, es kort aun Doag un met Onru saut jemoakt.

²Aus eene Bloom kjemt hee väa un vewalkjt; un hee rant aus de Schauten un haft kjeen Bestaund.

³Dan noch hast du diene Uagen op, un fiescht mie met die em Jerecht!

⁴Woo kunn een Reina ut eenem Onreinen komen? Nich een eensja!

⁵Dan wan siene Doag bestemt sent, de Zol siene Monen bie die sent, wan du am de Jrensen jesat hast, dee hee nich äwaschräden doaf,

⁶soo kjikj von am wajch, daut hee Ru haft, bat hee aus een Doagesleena sienen Dach vollbrinjt.

⁷Dan fa däm Boom jeft daut Hopninj: Woat hee aufjehakt, soo schleit hee wada ut, un siene Auflaja hieren nich opp.

⁸Wan siene Wartlen enne Ieed ella woaren, un sien Staum em Stoff stoaft:

⁹Vom Wotajeroch lat hee wada ut un drift Asta aus een fresch Jeplaunta.

¹⁰Oba de Maun stoaft un licht doa; un de Mensch veschwinjt, un woa es hee?

¹¹Daut veranen de Wota ut daut Mäa, un de Fluss drieecht ut un veschwinjt:

¹²Soo lajcht de Mensch sikj han un steit nich wada opp; bat de Himmel nich mea sent, wakje see nich opp un woaren nich oppjewakjt ut äarem Schlop.

¹³Oo daut du mie en däm Scheol vestopst, mie bedakjst, bat sikj dien Oaja aufdreit, mie eene bestemde Tiet satst un dan aun mie denkjst!

¹⁴(Wan een Maun stoaft, woat hee wada läwen?) Aule Doag von miene Deensttiet wull ekj uthoolen, bat mien Aufleesen kjemt!

¹⁵Du wuddst roopen, un ekj wudd die auntwuaden; du wuddst die bangen nodäm Woakj von diene Henj.

¹⁶Dan nu talst du miene Schräd; woakst du nich äwa miene Sinden?

¹⁷Miene Äwaträdunk es vesäajelt en een Pinjel, un to miene Misdot hast du doatoo jedonen.

¹⁸Un doch, een Boajch felt en, vefelt, un een Fels jeit von siene Städ;

¹⁹Wota veriewe de Steena, äare Streem schwamen däm Stoff de Ieed wajch; oba du moakst de Hopninj de Menschen tonicht.

²⁰Fa emma äwawaultijst du am, un hee jeit doahan; sien Aunjesecht veendat, schekjst du am wajch.

²¹Siene Kjinja komen too Iea, un hee weet daut nich; un see woaren jerinj, un hee acht nich opp an.

²²Blooss om am selfst - haft Weedoag sien Fleesch, un blooss om am selfst - haft Trua siene Seel.