Read De Bibel JHF Hiob 16 Bible Online

Hiob 16 - De Bibel JHF bible

Hiob 16

¹Un Hiob auntwuad un säd:

²Ekj ha väl soowaut jehieet; jie aula sent schwake Treesta!

³Haft daut een Enj met windje Wieed? Ooda waut reizt die, daut du auntwuatst?

⁴Uk ekj kunn räden aus jie. Wan june Seel aun miene Seel äare Städ wia, kunn ekj Wieed jäajen junt tooptale, un mien Haupt äwa junt schedren;

⁵ekj wull junt stoakjen met mienem Mul, un daut Metleet miene Leppen wudd junt Lindrung brinjen.

⁶Wan ekj räd, soo woat miene Weedoag nich weinja; un lot ekj daut, soo jeit see nich von mie.

⁷Jo, hee [Gott] haft mie boolt marood jemoakt; - du hast mien gaunzen Husstaund vewust.

⁸Un du hast mie jepakt, toom Zeichnis woat daut; un mien Älent steit jäajen mie opp, un zeicht mie em Aunjesecht.

⁹Sien Oaja haft mie vefleescht un vefolcht, hee haft met siene Tänen jäajen mie jekjnirscht; aus mien Fiend schoapt hee siene Uagen jäajen mie.

¹⁰Äa Mul ha see jäajen mie opjeräten, met Schellen opp miene Baken jeschloagen; aula toop stoakjen see sikj jäajen mie.

¹¹Gott äwajeef mie däm Onjerajchten, un en de Henj de Gottloose schmitt hee mie.

¹²Ruich wia ekj, un hee haft mie derchjescheddat, un hee pakt mie aum Jenekj un veschmatad mie; un hee stald mie han sikj to eenem Zielpunkt.

¹³Siene Jäajasch omrinjden mie, onen too schoonen spoold hee miene Nieren; hee schedd miene Gaul oppe Ieed.

¹⁴Hee bruak mie derch, Loch opp Loch (aus en eene Mia) hee rand jäajen mie, aus een Held.

¹⁵Ekj ha een Sakduak äwa miene Hut (Haupt) jedakjt, un met Stoff mien Huarn besudelt.

¹⁶Mien Aunjesecht es root vom Hielen, un opp miene Uageläd es de Doodesschauten,

¹⁷wan uk kjeene Jewaultdot en miene Henj, un mien Jebäd rein es.

¹⁸Ieed, bedakj nich mien Bloot, un fa mien Jeschrecht es kjeen Plauz!

¹⁹Soogoa nu, kjikj, em Himmel es mien Zeij, un dee mie Zeichnis jeft, es huach bowen.

²⁰Miene Frind sent miene Spata: No Gott tronen miene Uagen,

²¹daut hee rechtalich entscheiden mucht tweschen däm Maun un Gott, un fa eenen Menschensän un sienem Frint.

²²Dan de bestemden Joaren gonen vebie, un ekj woa eenen Wajch doahan gonen, opp däm ekj nich trigjkomen woa.