Read De Bibel JHF Hiob 17 Bible Online

Hiob 17 - De Bibel JHF bible

Hiob 17

¹Mien Jeist es vetäat, miene Doag erlasche, de Jräwa sent fa mie.

²Sent nich Spata om mie häa, un mott nich mien Uag luaren opp äare Beleidjunk?

³Sat die en, birj fa mie bie die selfst! Wäa es daut sest, dee en miene Haunt ennschlonen woat?

⁴Dan äare Hoaten hast du de Ensecht veschloten; doarom woascht du an nich de Äwahaunt jäwen.

⁵Wan eena de Frind toom Raup aunbeet, soo woaren siene Kjinja äare Uagen veschmachten.

⁶Un hee haft mie hanjestalt toom Sprechwuat de Velkja, un ekj sie toom Aunspiee em Aunjesecht.

⁷Un mien Uag es onkloa jeworden von Kumma, un aus de Schauten sent aule miene Jläda.

⁸De Opprechtje woaren doaräwa ontofräd sennen, un de Schultloosa woat oppjebrocht woaren äwa däm Gottloosen.

⁹Doch de Jerajchta woat aun siene Wäaj fausthoolen, un dee aune Henj reina woat aun Krauft toonämen.

¹⁰Oba jie aula, komt blooss wada noda! Un eenen Weisen woa ekj nich unja junt finjen.

¹¹Miene Doag sent vebie, veräten sent miene Pläne, daut Ieejentum von mienem Hoat.

¹²De Nacht moaken see toom Dach, daut Licht saul dichta sennen aus de Diestanis.

¹³Wan ekj hop, soo es de Scheol mien Hus, enne Diestanis moak ekj mien Loaga.

¹⁴Too Vewäsunk roop ekj: Du best mien Voda! Too de Warm: Miene Mutta un miene Sesta!

¹⁵Aulsoo woa es dan miene Hopninj? Jo, miene Hopninj, wäa woat dee seenen?

¹⁶See foat rauf no de Räajel vom Scheol, wan wie metenaunda em Stoff Ru haben.