Read De Bibel JHF Hiob 18 Bible Online

Hiob 18 - De Bibel JHF bible

Hiob 18

¹Un Bildad, de Schuchita, auntwuad un säd:

²Wanea well jie de Wieed een Enj moaken? Woat Vestendich, un doano well wie räden!

³Wuarom woa wie däm Vee jlikj jeacht, sent domm en june Uagen?

⁴Du, dee sikj selfst veritt en sienem Oaja, saul om dient haulwen de Ieed veloten woaren, un eenen Fels von siene Städ wajchrieten?

⁵Doch daut Licht de Gottloose woat erlasche, un de Flaum von sienem Fia woat nich dachen.

⁶Daut Licht woat diesta en sienem Zelt, un siene Laump jeit äwa am ut.

⁷De Schräd von siene Krauft woaren ennjeenjt woaren, un sien Plon woat am rauf steeten.

⁸Dan derch siene ieejne Feet woat hee em Nat jedräwen, un opp Flajchtwoakj woat hee omhäa gonen.

⁹De Faulstrank woat siene Haken hoolen, de Schlenj am jriepen.

¹⁰Sien Drot es enne Ieed vestoaken, un siene Faul opp däm Stich.

¹¹Rundomm enjst am Schrakj un joagen am opp Schrett un Trett.

¹²Siene Krauft woat vetäat woaren derch Hunga, un daut Vedoawen steit reed aun siene Sied.

¹³De Ieeschtjebuarna vom Doot woat de Jläda von sienem Lief fräten, siene Jläda woat hee fräten.

¹⁴Siene Hopninj woat wajchjeräten woaren ut sienem Zelt, un daut woat am wajchjoagen nodäm Kjennich de Schrakjen.

¹⁵Waut nich sient es, woat en sienem Zelt wonen, opp siene Wonstäd woat Schwäwel jestreit woaren.

¹⁶Unjen woaren siene Wartlen vedrieejen, un bowen woaren siene Asta vewalkje.

¹⁷Sien Jedajchnis veschwinjt von de Ieed, un opp däm Launt haft hee kjeenen Nomen.

¹⁸Maun woat am ut daut Licht en de Diestanis steeten, un am ut de Welt vejoagen.

¹⁹Hee woat kjeenen Sän un kjeen Nokomen ha unja sienem Volkj, noch een Wajchranenda woat en sienem Wonuat sennen.

²⁰Äwa sienem Dach wundren sikj dee em Wasten wonen, un dee em Oosten fot Schuda.

²¹Jo, soo sent de Woninjen de Onjerajchten, un soo es dee äare Städ, dee Gott nich kjant.