Read De Bibel JHF Hiob 2 Bible Online

Hiob 2 - De Bibel JHF bible

Hiob 2

¹Un daut passieed aun eenem Dach, doa kaumen de Säns Gottes, om sikj ver däm Harn too stalen; un uk Soton kaum en äare Medd, om sikj ver däm Harn too stalen.

²Un Gott säd toom Soton: Von wuahäa kjeemst du? Un Soton auntwuad däm Harn un säd: Vom Derchschräden de Ieed un vom omhäa waundlen opp äa.

³Un de Har säd toom Soton: Hast du achtjehaut opp mienem Kjnajcht Hiob? Dan siensjlikjen es kjeen Maun oppe Ieed, vollkomen un rajchtschaufen, Gottesferchtich un omjeit daut Beese; un hee helt noch faust aun siene Vollkomenheit, uk wan du mie jäajen am jereizt hast, am onen Uasoak too veschlinjen.

⁴Un Soton auntwuad däm Harn un säd: Hut om Hut, jo, aules, waut de Mensch haft, jeft hee fa sien Läwen.

⁵Oba strakj eenmol diene Haunt ut un taust sien Kjarpa un sien Fleesch aun, auf hee sikj nich von die, em Aunjesecht, aufsajen woat.

⁶Un Gott säd toom Soton: Kjikj, hee es en diene Haunt; blooss schoon sien Läwen.

⁷Un Soton jinkj vom Aunjesecht Gottes wajch, un hee schluach Hiob met beese Schwäaren, von siene Footsole bat to sienem Schädel.

⁸Un hee naum een Schoawel, om sikj doamet too krautze; un hee saut medden enne Ausch.

⁹Doa säd siene Fru to am: Helst du noch faust aun diene Vollkomenheit? Saj die loos von Gott un stoaw!

¹⁰Un hee säd to ar: Du rädst, aus eene Tooriche räd. Wie sellen daut Goode von Gott aunnämen, un daut Beese sell wie nich uk aunnämen? Bie disem aulem sindijd Hiob nich met siene Leppen.

¹¹Un Hiob siene dree Frind hieeden aul dit Onjlekj, daut äwa am jekomen wia; un see kaumen, een jiedra ut sienem Uat: Elifas, de Temanita, un Bildad, de Schuchita, un Zofar, de Naamathita; un see beräden sikj metenaunda too komen, om am äa Metleet too bewiesen un am to treesten.

¹²Un von wiet hoowen see äare Uagen un erkjanen am nich; doa erhoowen see äare Stemm un hielden, un see vereeten een jiedra siene Kjleeda un streiden Stoff vom himmelhäa opp äare Heipta.

¹³Un see sauten met am oppe Ieed säwen Doag un säwen Nachten lank; un kjeena räd een Wuat to am, dan see sagen, daut siene Weedoag sea groot wieren.