Read De Bibel JHF Hiob 21 Bible Online

Hiob 21 - De Bibel JHF bible

Hiob 21

¹Un Hiob auntwuad un säd:

²Hieet, hieet miene Räd! Un dit wia een Troost fa junt.

³Vedroacht mie, un ekj well räden, un nodäm ekj jerät ha, kaust du spotten.

⁴Recht sikj miene Kloag jäajen eenem Mensch? Ooda wuarom saul ekj nich onjeduldich sennen?

⁵Dreit junt no mie un entsatzt junt, un lajcht de Haunt oppem Mul!

⁶Jo, wan ekj doaraun denkj, soo sie ekj erschrakjt, un Zetren kjemt äwa mien Fleesch.

⁷Wuarom läwen de Gottloose, woaren oolt, nämen aun Macht too?

⁸Äa Somen steit faust ver an, met an, un äare Nokomen ver äare Uagen.

⁹Äare Hiesa ha Fräd, onen Forcht, un Gottes Wäd es nich äwa an.

¹⁰Sien Boll besprinjt un befrucht secha, siene Koo kaulwt un haft kjeene Väljeburt.

¹¹Äare junge Kjinja schekjen see ut aus eene Häad, un äare Junges hupsen omhäa.

¹²See erhäwen de Stemm bie Trompeeten un Hoapen un sent froo biem Fleetenklang.

¹³Em Jlekj vebrinjen see äare Doag, un en eenem Uagenblekj faulen see en däm Scheol.

¹⁴Un doch sajen see too Gott: Go von ons! Un wie velangen nich no de Erkjantnis von diene Wäaj.

¹⁵Waut es de Aulmajchtja, daut wie am deenen sullen, un waut nuzt ons daut, daut wie am (beddent) aunroopen?

¹⁶Kjikj, äa Jlekj steit nich en äare Haunt. De Rot de Gottloose es wiet von mie!

¹⁷Woo foaken passieet daut, daut de Laump de Gottloose utjeit un äa Vedoawen äwa an kjemt, daut hee an Schlenjen toodeelt, en sienem Oaja,

¹⁸daut see aus Stroo woaren ver däm Wint, un aus Sprie, dee de Stormwint wajchfäacht?

¹⁹Gott spoat, saj jie, sien Uadeel fa siene Kjinja. Hee vejelt am, daut hee daut feelt!

²⁰Siene Uagen sellen sien Vedoawen seenen, un von däm Aulmajchtjen sien Jrim mucht hee drinkjen!

²¹Dan waut licht am aun sienem Hus no am, wan de Zol siene Monen toojedeelt es?

²²Kaun maun Gott Erkjantnis lieren, jo, doa hee dee doch es, dee de Hechten recht?

²³Disa stoaft en siene vollen Krauft, gaunz ruich un sorjloos.

²⁴Siene Jefässa sent voll Malkj, un daut Moakjs en siene Knoakes es jedrenkjt.

²⁵Un jana stoaft met ne betre Seel un haft daut Goode nich erjatst.

²⁶Aula toop ligjen see em Stoff, un Warm bedakjen an.

²⁷Kjikj, ekj kjan june Jedanken, un de Aunschläaj, met waut jie mie Jewault aundoonen.

²⁸Dan jie sajen: Wua es daut Hus de Ferschten, un woa daut Wonzelt de Gottloose?

²⁹Ha jie nich befroagt, dee opp disem Wajch vebietrakjen? Un kjan jie äare Tieekjen nich:

³⁰Daut de Beesa veschoont woat aum Dach det Vedoawens, daut aum Zorndach see wajchjeleit woaren?

³¹Wäa woat am em Aunjesecht sienen Wajch toweeten loten? Un haft hee jehaundelt, wäa woat daut am vejelten?

³²Un hee woat no de Jräwa hanjebrocht, un opp däm Graufhupe wacht hee.

³³Seet sent am de Dolkjlieta. Un hinja am häa trakjen aule Menschen, un ver am häa jinjen see onen Zol.

³⁴Woo treest jie mie nu met Donst? Un von june Auntwuaden blift blooss Truloosichkjeit äwa.