Read De Bibel JHF Hiob 22 Bible Online

Hiob 22 - De Bibel JHF bible

Hiob 22

¹Un Elifas, de Temanita, auntwuad un säd:

²Kaun een Maun Gott Nutzen brinjen? Välmea nuzt sikj selfst de Ensechtja.

³Licht daut däm Aulmajchtjen doaraun, wan du jerajcht best, ooda es am daut een Jewenst, wan du diene Wäaj vollkomen moakst?

⁴Es daut wäajen diene Gottesforcht, daut hee die stroft, met die em Jerecht jeit?

⁵Es diene Boosheit nich groot, un diene Misdoten ha kjeen Enj?

⁶Dan du nemst Jewenst von dienem Brooda onen Uasoak, un du trockst de Noaktje de Kjleeda ut;

⁷däm Darschtjen drenkjst du nich met Wota, un däm Hungajen jeefst du daut Broot nich.

⁸Un däm Maun de Jewault, am jehieet daut Launt, un de Aunjeseena wond doabennen.

⁹De Wätfru schekjst du ladich wajch, un de Oarms de Weisen worden veschloagen.

¹⁰Doarom sent Schlenjen runtom die häa, un een plazlicha Schrakj moakt die enjstlich.

¹¹Ooda sitst du nich de Diestanis un de Wotastreem, dee die bedakjen?

¹²Es Gott nich soo huach aus de Himmel? See doch de Spetz vonne Stierns, woo huach see sent!

¹³Un soo sajchst du: Waut sull Gott weeten? Kaun hee derch dunkle Wolkjen rechten?

¹⁴De Wolkjen sent am een Vedakj, daut hee nich sitt, un hee derchwaundelt däm Himmelskjreiss.

¹⁵West du däm Stich de Väatiet ennhoolen, däm de Fräfla jegonen sent,

¹⁶dee vere Tiet wajchjeropt worden? Aus een Stroom verand äa fausta Grunt;

¹⁷dee too Gott säden: Go von ons wajch! Un waut kunn de Aulmajchtja fa ons doonen?

¹⁸Un doch haud hee äare Hiesa met Goodem jefällt. Oba de Rot de Gottloose es wiet auf von mie!

¹⁹De Jerajchten seenen daut un freien sikj, un de Schultloosa spott äwa an:

²⁰"Sent nich onse Jäajna vetilcht, un haft nich Fia äa Äwafluss jefräten!"

²¹Vedroag die doch met am un hool Fräd; doaderch woat Goodet äwa die komen.

²²Nemm doch Belierunk ut sienem Mul aun, un nemm die siene Wieed too Hoaten.

²³Wan du nom Aulmajchtjen trigjkjeemst, soo woascht du wada oppjebut woaren; wan du orrajcht wajchdeist ut diene Zelten.

²⁴Un laj daut Golt en däm Stoff to de Steena de Bäjche von Ofir;

²⁵soo woat Gott de Aulmajchtja dien Golt un blanket Selwa sennen.

²⁶Dan woascht du die aun däm Aulmajchtjen erjatsen un no Gott dien Aunjesecht opphäwen.

²⁷Du woascht to am bäden, un hee woat die erhieren; un dien Vespräakjen woascht du betolen.

²⁸Beschlitst du eene Sach, soo woat see tostaund komen, un Licht woat opp diene Wäaj schienen.

²⁹Wan see raufgonen, soo woascht du sajen: Nohecht! Un däm, dee met jesenkjte Uagen omhäa jeit, woat hee raden.

³⁰Selfst däm Onschuldjen woat hee frie moaken: Hee woat frie woaren derch de Reinheit diene Henj.