Read De Bibel JHF Hiob 24 Bible Online

Hiob 24 - De Bibel JHF bible

Hiob 24

¹Wuarom sent nich Tieden [toom Jerecht] toopjespoat vom Aulmajchtjen, un wuarom seenen dee, dee am kjanen, siene Doag nich?

²See veschuwe de Jrensen, see roowen de Häad un weiden an.

³See joagen däm Äsel vonne Weise wajch, nämen daut Rind de Wätfrues aus Auntolinj;

⁴see steeten de Oame vom Wajch. De Älentje em Launt vestäakjen sikj aula toop:

⁵Kjikj, aus de Wiltäsel enne Wieste gonen see aun äa Woakj ut, tiedich no Raup too sieekjen; de Stap jeft an Broot fa de Kjinja.

⁶Oppem Flekj schnieden see sien Fooda auf un läsen däm Wienboajch von Gottloosen no.

⁷Noaktich äwanachten see, onen Kjleeda, un ha kjeene Dakj enne Kold.

⁸Vom Plauzräajen de Boaj woaren see naut, un obdachsloos omklaumre see de Felse.

⁹See rieten de Weis vonne Brost, un waut de Älenta aunhaft, nämen see aus Auntolinj.

¹⁰Noaktich gonen see omhäa, onen Kjleeda, un hungrich droagen see de Goawen;

¹¹tweschen äare Mia prasse see Eelj, klunjen de Wienprass un darschten.

¹²Von de Staut häa stänen de Stoawenden, un de Seelen de Jeschloagnen schrieen. Un Gott räakjent daut nich aus Orrajcht aun.

¹³Jane jehieren to de Fiend vom Licht, see kjanen siene Wäaj nich un bliewen nich opp siene Stiej.

¹⁴Met daut Licht steit de Merda opp, moakt däm Älenden un däm Oamen doot; un de Nacht es hee aus een Deef.

¹⁵Un de Uagen de Ehebräakja luaren opp de Dunkelheit, endäm hee sajcht: Kjeen Uag woat mie seenen; un hee lajcht eenen Schleia aun.

¹⁶En de Diestanis brakjt maun en de Hiesa en. Äwadach schluten see sikj en, daut Licht kjanen see nich.

¹⁷Dan de Morjen es an aula toop de Doodesschauten, dan een jiedra von an es bekaunt met däm Schrakj vom Doodesschauten.

¹⁸Hee es schwind opp däm Wota, veflucht woat äa Akastekj oppe Ieed; hee schleit nich mea däm Wajch toom Wienboajch en.

¹⁹Drieeje Tieden un Hett roopen daut Schneewota wajch: Soo de Scheol, dee jesindicht ha.

²⁰Daut Muttalief vejat am, de Warm freien sikj äwa am, aun am woat nich mea jedocht: Un daut Orrajcht woat vebroaken aus een Boom,

²¹hee, dee de Onfruchtboare berooft, dee nich jebäaren kaun, un de Wätfrues kjeen Goodet deit.

²²Un Majchtje roopt hee [Gott] doahan derch siene Krauft; hee [de Gottloosa] steit opp, wan hee uk aum Läwen vetwiewelt.

²³Gott jeft am Sechaheit, un hee woat raufjeschmäten. Oba siene Uagen sent äwa äare Wäaj.

²⁴See sent huach jestäajen: Om een Kjlienet, un see sent nich mea; un see sinkjen han, woaren toopjeroopt aus aule aundre; un aus de Kopp vonne Oaren woaren see aufjeschnäden.

²⁵Un wan daut nich soo es, wäa woat miene Läajes strofen un miene Räd tonicht moaken?