Read De Bibel JHF Hiob 27 Bible Online

Hiob 27 - De Bibel JHF bible

Hiob 27

¹Un Hiob jinkj wieda, met siene Spricha, un säd:

²Soo woa Gott läft, dee mie mien Rajcht nemt, un de Aulmajchtja, dee miene Seel betta jemoakt haft,

³soo lang mien Odem en mie es, un de Frodem Gottes en miene Näs:

⁴Wan miene Leppen Orrajcht räden woaren, un wan miene Tung Droch utsaje woat!

⁵Daut es wiet von mie, daut ekj junt rajcht jäwen sull; bat ekj stoaw, woa ekj miene Oschult nich von mie gonen loten.

⁶Aun miene Jerajchtichkjeit hool ekj faust un woa dee nich foaren loten: Mien Hoat vekloacht nich eenen von miene Doag.

⁷Mien Fiend es aus de Gottloosa, un dee jäajen mie oppsteit aus de Onjerajchta.

⁸Dan waut es de Ruchloose äare Hopninj, wan Gott aufschnit, wan hee siene Seel rutnämt?

⁹Woat Gott sien Schrieen hieren, wan Bedrenkjnis äwa am kjemt?

¹⁰Ooda woat hee sikj aun däm Aulmajchtjen erjatsen, Gott too aula Tiet aunroopen?

¹¹Ekj well junt belieren äwa de Haunt Gottes; waut bie däm Aulmajchtjen es, well ekj nich veheimliche.

¹²Kjikj, jie aula ha daut selfst jeseenen, un wuarom dan schwautz jie soo onnutzjet?

¹³Dit es daut Deel de gottloose Menschen bie Gott, un daut Oawgoot de Jewault doonende, daut see von däm Aulmajchtjen jekjräajen ha:

¹⁴Wan siene Kjinja sikj vemieren, soo es daut fa daut Schwieet, un siene Auflaja ha nich Broot om saut toowoare.

¹⁵Siene Äwajebläwne woaren begroft derch däm Doot, un siene Wätfrues hielen nich {Ps.78,64}.

¹⁶Wan hee Selwa toopsaumlt aus Stoff, un Kjleeda reedmoakt aus Leem:

¹⁷Hee moakt an reed, oba de Jerajchta bekjleet sikj doamet; un Schultloose deelen sikj daut Selwa.

¹⁸Hee haft sien Hus jebut aus de Mott, un aus een Zelt, dee een Wajchta sikj moakt.

¹⁹Rikj lajcht hee sikj han, un hee deit daut nich wada; hee moakt de Uagen op, un es nich mea.

²⁰Schrakj äwafelt am aus Wota, de Nacht fieet am em Stormwint wajch.

²¹De Oostwint häft am nohecht, daut hee doahan foat, un drift am wajch von siene Städ.

²²Un Gott [hee] schliesat opp am onen Schooninj; von siene Haunt mucht hee ranen.

²³Maun klautscht äwa am enne Henj, un zischt am no - von siene Städ ut.