Read De Bibel JHF Hiob 28 Bible Online

Hiob 28 - De Bibel JHF bible

Hiob 28

¹Dan fa daut Selwa jeft daut een Funduat, un eene Städ fa daut Golt, daut maun reinicht.

²Iesa woat ut de Ieed jeholt, un Steen schmelt maun too Koppa.

³Hee [de Mensch] haft de Diestanis een Enj jemoakt, un derchforscht bat aune butaschte Jrens de Steena de Diestanis un de Doodesschauten.

⁴Hee brakjt eenen Schacht wiet von däm Wonenden; dee vom Vejätnen Foot rauf henjen, wietauf von de Menschen schwäwe see.

⁵De Ieed, - ut äa kjemt Broot väa, un äa Unjaschtet woat veweelt aus vom Fia.

⁶Äa Jesteen es de Uat von Safier, un Goltstoff es doabennen.

⁷Eenen Stich, däm de Raupvoagel nich kjant, un däm daut Hofkjeuag nich jeseenen haft;

⁸däm de wille Tieren nich bestieen, un äwa däm de Leiw nich jegonen es.

⁹Hee [de Mensch] lajcht siene Haunt aun daut hoade Jesteen, weelt de Boaj om - von de Wartel aun.

¹⁰Jenj schleit hee derch de Felse, un aulalei Kostboaret sitt sien Uag.

¹¹Hee jrenst daut Wota en, daut see nich veranen, un Vestoaknet brinjt hee väa aun daut Licht.

¹²Oba de Weisheit, woa woat see jefungen? Un woa es de Städ vom Vestentnis?

¹³Kjeen Mensch kjant äarem Wieet, un em Launt de Läwendje woat see nich jefungen.

¹⁴Daut Deepe sajcht: See es nich en mie, un daut Mäa sajcht: See es nich bie mie.

¹⁵Jereinichtet Golt kaun nich fa ar jejäft, un Selwa nich aus äa Pries aufjewoage woaren.

¹⁶See woat nich aufjewoage met Golt von Ofir, met kostboarem Onniks un Safier.

¹⁷Golt un Glauss kaun maun met ar nich vejlikjen, noch enntuschen jäajen Jereetschoft von reinem Golt.

¹⁸Korale un Kristal acht maun jäajen an nich; un de Ieejentum von Weisheit es mea wieet aus Parlen.

¹⁹Topas von Kusch kaun maun nich met ar jlikjstalen; met fienem Golt woat see nich aufjewoage.

²⁰De Weisheit wuahäa kjemt see, un woa es de Städ vom Vestentnis?

²¹Dan see es ver de Uagen aule Läwendje veborje, un ver de Himmelsväajel vestoaken.

²²De Aufgrunt un de Doot sajen: Met onse Uaren ha wie een Jeräd von ar jehieet.

²³Gott vesteit äarem Wajch, un hee kjant äare Städ.

²⁴Dan hee sitt de Enj de Ieed; unja däm gaunzen Himmel sitt hee.

²⁵Aus hee däm Wint een Jewicht bestemd, un daut Wota met däm Mot faust sad.

²⁶Aus hee däm Räajen een Jesaz bestemd un eenen Wajch däm Donnastrol;

²⁷doa sach hee an un deed an to weeten, hee sad an en un derchforscht uk an.

²⁸Un toom Mensch säd hee: Kjikj, de Angst fa däm Harn es Weisheit, un vom Beesen ranen es Vestaunt.