Read De Bibel JHF Hiob 29 Bible Online

Hiob 29 - De Bibel JHF bible

Hiob 29

¹Un Hiob jinkj wieda, met siene Spricha, un säd:

²Oo daut ekj wia aus en de frieejoasche Tieden, aus en de Doag, doa Gott mie bewoad,

³aus sien Licht äwa mienem Haupt schiend, un ekj bie sienem Licht derch de Diestanis jinkj;

⁴aus en miene Hoafstdoag (mienem Riep woaren), aus daut Vetruen Gottes äwa mienem Zelt wia,

⁵aus de Aulmajchtja noch met mie wia, miene Jinjlinje om mie häa;

⁶aus miene Schräd sikj en Malkj boden, un de Fels bie mie Eelj Bäjcha [Streem] goot;

⁷aus ekj derch daut Dooa en de Staut nenn jinkj, mien Sett opp däm Plauz oppstalld:

⁸De Jinjlinje sagen mie un vestoppten sikj, un de Jreisen erhoowen sikj, bleewen stonen;

⁹de Ferschten hilden de Wieed trigj un läden de Henj opp äarem Mul;

¹⁰de Stemm de Väanämen wort stomm, un äare Tung backt aun äarem Mulbän.

¹¹Dan wan daut Ua von mie hieed, soo muak mie daut jlekjlich, un wan daut Uag mie sach, soo läd daut Zeichnis von mie auf.

¹²Dan ekj muak däm Älenden frie, dee om Help roopt, un de Weis, dee kjeenen Helpa haud.

¹³De Säajen de Unjagonende kaum äwa mie, un daut Hoat de Wätfrues muak ekj froo.

¹⁴Ekj kjleed mie en Jerajchtichkjeit, - un see bekjleede mie - aus een Bowakjleet un Koppbaunt mien Rajcht.

¹⁵Däm Blinjen wia ekj daut Uag, un Foot däm Lomen;

¹⁶däm Oamen wia ekj aus Voda, un de Rajchtsach dän, däm ekj nich kjand, unjasocht ekj;

¹⁷un ekj vebruak daut Jebiss de Ojjerajchte, un ut siene Tänen reet ekj däm Raup.

¹⁸Un ekj säd: En mienem Nast woa ekj doahan gonen, un miene Doag vemieren sikj aus de Saunt;

¹⁹miene Wartel woat utjebreet sennen aum Wota, un de Deiw woat äwanachten opp miene Asta;

²⁰miene Iea woat bie mie fresch bliewen, un mien Boagen en miene Haunt jung woaren.

²¹See hieeden mie too un luaden, un hieeden stell opp mienen Rot.

²²No mienem Wuat räden see nich wieda, un miene Räd dreppld opp an.

²³Un see luaden opp mie aus opp däm Räajen, un muaken äa Mul op aus nodäm loten Räajen.

²⁴Ekj lacht an too, wan see kjeen vetruen hauden, un daut Licht von mienem Aunjesecht kunnen see nich vedunklen.

²⁵Ekj wäld fa an däm Wajch ut, un saut aus Haupt, un troond aus een Kjennich unja de Kjrichsschoa, soo aus eena, dee Truarende treest.