Read De Bibel JHF Hiob 3 Bible Online

Hiob 3 - De Bibel JHF bible

Hiob 3

¹Nodäm deed Hiob sien Mul op un veflucht sienen Dach.

²Un Hiob auntwuad un säd:

³Daut veschwinj de Dach, aun däm ekj jebuaren wort, un de Nacht, dee doa säd: Een Jung es emfangen!

⁴Jan Dach es Diestanis! Gott von doa bowen frajcht nich no am, un de Lichtglauns schient nich äwa am!

⁵Diestanis un Doodesschauten muchten am ennleesen, Wolkjen loagren äwa am, daut schrakjen am dunkle Doag!

⁶Jane Nacht - Dunkel jript ar! See freit sikj nich unja de joares Doag, enne Zol de Moonaten kjemt see nich!

⁷Kjikj, jane Nacht es onfruchtboa, daut kjemt kjeen Jubel en ar nenn!

⁸Vewensche muchten ar dee däm Dach vefluchen, dee emstaunt sent, däm Leviatan too reizen!

⁹Diesta sent de Stierns en äarem Schemma; see hopen opp Licht, un doa es kjeent; un see seenen nich äare Lost aun de Ziepasch de Morjeroote!

¹⁰Dan see haft de Däa von miene Muttaschoot nich veschloten un Älent nich veborjen ver miene Uagen.

¹¹Wuarom storf ekj nich vom Muttalief aun, kaum ut de Schoot väa un vejinkj?

¹²Wuarom kaumen mie de Kjnee entjäajen, un toowaut de Brosten, dee ekj suach?

¹³Dan nu wudd ekj ligjen un wia ruich, ekj wudd schlopen: Dan haud ekj Ru,

¹⁴met Kjennichs un Rotjäwa de Ieed, dee sikj Graufkomasch buen,

¹⁵ooda met Ferschten, dee Golt hauden, dee äare Hiesa met Selwa felden;

¹⁶ooda, aus eene vestoakne Fäljeburt, wia ekj nich doa, aus Kjinja, dee daut Licht nich jeseenen ha.

¹⁷Doa loten de Gottloose auf vom Toobe, un doa ruen de Meedjewordne aun Krauft,

¹⁸ruen de Jefangne aula toop, un hieren nich däm Bedrenja siene Stemm.

¹⁹De Kjliene un de Groote, doa sent see jlikj, un de Kjnajcht es frie von sienem Har.

²⁰Wuarom jeft hee däm Älenden Licht, un dän Läwen, dee enne Seel vebettat sent;

²¹dee opp däm Doot luaren, un hee es nich doa, un dee no am growe, mea aus no vestoaknem Schauz;

²²dee sikj bat toom Jubel freien, Freid ha, wan see daut Grauf finjen;

²³däm Maun, däm sien Wajch veborjen es, un däm Gott runtom enjeschloten haft?

²⁴Dan soo aus mien Broot kjemt mien Seften, un aus Wota vejit sikj mien Jestän.

²⁵Dan ekj fercht eenen Schrakj, un hee traft mie, un ver däm ekj mie enjst, daut kaum äwa mie.

²⁶Ekj wia nich ruich, un ekj erhoold mie nich un rud nich, doa kaum daut Toobe.