Read De Bibel JHF Hiob 30 Bible Online

Hiob 30 - De Bibel JHF bible

Hiob 30

¹Un nu lachen äwa mie de jinja aun Doag sent aus ekj, dän äare Vodasch ekj veacht, de Hunj von miene Häad bietotale.

²Toowaut sull mie uk de Krauft äare Henj nutzen? De Jugentkrauft es bie an veschwungen.

³Derch Mangel un Hunga aufjemoagat, see gnoage daut drieeje Launt auf, daut lenjst vewust un utjedrieecht es;

⁴see plekjen Soltkrut bie däm Struck, un de Wartlen de Jinsta es äare Speise.

⁵Ut de Menschen Medd woaren see vejoacht; maun schricht äwa an aus äwa eenen Deef.

⁶En grausome Kluften motten see wonen, en Ieedlajcha un Felsheele.

⁷Tweschen däm Struck schrieen see, unja Hachelstruck sent see hanjestrakjt.

⁸Kjinja von Veschmätne, jo, Kjinja von Nomeloose, sent see ut däm Launt rutjejoacht!

⁹Un nu sie ekj äa Spottleet jeworden, un an toom Jeräd jeworden.

¹⁰See äakjlen sikj äwa mie, gonen von mie wajch, un see veschoonen mien Aunjesecht nich met Kjwiel.

¹¹Dan hee haft mien Strank jeleest un mie jeboagen; soo loten see ver mie däm Täajel schluten.

¹²Too miene Rajchten erhäft sikj daut Broodsel; see steeten miene Feet wajch un moaken jäajen mie äare vedoawens Wäaj reed.

¹³See rieten mienem Stich opp, wellen mienen Unjagank, see, dee selfst onen Help sent.

¹⁴See komen aus derch eene breede Rets, unja Onwada schmieten see sikj aun mie.

¹⁵Schrakjnise ha sikj jäajen mie jedreit; see vefoljen aus de Wint mien Odel, un mien Heil es vebie jetrocken aus eene Wolkj.

¹⁶Un nu jitt sikj en mie miene Seel ut; Älentsdoag ha mie jejräpen.

¹⁷De Nacht derchboat miene Knoakes un leest an von mie auf, un dee aun mie gnoagende Weedoag ruen nich.

¹⁸Derch äare groote Krauft veendat see mien Kjleet, daut ommschlit mie aus de Haulssoom von mienem Liefrock.

¹⁹Hee haft mie em Drakj jeschmäten, un ekj sie soo aus de Stoff un Ausch jeworden.

²⁰Ekj schriee to die, un du auntwuadst mie nich; ekj sto doa, un du kjikjst mie stiew aun.

²¹Un du vewaundelst die ver mie to eenem Grausomen, met diene stoakje Haunt best du mie fientlich ennjestalt.

²²Du häwst mie opp däm Wint nohecht, du latst mie doahan foaren un veranen em Stormjetees.

²³Dan ekj weet daut, du west mie en däm Doot trigj fieren un en daut Vesaumlungshus aule Läwendje.

²⁴Doch strakjt maun biem Faul nich de Haunt ut, ooda erhäft maun bie sienem Unjagank doaropp nich een Jeschrecht om Help?

²⁵Hield ekj dan nich äwa däm, dee hoade Doag haud? Wia miene Seel nich om däm Oamen bekjemmat?

²⁶Dan ekj luad opp Goodet, un daut kaum Beeset; un ekj luad opp Licht, un daut kaum Diestanis.

²⁷Mien Ennalichet es derchenaunda un rut nich; Älentsdoag sent mie entjäajen jekomen.

²⁸Truarich go ekj omhäa, onen Sonn; ekj sto enne Vesaumlunk opp un schriee.

²⁹Ekj sie de Schakale een Brooda jeworden, un een Frint de Strausse.

³⁰Miene Hut es schwoat jeworden un leest sikj von mie auf, un miene Knoakes sent vonne Hett vebrent.

³¹Un soo es miene Hoap too Truakloag jeworden, un miene Fleet to eenem Hielenden siene Stemm.