Read De Bibel JHF Hiob 32 Bible Online

Hiob 32 - De Bibel JHF bible

Hiob 32

¹Un jane 3 Mana hieeden opp, däm Hiob too auntwuaden, wiels hee en siene Uagen jerajcht wia.

²Doa flaumd de Oaja Elihus opp, däm Sän Barakeel, däm Busita, vom Jeschlajcht Ram; sien Oaja entflaumd jäajen Hiob, wiels hee sikj selfst mea rajchtfoadijd aus Gott.

³Un sien Oaja entflaumd jäajen siene dree Frind, doarom, daut see kjeene Auntwuat fungen un Hiob vedaumden.

⁴Oba Elihu luad met Räden opp Hiob, wiels jane ella aun Joaren wieren aus hee.

⁵Un aus Elihu sach, daut kjeene Auntwuat en däm Mul dee 3 Mana wia, doa brend sien Oaja opp.

⁶Un Elihu, de Sän Barakeels, de Busita, auntwuad un säd: Ekj sie jung aun Joaren, un jie sent Jreisen; doarom ha ekj mie jeschuet un jeenjst, junt mien Weete toweeten loten.

⁷Ekj säd: Muchten de Doag räden, un de Menj de Joaren Weisheit vekjindjen.

⁸Un doch es daut de Jeist enne Menschen, un de Odem det Aulmajchtjen, dee an vestendich moakt.

⁹Nich de Bejoade sent weis, noch vestonen de Oole, waut rajcht es.

¹⁰Doarom saj ekj: Hea mie too, uk ekj well mien Weete toweeten loten.

¹¹Kjikj, ekj ha opp june Räd jeluat, ekj hieed opp june Ensecht, bat jie de rechtje Wieed jefungen hauden,

¹²un ekj recht miene Oppmoakjsomkjeit opp junt; un kjikj, kjeena es unja junt, dee Hiob trajchtwees, dee siene Räd beauntwuat haft.

¹³Daut jie nich sajen: Wie ha Weisheit jefungen. Gott woat am ut däm Flekj schlonen, nich een Mensch!

¹⁴Jo, hee haft jäajen mie kjeene Wieed jerecht, un met june Räd woa ekj am nich wadaräde.

¹⁵See sent vewert, see auntwuaden nich mea, de Wieed sent an utjegonen.

¹⁶Un ekj sull wachten, wiels see nich räden, wiels see doa stonen, nich mea auntwuaden?

¹⁷Uk ekj well mien Deel wadaräden, uk ekj well mien Weeten toweeten loten.

¹⁸Dan ekj sie voll Wieed; mien ennalicha Jeist drenjt mie.

¹⁹Kjikj, mien Ennalichet es aus (junga) Wien, dee nich opjemoakt es; de niee Schläaj well hee sprenjen (verieten).

²⁰Ekj well räden, daut ekj mie Loft moak, well miene Leppen opmoaken un auntwuaden.

²¹Daut ekj blooss fa kjeenem Partie näm! Un ekj woa kjeenem Mensch schmeichlen.

²²Dan ekj weet nich too schmeichlen: Goa boolt wudd mien Erschaufa mie wajchnämen.