Read De Bibel JHF Hiob 35 Bible Online

Hiob 35 - De Bibel JHF bible

Hiob 35

¹Un Elihu jinkj wieda un säd:

²Helst du daut fa rajcht? Du hast jesajcht: Miene Jerajchtichkjeit es jrata aus Gott siene.

³Dan du frajchst, waut see die nuzt; waut jewenn ekj mea, aus wan ekj jesindicht haud?

⁴Ekj well die met Wieed wadaräde un diene Frind met die.

⁵Kjikj nom Himmel un besee, un kjikj de Wolkjen aun, - see sent hecha aus du.

⁶Wan du sindichst, waut deist du am aun? Un vemeascht du diene Äwaträdungen, waut kaust du am doonen?

⁷Wan du jerajcht best, waut jeffst du am, ooda waut kjricht hee ut diene Haunt?

⁸Fa eenen Maun aus du jelt diene Jesazloosichkjeit waut, un fa een Menschenkjint diene Jerajchtichkjeit.

⁹Wäajen de väle Bedrekjungen schricht maun; maun roopt om Help wäajen däm Oarm de Grooten.

¹⁰Oba maun sajcht nich: Wua es Gott, mien Erschaufa, dee Jesank jeft enne Nacht,

¹¹dee ons mea belieet aus de Tieren oppe Ieed, un ons weisa moakt aus de Väajel unjrem Himmel?

¹²Dan schricht maun, wäajen däm Huachmoot de Beese, oba hee auntwuat nich.

¹³Gott hieet blooss nich opp Iedlet, un de Aulmajchtja kjikjt daut nich aun.

¹⁴Wan du uk sajchst, du sitst am nich - Rajchtsach es ver am; soo hop opp am.

¹⁵Un nu, wan sien Oaja nich jestroft haft, sull hee nich von däm Äwamoot weeten?

¹⁶Un soo moakt Hiob emsonst sien Mul op, saumelt Wieed onen Erkjantnis.