Read De Bibel JHF Hiob 38 Bible Online

Hiob 38 - De Bibel JHF bible

Hiob 38

¹Un de Har auntwuad Hiob ut däm Storm un säd:

²Wäa es daut, dee däm Rot vedunkelt met Wieed onen Erkjantnis?

³Ombinj doch diene Lenden aus een Maun; soo well ekj die froagen, un du belia mie!

⁴Woa wieescht du, aus ekj de Ieed jrind? Saj daut, wan du Ensecht besettst!

⁵Wäa haft äare Mot bestemt, wan du daut weetst? Ooda wäa haft äwa ar de Motschnua jetrocken?

⁶Opp waut worden äare Gruntfausten nenn jesenkjt?

⁷Ooda wäa haft äa Akjsteen jelajcht, aus de Morjestearns metenaunda juchte un aule Säns Gottes jubelde?

⁸Un wäa haft daut Mäa met Dooasch veschloten, aus daut utbruak, väakaum ut däm Muttaschoot,

⁹aus ekj Wolkjen too sienem Kjleet un dunkle Wolkjen to siene Winjlen muak,

¹⁰un ekj am miene Jrensen bestemd un Rijel un Dooasch sad,

¹¹un säd: Bat hiahäa saust du komen un nich wieda, un hia es eene Jrens jesat fa diene stolten Walle?

¹²Hast du, soo lang du läfst, eenem Morjenroot befoolen? Hast du däm Morjenroot äare Städ weeten loten,

¹³daut see de Akjen de Ieed foten, un de Gottloose von ar vejoacht woaren?

¹⁴See vewaundelt sikj aus Säajelleem, un aules steit doa aus en eenem Kjleet;

¹⁵un de Gottloose woat äa Licht jenomen, un de oppjehowna Oarm woat vebräakjen.

¹⁶Best du bat de Kjwalen vom Mäa jekomen, un hast du däm deepen Grunt derchwaundat?

¹⁷Worden die de Dooasch vom Doot opjemoakt, un sachst du de Dooasch vom Doodesschauten?

¹⁸Hast du ensecht jenomen enne breede Ieed? Saj aun, wan du daut aules weetst!

¹⁹Woont es de Wajch no de Wonunk vom Licht, un de Diestanis, woa es äare Städ? -

²⁰Daut du an hanbrinjst no äare Jrensen, un daut du de Stich no äarem Hus kjanst.

²¹Jo, du weetst daut; dan too jane Tiet wordst du jebuaren, un de Zol diene Doag es groot!

²²Best du nodäm Väarot vom Schnee jekomen, un hast du däm Väarot vom Hoagel jeseenen,

²³dee ekj toopjespoat ha fa de bedrenjnis Tiet, fa däm Kaumf un Schlachtdach?

²⁴Woont es de Wajch, opp däm daut Licht sikj vedeelt, de Oostwint sikj äwa de Ieed vebreet?

²⁵Wäa deeld de Räajenstreem en Ranbonen un eenen Wajch däm Donnastrol,

²⁶om räajnen to loten opp een Launt onen Menschen, opp de Wieste, doa kjeen Mensch es,

²⁷om saut too moaken daut Drieeje un Vedräjde, un, om daut Grauss utloten kaun?

²⁸Haft de Räajen eenen Voda, ooda wäa moakt de Dreppen vom Deiw?

²⁹Ut wäms Schoot kjemt daut Ies häa, un de Riep vom Himmel, wäa haft däm jebuaren?

³⁰Daut Wota woat faust aus Steen, un de bowaschte Schicht deit sikj toop.

³¹Kaunst du daut Säwenjestärn binjen, ooda de Faslen vom Orion leesen?

³²Kaunst du de Bilda vom Tiakjreiss to siene Tiet väakomen loten, un däm groote Boa met siene Kjinja leiden?

³³Kjanst du de Himmels Jesazen, ooda bestemmst du siene Harschoft äwa de Ieed?

³⁴Kaunst du diene Stemm no de Wolkjen opphäwen, daut eene Wota Menj die bedakjt?

³⁵Kaunst du Blitz utschekjen, daut see hanfoaren, daut see to die sajen: Hia sent wie?

³⁶Wäa haft Weisheit enne Nieren jelajcht, ooda wäa haft däm Jeist Vestaunt jejäft?

³⁷Wäa talt de Wolkjen met Weisheit, un de Himmelsschläaj, wäa jitt an ut,

³⁸wan de Stoff too eenem hoaden Stekj tooprant un de Kjlieta aun eenaunda kjleewen?

³⁹Jajchst du de Muttaleiw däm Raup, un stellst du de Jia de junge Leiws,

⁴⁰wan see enne Heel ligjen, un enne Bescha oppe Lua setten?

⁴¹Wäa moakt de Krauj äare Speise reed, wan siene Junge too Gott schrieen, omhäa erren onen Noarinj?