Read De Bibel JHF Hiob 4 Bible Online

Hiob 4 - De Bibel JHF bible

Hiob 4

¹Un Elifas, de Temanita, auntwuad un säd:

²Wan maun vesieekjt een Wuat aun die too rechten, woat daut die vedrisslich moaken? Doch de Wieed trigjtohoolen, wäa kaun daut?

³Kjikj, du hast väle trajchtjewäsen, un enjeschlopne Henj hast du jestoakjt;

⁴däm Twiewelnden rechten diene Wieed opp, un sinkjende Kjnee hast du faust jemoakt.

⁵Doch nu kjemt daut aun die, un daut moakt die vedrisslich; daut errieekjt die, un du best bedrekjt.

⁶Es nich diene Gottesfercht dien Toovetruen, de Vollkomenheit diene Wäaj diene Hopninj?

⁷Jedenkj doch: Wäa es aus Onschuldja omjekomen, un wua sent Rajchtschaufne vetilcht worden?

⁸Soo aus ekj daut jeseenen ha: Dee Onheil plieejen un Onjlekj seien, arnten daut.

⁹Derch däm Odem Gottes komen see om, un derch däm Frodem ut siene Näs vegonen see.

¹⁰Daut Brelle de Leiws un de brellende Stemm sent stell jeworden, un de Tänen de junge Leiws sent utjebroaken;

¹¹de Leiw kjemt ut Mangel aun Raup, un de Junge de Muttaleiw woaren vestreit.

¹²Un no mie kjeem een heimlichet Wuat, un mien Ua venaum een Fuschle doavon.

¹³En Jedanken, dee de Nachtjesechta väakomen loten, wan deepa Schlop de Menschen befält,

¹⁴kjeem Schrakj äwa mie un Bäben, un aule miene Knoakes scheddaden derch;

¹⁵un een Jeist trock ver mienem Aunjesecht vebie, daut Hoa opp mienem Lief stald sikj opp.

¹⁶Daut stunt doa, un ekj erkjand sien Aunjesecht nich; een Bilt wia ver miene Uagen, een Jeruzh un eene Stemm hieed ekj:

¹⁷Sull een Mensch jerajchta sennen aus Gott, ooda een Maun reina aus dee am jemoakt haft?

¹⁸Kjikj, opp siene Kjnajchts vetrut hee nich, un siene Enjel lajcht hee Errtum too Laust:

¹⁹Wooväl mea dän, dee en Leemhiesa wonen, dän äa Grunt em Stoff es! Aus Motten woaren see veklunjt.

²⁰Von Zemorjes bat Oppenowent woaren see veschmatat; onen daut maun an beacht, see komen opp eewich om.

²¹Es daut nich soo? Woat äa Zeltstrang aun an wajchjeräten, soo stoawen see, un nich en Weisheit.