Read De Bibel JHF Hiob 40 Bible Online

Hiob 40 - De Bibel JHF bible

Hiob 40

¹Un Gott auntwuad Hiob un säd:

²Well de Dodla met Gott rechten? Dee doa Gott trajchtwiest, auntwuad doaropp!

³Un Hiob auntwuad Gott un säd:

⁴Kjikj, ekj sie too jerinj, waut saul ekj die doajäajen sajen? Ekj laj miene Haunt opp mien Mul.

⁵Eenmol ha ekj jerät, un ekj well nich mea auntwuaden, un 2 Mol, un ekj well daut nich mea doonen.

⁶Un Gott auntwuad Hiob ut däm Storm un säd:

⁷Ombinj doch diene Lenden aus een Maun; ekj well die froagen, un du belia mie!

⁸West du mien Rajcht tonicht moaken, mie vedaumen, doamet du jerajcht best?

⁹Ooda hast du eenen Oarm aus Gott, un kaust du met diene Stemm donnre aus hee?

¹⁰Peasch die doch met Huagheit un Majestät, un kjleed die en Prunk un Pracht!

¹¹Jeet diene oaja Streem ut, un kjikj aun aulem Stolt, un drekj am dol!

¹²Kjikj opp aulem Stolt, bieej daut, un riet de Gottloose opp äare Städ dol!

¹³Begrow an aula toop en däm Stoff, schlut äare Aunjesechta em Veborjnen en!

¹⁴Dan woa uk ekj die lowen, daut diene Rajchte die Help schauft.

¹⁵See doch daut Behemot (Nilpieet), däm ekj met die jemoakt ha; hee frat Grauss aus daut Rind.

¹⁶Kjikj doch, siene Krauft es en siene Lenden, un sien Stoakjsennen en siene Buckmusklen.

¹⁷Hee bicht sienen Zoagel aus een Zeeda, de Sänen en sienem Schinkje sent veflochten.

¹⁸Siene Knoakes sent Ruasch von Koppa, siene Been aus Iesastangen.

¹⁹Hee es de Ieeschta von de Wäaj Gottes [El]; dee am jemoakt, haft am sien Schwieet (Tänen) jeschaufen.

²⁰Dan de Boaj droagen am Fooda, un doa oppem Flekj spälen aule Tieren.

²¹Unja Lotusbescha lajcht hee sikj dol, em Vestäakj von Rua un Somp;

²²Lotusbescha bedakjen am met äarem Schauten, de Wäden vom Stroom.

²³Kjikj, de Stroom schwalt sea aun, hee rant nich enjstlich doavon; hee blift ruich, wan een Jordan jäajen sien Mul drift.

²⁴Jript maun am ver siene Uagen, derchboat maun siene Näs met eene Faul?

²⁵Trakjst du däm Leviatan met de Angel rut, un lajst du siene Tung en de Angelschnooa?

²⁶Kaunst du een Strank derch siene Näs trakjen, un sien Kjennback met eenem Rinkj derchstäakjen?

²⁷Woat hee die sea Bedden, ooda die saunfte Wieed jäwen?

²⁸Woat hee eenen Bunt met die moaken, daut du am toom eewjen Kjnajcht nemst?

²⁹Woascht du met am spälen aus met eenem Voagel, un am fa diene Mejales aunbinjen?

³⁰Woaren de Feschafrind met am vehaundlen, am unjre Hendla vedeelen?

³¹Kaunst du siene Hut met Spiessen fellen, un sien Kopp met Feschahoakes?

³²Laj diene Haunt aun am, - jedenkj aun däm Kaumf, doo daut nich wada!