Read De Bibel JHF Hiob 41 Bible Online

Hiob 41 - De Bibel JHF bible

Hiob 41

¹Kjikj, eenem jiedren siene Hopninj woat jeteischt: Woat maun nich aul bie sienem aunkjikjen doljedrekjt?

²Kjeena es soo frajch, daut hee am reizt. Un wäa es daut, dee sikj ver mienem Aunjesecht stalen doaf?

³Wäa haft mie verhäa waut jejäft? Un ekj woa am vejelten. Waut unjrem gaunzen Himmel es, es mient.

⁴Ekj well nich stell sennen von siene Jläda un von siene groote Krauft un von siene scheen jebude Jestault.

⁵Wäa dakjt am sien Bowakjleet op? En sienem dobbelden Jebiss, wäa drinjt doa nenn?

⁶Wäa deed de Dooasch von sienem Aunjesecht op? De Kjreiss von siene Tänen es een Schrakj.

⁷Siene stoakje Schilda sent eene Pracht, jiedret eene met faustem Säajel veschloten.

⁸Een jiedret paust sikj daut aundre aun, un kjeene Loft kjemt doatweschen;

⁹Stekj aun Stekj henjen see faust toop, see hoolen sikj jäajensiedich un tranen sikj nich.

¹⁰Sien Pruste strolt Licht ut, un siene Uagen sent aus Ziepasch de Morjeroote.

¹¹Ut sienem Rach gonen Fiastakja, Fiafunke spretzen rut.

¹²Ut siene Näs kjemt Ruak rut, aus ut eenem koakenden Topp un Grope.

¹³Sien Frodem stekjt Kole aun, un eene Flaum foat ut sienem Rach.

¹⁴En sienem Hauls wont Krauft, un de Angst hupst ver am häa.

¹⁵De Waums aun sienem Fleesch schlit aun, sent am faust aunjegote, un bewäajen sikj nich.

¹⁶Sien Hoat es hoat aus Steen, un hoat aus een unjaschta Molsteen.

¹⁷Fa sienem Opphäwen ferchten sikj Stoakje, vom Vezoagen woaren see utasich.

¹⁸Traft maun am met daut Schwieet, daut helt nich staund, noch Spies, noch Steetstang, noch spetza Feila.

¹⁹Daut Iesa acht hee fa Stroo, daut Koppa fa fulet Holt.

²⁰De Feila jajcht am nich enne Flucht, Schliesasteen vewaundlen sikj ver am en Stoppel.

²¹Aus Stoppel es am de Kaumfkjiel, un hee velacht daut Ruzhen vonne Steetstang.

²²Unja am sent schoape Schoawels; oppem Schlaum breet hee eenen Draschschläde ut.

²³Hee moakt de deepe Wotasch aus eenen Koaktopp, moakt daut Mäa aus eenen Saulwtopp.

²⁴Hinja am dacht de Stich, maun kunn de Streem fa grauet Hoa hoolen.

²⁵Oppe Ieed es kjeena soo aus hee, dee onen Angst jeschaufen es.

²⁶Aulet Huage kjikj hee aun; hee es Kjennich äwa aule wille Tieren.