Read De Bibel JHF Hiob 42 Bible Online

Hiob 42 - De Bibel JHF bible

Hiob 42

¹Un Hiob auntwuad Gott un säd:

²Ekj weet, daut du aules kaust, un kjeen Väahaben die vehindat woaren kaun.

³Wäa es daut, dee däm Rot trigjhelt onen Erkjantnis? Soo ha ekj däm beuadeelt, waut ekj nich vestund, Dinj, too wundaboa fa mie, dee ekj nich kjand.

⁴Hea doch, un ekj well räden; ekj well die froagen, un du belia mie!

⁵Met däm Ua ha ekj von die jehieet, oba nu haft mien Uag die jeseenen.

⁶Doarom veaufschu ekj mie un doo en Stoff un Ausch Busse.

⁷Un daut passieed, nodäm de Har dise Wieed too Hiob jerät haud, doa säd de Har too Elifas, däm Temanita: Mien Oaja es oppjeflaumt jäajen die un jäajen diene beid Frind; dan nich jeziement ha jie von mie jerät, aus mien Kjnajcht Hiob.

⁸Un nu nämt junt säwen Bolles un 7 Schopsbakj, un got no mienem Kjnajcht Hiob un Opfat een Brauntopfa fa junt. Un Hiob, mien Kjnajcht, mucht fa junt bedden; blooss am well ekj aunnämen, doamet ekj nich aun junt doo no june Noaheit; dan jie ha nich jeziement von mie jerät, aus mien Kjnajcht Hiob.

⁹Doa jinjen Elifas, de Temanita, un Bildad, de Schuchita, un Zofar, de Naamathita, un deeden, aus Gott to an jerät haud; un Gott naum Hiob aun.

¹⁰Un Gott dreid Hiob siene Jefangenschoft, aus hee fa siene Frind bäd; un Gott vemieed aules, waut Hiob jehaut haud, om daut Dobbelde.

¹¹Un daut kaumen no am aule siene Breeda un aule siene Sestren un aule siene frieejoasche Bekaunde; un see auten en sienem Hus met am, un see beweese am äa Deelnämen un treesten am äwa aul daut Onjlekj, daut Gott äwa am jebrocht haud; un see jeewen am een jiedra een jewesset Stekj (Golt ooda Selwa), un een jiedra eenen goldnen Rinkj.

¹²Un Gott säajend daut Enj Hiobs mea aus sien Aunfank; un hee kjrieech 14 000 Stekj Kjlienvee un 6000 Kameelen un 1000 Poa Rinda un 1000 Äselinen.

¹³Un daut wudden am säwen Säns un dree Dajchta jebuaren.

¹⁴Un hee jeef de ieeschte däm Nomen Jemima, un de tweede däm Nomen Kezia, un de dredde däm Nomen Keren-Happuch.

¹⁵Un soone scheene Frues aus Hiob siene Dajchta worden em gaunzen Launt nich jefungen. Un äa Voda jeef an een Oawgoot enne Medd äare Breeda.

¹⁶Un Hiob läwd nodäm 140 Joa; un hee sach siene Kjinja un siene Kjinjaschkjinja, 4 Jeschlajchta.

¹⁷Un Hiob storf, oolt un de Doag saut.