Read De Bibel JHF Hiob 5 Bible Online

Hiob 5 - De Bibel JHF bible

Hiob 5

¹Roop doch, auf eena doa es, dee die auntwuat! Un aun woonem de Heilje west du die wenjen?

²Dan däm Noa warjd de Jrim auf, un däm Eenfeltjen moakt de Iewa doot.

³Ekj, ekj sach däm Noa Wartlen schlonen, un sooboolt vewenscht ekj siene Wonunk.

⁴Siene Kjinja bliewen wiet auf vom Jlekj; un see worden em Dooa veklunjt, un kjeen Rada wia doa.

⁵Siene Arnt woat de Hungaja äten, un ut de Hachelhakjen naum hee an wajch; un no äarem Vemäajen schnaupe de Darschtje.

⁶Dan nich ut däm Stoff jeit Onheil väa, un Lieden waust nich ut däm Aka;

⁷sonda de Mensch es toom Lieden jebuaren, aus de Fiafunke sikj opphäwen biem flieejen.

⁸Oba ekj wudd Gott sieekjen un Gott miene Sach doalajen,

⁹dee Grootet un Onerforschtet deit, Wunda onen Zol;

¹⁰dee Räajen opp de gaunze Ieed jeft, un Wota schekjt opp daut gaunze Akalaunt;

¹¹om de Läaje no Hecht too saten, un Truarnde stieen opp toom Jlekj.

¹²Dee tonicht moakt de Aunschläaj de Lestje, un äare Henj fieren däm Plon nich ut;

¹³dee de Weise jript en äare Lest, un de Rot de Vedreide äwaschleit sikj.

¹⁴Aum Dach steeten see opp Diestanis, un aum Meddach tauste see aus de Nacht.

¹⁵Un hee rad vom Schwieet, von äarem Mul, un ut de Haunt de Stoakje däm Älenden.

¹⁶Soo woat däm Oamen Hopninj, un de Ojjerajchtichkjeit veschlitt äa Mul.

¹⁷Kjikj, jlekjseelich de Mensch, däm Gott stroft! Dan soo vesteet nich de Zichtjung vom Aulmajchtjen.

¹⁸Dan hee vewundet un vebinjt, hee veschleit, un siene Henj heelen.

¹⁹En 6 Bedrenkjnisen woat hee die raden, un en 7 woat die kjeen Iebel auntauste.

²⁰En Hungaschnoot erleest hee die vom Doot, un em Kjrich von de Jewault, vom Schwieet.

²¹Ver de Tung de Jeissel woascht du veschoont sennen, un du woascht die nich ferchten ver de Vewustunk, wan dee kjemt.

²²Äwa de Vewustunk un Hunga woascht du lachen, un fa de Tieren de Ieed woascht du die nich ferchten;

²³dan dien Bunt woat met de Steena oppem Flekj sennen, un de Tieren oppem Flekj woaren met die Fräd haben.

²⁴Un du woascht erfoaren, daut dien Zelt en Fräd es, un du diene Wonunk bekjikjst, soo woat die nuscht fälen;

²⁵un du woascht erfoaren, daut dien Somen groot sennen woat, un diene Auflaja aus daut Krut oppe Ieed.

²⁶Du woascht bejenj en daut Grauf komen, aus de Goawen to siene Tiet enjebrocht woaren.

²⁷Kjikj, daut ha wie erforscht, soo es daut; hia daut, un du, moakj die daut!