Read De Bibel JHF Psalm 101 Bible Online

Psalm 101 - De Bibel JHF bible

Psalm 101

¹Von David. Een Psalm. Von Jnod un Rajcht well ekj sinjen; die, Har, well ekj Psalmen sinjen.

²Ekj well weis haundlen opp vollkomnem Wajch; - wanea woascht du no mie komen? - em Ennalichen en mienem Hus well ekj met opprechtichkjeit en mienem Hoaten waundlen.

³Ekj well kjeen Stekj von Bieleal ver miene Uagen stalen; daut Doonen de Äwaträdungen hauss ekj: Daut saul mie nich aunhafte.

⁴Een vekjieedet Hoat saul wiet von mie bliewen; daut Beese well ekj nich kjanen.

⁵Wäa sienen Näakjsten heimlich schwoat-moakt, däm well ekj vetiljen; wäa stolte Uagen un huagmootjen Hoaten es, däm well ekj nich dulde.

⁶Miene Uagen woaren oppe True em Launt jerecht sennen, doamet see bie mie wonen; wäa opp vollkomnem Wajch waundelt, dee saul mie deenen.

⁷En mienem Ennalichen em Hus saul nich wonen, wäa Druach (Onnopprechtichkjeit) eeft; wäa Läajes räd, saul nich bestonen ver miene Uagen.

⁸Jieda Morjen well ekj vetiljen aule Gottloose em Launt, om ut de Staut vom Harn aule uttoroten, de Iebel doonen.