Read De Bibel JHF Psalm 106 Bible Online

Psalm 106 - De Bibel JHF bible

Psalm 106

¹Loft däm Harn! Dankt däm Harn! Dan hee es goot, dan siene Jnod es eewich.

²Wäa woat utspräakjen de Machtdoten Gottes, hieren loten aul sien Riem?

³Jlekjseelich dee daut Rajcht bewoaren, dee Jerajchtichkjeit eeft too aule Tiet!

⁴Jedenkj aun mie, Har, met de Gonst jäajen dien Volkj; sieekj mie met dienem Heil,

⁵daut ekj daut Jlekj diene Uterwälde see, mie frei aun dee Freid met dienem Volkj, mie riem met dienem Oawdeel.

⁶Wie ha jesindicht met onse Vodasch, ha orrajcht jedonen, ha jesazloos jehaundelt.

⁷Onse Vodasch en Ägipten beachten nich diene Wundadoten, dochten nich de Menj diene Jnod un wieren wadaspanstich aum Mäa, biem Schelpmäa.

⁸Oba hee rad an om sienem Nomen haulwen, om siene Macht weeten to loten.

⁹Un hee bedreiwd daut Schelpmäa, un daut wort drieech; un hee leet an derch de Deepe {Ps.33,7} gonen aus derch eene Wieste.

¹⁰Un hee rad an ut de Haunt de Haussa, un erleesd an ut de Haunt de Fiend.

¹¹Un de Wota bedakjten äare Bedrenja, nich eena von an bleef äwa.

¹²Doa jleewden see aun siene Wieed, see sungen sien Loff.

¹³Schwind vegauten see siene Doten, luaden nich opp sienen Rot;

¹⁴un see worden lastalich enne Wieste un vesochten Gott (El) enne Wiltnis.

¹⁵Doa jeef hee an äa Bejia, oba hee schekjt Schwakheit en äare Seel.

¹⁶Un see worden aufjenstich opp Moses em Loaga, opp Aaron, däm heiljen Gottes.

¹⁷De Ieed deed sikj op, un veschlukt Datan un bedakjt de Rotte Abiram;

¹⁸un een Fia brend unja äare Rotte, eene Flaum vebrend de Gottloose.

¹⁹See muaken een Kaulf aum Horeb un bekjten sikj ver eenem jegotnen Bilt;

²⁰un see vetuschte äare Harlichkjeit jäajen daut Bilt von eenem Boll, dee Grauss frat.

²¹See vegauten Gott, äarem Rada, dee Grootet jedonen haud en Ägipten,

²²wundaboare Dinj em Launt Ham, Furchtboaret aum Schelpmäa.

²³Doa säd hee, daut hee an vetiljen wull, wan nich Moses, sien Uterwälta, ver am en däm Rät jestonen haud, om sien Oaja vom Vedoawen auftodreien.

²⁴Un see veachten daut kostboare Launt, jleewden sienem Wuat nich;

²⁵un see grunsten en äare Zelten, hieeden nich opp de Stemm Gottes.

²⁶Doa schwua hee an, an doltoschlonen enne Wieste,

²⁷un äaren Somen doltoschlonen unja de Nazionen un an too vestreien enne Lenda.

²⁸Un see hongen sikj aun Baal-Peor un auten Schlachtopfa de Doodes (de doodje Jetta);

²⁹un see veoajade am derch äare Haundlungen, un eene Ploag bruak unja an ut.

³⁰Doa stunt Pinehas opp un eewd Jerecht, un de Ploag hieed opp.

³¹Un daut wort am to Jerajchtichkjeit jeräakjent von Jeschlajcht too Jeschlajcht bat enne Eewichkjeit.

³²Un see veoajade am aun däm Wota von Meriba, un daut jinkj Moses iebel äat haulwen;

³³dan see betriebte sienen Jeist, soo daut hee onbedocht räd met siene Leppen.

³⁴See vetiljde de Velkja nich, von dän de Har an jesajcht haud;

³⁵un see vemischte sikj met de Velkja un lieeden äare Woakjen;

³⁶un see deenden äare Jetzen, un see worden an too eene Schlenj.

³⁷Un see Opfade äare Säns un äare Dajchta de Demonen,

³⁸un see vegoten onschuldjet Bloot, daut Bloot von äare Säns un äare Dajchta, dee see däm Jetze Kanaan opfaden; un daut Launt wort derch Bloot entheilicht.

³⁹See veonreinijde sikj derch äare Woakjen un huaden derch äare Haundlungen.

⁴⁰Doa brend de Oaja Gottes jäajen sien Volkj, un hee veaufschud sien Oawgoot;

⁴¹un hee jeef an enne Haunt de Nazionen, un äare Haussa harschte äwa an;

⁴²un äare Fiend bedrenjden an, un see worden unja äare Haunt jeboagen.

⁴³Foaken rad hee an; oba see wieren wadaspanstich en äarem Rot, un see sunke han derch äare Ojjerajchtichkjeit.

⁴⁴Un hee sach äare Bedrenkjnisen aun, wan hee an Schrieen hieed;

⁴⁵un hee docht aun an en sienem Bunt, un daut deed am leet no de väle Jnod.

⁴⁶Un hee leet an Erboarmen finjen ver aule, dee an jefangen wajchjefieet hauden.

⁴⁷Rad ons, Har, ons Gott, un saumel ons ut de Velkja, daut wie dienen heiljen Nomen veharlichen, daut wie ons riemen en dienem Loff!

⁴⁸Jepreist (veharlicht) es de Har, de Gott Israels, von Eewichkjeit too Eewichkjeit! Un aulet Volkj saj: Amen! Loft däm Harn!