Read De Bibel JHF Psalm 108 Bible Online

Psalm 108 - De Bibel JHF bible

Psalm 108

¹Een Leet. Een Psalm. Von David.

²Faust es mien Hoat {Ps.57,8-12}, oo Gott! Ekj well sinjen un Psalmen sinjen; uk miene Seel {Ps.7,5}.

³Woak opp, Hoap un Zitta! Ekj well de Morjeroote oppwakjen.

⁴Ekj well die lowen unja de Velkja, Har, un die besinjen unja de Nazionen;

⁵dan groot es diene Jnod, bat äwa de Himmel, un bat aune Wolkjen diene Tru.

⁶Erhäw die äwa de Himmel, oo Gott! Un äwa de gaunze Ieed es diene Harlichkjeit!

⁷Doamet diene Jeleewde {Ps.60,7-14} frie jemoakt woaren, rad derch diene Rajchte un erhia ons!

⁸Gott haft en siene Heilichkjeit jerät: Ekj well froo sennen, well Siechem vedeelen, un de Läacht Sukkot utmäten.

⁹Mien es Gilead, mien Manasse, un Efraim es de Macht von mienem Haupt, Juda mien Harschastock.

¹⁰Moab es miene Wauschkomm; opp Edom well ekj miene Schoo schmieten, äwa de Filista well ekj jublen.

¹¹Wäa woat mie enne fauste Staut fieren, wäa woat mie bat no Edom leiden?

¹²Nich du, Gott, dee du ons veschmäten hast un nich utjinkjst, oo Gott, met onse Häasch?

¹³Schauf ons ne Halp ut de Bedrenkjnis! Dan de Help von Menschen es iedel.

¹⁴Met Gott woa wie majchtje Doten doonen; un hee, hee woat onse Bedrenja veklunjen.