Read De Bibel JHF Psalm 112 Bible Online

Psalm 112 - De Bibel JHF bible

Psalm 112

¹Loft Gott (Jah)! Jlekjseelich de Maun, dee däm Harn fercht, dee groote Lost haft aun siene Jebooten!

²Sien Somen woat majchtich sennen oppe Ieed; daut woat jesäajent woaren daut Jeschlajcht de Opprechtje.

³Vemäajen un Rikjtum woat en sienem Hus sennen, un siene Jerajchtichkjeit besteit eewich.

⁴Däm Opprechtjen jeit Licht opp enne Diestanis; hee es jnädich boarmhoatich un jerajcht.

⁵Wool däm Maun, dee jnädich es un liet! Hee woat siene Sachen em Jerecht derch fieren;

⁶dan en Eewichkjeit woat hee faust stonen. Toom eewjen Aundenkjen woat de Jerajchta sennen.

⁷Hee woat sikj nich ferchten fa beese Norecht; sien Hoat es faust, vetrut faust oppem Harn.

⁸Befaustijt (jestett) es sien Hoat; hee fercht sikj nich, bat hee siene Lost sitt aun siene Bedrenja.

⁹Hee streit ut, jeft däm Oamen; siene Jerajchtichkjeit besteit eewich; sien Huarn woat jehowen woaren en (met) Iea.

¹⁰De Gottloosa woat daut seenen un sikj oajren; met siene Tänen woat hee kjnirschen un vegonen, daut Jankren de Gottloose woat unjagonen.