Read De Bibel JHF Psalm 116 Bible Online

Psalm 116 - De Bibel JHF bible

Psalm 116

¹Ekj ha däm Harn leef; dan hee hieed miene Stemm, miene Bedd;

²dan hee haft sien Ua no mie jeneicht; un ekj well am aunroopen en aul miene Doag.

³Daut omjäwen mie Doodesuadeel, un de Bedrenkjnisen vom Scheol holen mie en; ekj funk Noot un Kumma.

⁴Un ekj roopt däm Nomen Gottes aun: Bitte, Har, rad miene Seel!

⁵Jnädich es de Har un jerajcht, un ons Gott es boarmhoatich.

⁶De Har bewoat de Eenfeltje; ekj wia älent, un hee haft mie jerat.

⁷Komm wada, miene Seel, too diene Ru! Dan de Har haft jefaulen aun die.

⁸Dan du hast miene Seel jerat vom Doot, miene Uagen von Tronen, miene Feet vom Faulen.

⁹Ekj woa ver däm Harn waundlen en däm Launt de Läwendje.

¹⁰Ekj jleew, doarom räd ekj. Ekj sie sea jebekjt jewast.

¹¹Ekj säd en miene Veläajenheit: Aule Menschen sent Läajna!

¹²Woo saul ekj däm Harn aul sien Gootsdoonen aun mie vejelten?

¹³Daut Kuffel de Radunk well ekj nämen un aunroopen däm Nomen Gottes.

¹⁴Ekj well däm Harn mien Vespräakjen betolen, jo, aum doabie tosennen ver sienem gaunzem Volkj.

¹⁵Kostboa es enne Uagen Gottes de Doot siene Fromme.

¹⁶Bitte, Har! Dan ekj sie dien Kjnajcht; ekj sie dien Kjnajcht, de Sän von diene Deenstmejal; du hast miene Faslen jeleest.

¹⁷Die well ekj Dankopfa opfren, un däm Nomen Gottes (Jah) aunroopen.

¹⁸Ekj well däm Harn mien Vespräakjen betolen, jo, aum doabie tosennen ver sienem gaunzem Volkj,

¹⁹enne Väahäw vom Hus Gottes, en diene Medd, Jerusalem. Loft Gott (Jah)!