Read De Bibel JHF Psalm 118 Bible Online

Psalm 118 - De Bibel JHF bible

Psalm 118

¹Dankt däm Harn! Dan hee es goot, dan siene Jnod es eewich.

²Doch daut sajcht Israel: Dan siene Jnod es eewich.

³Doch daut sajcht daut Hus Aaron: Dan siene Jnod es eewich.

⁴Doch daut sajen, dee däm Harn ferchten: Dan siene Jnod es eewich.

⁵Ut de Bedrenkjnis roopt ekj no Jah (Gott); Jah erhieed mie un sad mie en eenen wieden Rum.

⁶De Har es fa mie, ekj woa mie nich enjsten; waut kaun de Mensch mie doonen?

⁷De Har es fa mie unja miene Helpa, un ekj woa miene Lost seenen aun miene Haussa.

⁸Daut es bäta, oppem Harn too vetruen, aus sikj opp de Menschen too veloten.

⁹Daut es bäta, oppem Harn too vetruen, aus sikj opp Ferschten too veloten.

¹⁰Aule Nazionen hauden mie omrinjt; jewess, em Nomen Gottes vetiljd ekj an.

¹¹See ha mie omrinjt, jo, mie omrinjt; jewess, em Nomen Gottes vetilj ekj an.

¹²See ha mie omrinjt aus Biee; see sent utjelascht aus Stachelfia; jewess, em Nomen Gottes vetiljd ekj an.

¹³Du hast mie hoat jestat, om mie toom Faul to brinjen; oba de Har haft mie jeholpen.

¹⁴Miene Krauft un mien Jesank es Jah, un hee es mie too Radunk jeworden.

¹⁵De Jubel Stemm un de Radunk es enne Zelten de Jerajchte; de Rajchte Gottes deit Jewaultjet.

¹⁶De Rajchte Gottes es erhowen, de Rajchte Gottes deit Majchtjet.

¹⁷Ekj woa nich stoawen, sonda läwen un de Doten (Woakjen) Jahs vetalen.

¹⁸Jah haft mie hoat jestroft, oba däm Doot haft hee mie nich äwajäft.

¹⁹Moakt mie de Dooasch de Jerajchtichkjeit op: Ekj well derch dee nengonen, Jah well ekj danken.

²⁰Dit es daut Dooa Gottes: De Jerajchte woaren doaderch nengonen.

²¹Ekj well die danken, dan du hast mie erhieet un best mie too Radunk jeworden.

²²Dee Steen, däm de Bulied veschmäten ha, es too Akjsteen jeworden.

²³Von däm Harn es dit passieet; wundaboa es daut en onse Uagen.

²⁴Dit es de Dach däm de Harn jemoakt haft; lot ons jublen un lot ons en am froo sennen.

²⁵Ach, Har, rad doch! Ach, Har, jeff doch Jelinje!

²⁶Jesäajent es, dee doa kjemt em Nomen Gottes! Von däm Hus Gottes ut ha wie junt jesäajent.

²⁷Har es Gott (El), un hee haft ons Licht jejäft; binjt daut Fastopfa met Strenj bat aun (ooda brinjt daut bat) de Hieena vom Aultoa.

²⁸Du best mien Gott (El), un ekj well die danken; mien Gott, ekj well die erhäwen.

²⁹Dankt däm Harn! Dan hee es goot, dan siene Jnod es eewich.