Read De Bibel JHF Psalm 119 Bible Online

Psalm 119 - De Bibel JHF bible

Psalm 119

¹Jlekjseelich, dee oppem Wajch onschuldich sent, dee doa em Jesaz Gottes waundlen.

²Jlekjseelich, dee siene Zeijnise bewoaren, dee am von gaunzem Hoaten sieekjen.

³Dee uk kjeen Orrajcht doonen, en siene Wäaj waundlen!

⁴Du hast diene Väaschreften jeboden, om dee emma too beoobachten.

⁵Oo daut miene Wäaj jerajcht wieren, {Hi.11,13} om diene Sazungen too beoobachten!

⁶Dan woa ekj nich beschämt woaren, wan ekj acht ha opp aule diene Jebooten.

⁷Met opprechtjen Hoaten woa ekj die danken, wan ekj de Rajchte diene Jerajchtichkjeit jelieet ha.

⁸Ekj woa diene Sazungen beoobachten; velot mie nich gaunz un goa.

⁹Wuaderch woat een Jinjlinkj sienen Stich en Reinheit waundlen? Endäm hee sikj no dienem Wuat bewoat.

¹⁰Met mienem gaunzen Hoaten ha ekj die jesocht: Lot mie nich auferre von diene Jebooten!

¹¹En mienem Hoaten ha ekj dien Wuat bewoat, om daut ekj nich jäajen die sindj.

¹²Jeloft best du Har! Lia mie diene Sazungen!

¹³Met miene Leppen ha ekj aule diene Rajchte ut dienem Mul vetalt.

¹⁴Aun däm Wajch diene Zeijnise ha ekj mie jefreit aus äwa aulem Rikjtum.

¹⁵Äwa diene Väaschreften well ekj denkjen un achthabe opp diene Stiej.

¹⁶Aun diene Sazungen ha ekj miene Lost; dien Wuat woa ekj nich vejäten.

¹⁷Doo goodet aun dienem Kjnajcht, soo woa ekj läwen; un ekj well dien Wuat bewoaren.

¹⁸Moak miene Uagen op, doamet ekj en dienem Jesaz Wunda see.

¹⁹Ekj sie een Framda em Launt, vestäakj diene Jebooten nich fa mie.

²⁰Miene Seel es aule Tiet veräwe (veklunjt) vom Velangen no diene Rajchte.

²¹Du hast de Äwamootje jeschelt, de Vefluchte, dee auferre von diene Jebooten.

²²Nemm von mie Schmach un Veachtunk! Dan diene Zeijnise ha ekj bewoat.

²³Uk Ferschten setten un beräden sikj jäajen mie, dien Kjnajcht denkjt äwa diene Sazungen.

²⁴Diene Zeijnise sent uk miene Freid, miene Rotjäwa.

²⁵Miene Seel backt aum Stoff; beläw mie no dienem Wuat!

²⁶Miene Wäaj ha ekj vetalt, un du hast mie erhieet; lia mie diene Sazungen!

²⁷Lot mie däm Wajch met diene Väaschreften vestonen, un denkjen well ekj äwa diene Wunda.

²⁸Miene Seel verant fa Truarichkjeit en Tronen; recht mie opp no dienem Wuat!

²⁹Drei von mie auf däm Wajch de Läajes un bejnodij mie met dienem Jesaz!

³⁰Ekj ha däm Wajch de Woarheit erwält, ha ver mie jestalt diene Rajchte.

³¹Ekj hool aun diene Zeijnise; Har, lot mie nich beschämt woaren.

³²Oppem Wajch diene Jebooten woa ekj ranen, wan du mienem Hoaten Rum jemoakt haben woascht.

³³Lia mie, Har, däm Wajch no diene Sazungen, un ekj well am bat aum Enj bewoaren.

³⁴Jeff mie Ensecht, un ekj well dien Jesaz bewoaren un daut hoolen von gaunzem Hoaten.

³⁵Lot mie opp däm Stich diena Jebooten waundlen! Dan aun am ha ekj miene Lost.

³⁶Neij mien Hoat no diene Zeijnise un nich nom Jewenst!

³⁷Drei miene Uagen auf, daut see Iedlet nich seenen! Beläw mie en diene Wäaj!

³⁸Bestädij dienem Kjnajcht diene Vespräakjungen, dee diene Forcht leeft!

³⁹Drei miene Schmach auf, dee ekj fercht! Dan diene Rajchte sent goot.

⁴⁰Kjikj, ekj velang no diene Väaschreften; beläw mie en diene Jerajchtichkjeit!

⁴¹Un lot äwa mie komen diene Jnod, Har, diene Radunk no dienem Vespräakjen!

⁴²Soo woa ekj Auntwuat jäwen däm, dee mie Vespott; dan ekj vetru opp dien Wuat.

⁴³Un nemm mienem Mul nich gaunz wajch daut Wuat de Woarheit! Dan ekj hop opp diene Rajchte.

⁴⁴Un hoolen well ekj dien Jesaz bestendich, emma un eewich.

⁴⁵Un ekj woa waundlen em wiedem Rum; dan no diene Väaschreften ha ekj jetracht.

⁴⁶Un ver Kjennichs well ekj räden von diene Zeijnise un mie nich schämen.

⁴⁷Un ekj woa miene Freid haben aun diene Jebooten, dee ekj leef ha.

⁴⁸Un woa miene Henj opphäwen no diene Jebooten, dee ekj leef ha; un äwa diene Sazungen well ekj denkjen.

⁴⁹Jedenkj aun daut Wuat aun dienem Kjnajcht, opp däm du mie hast hopen loten!

⁵⁰Dit es mien Troost en mienem Älent, daut diene Vespräakjungen mie beläwt haben.

⁵¹De Frajche ha mie äwa aule Mot vespott; von dienem Jesaz sie ekj nich aufjegonen.

⁵²Ekj jedocht, Har, diene Rajchte von oole Tieden häa, un ekj treest mie.

⁵³Oajagluaje haft mie jepakt wäajen de Gottloose, dee dien Jesaz veloten.

⁵⁴Diene Sazungen sent mien Jesank jewast em Hus miene Piljareis.

⁵⁵De Nacht ha ekj aun dienen Nomen jedocht, Har, un ekj ha dien Jesaz jehoolen.

⁵⁶Daut es mie passieet, wiels ekj diene Väaschreften bewoat ha.

⁵⁷Mien Deel es de Har, ha ekj jesajcht, diene Wieed too bewoaren.

⁵⁸Von gaunzem Hoaten ha ekj die jebedd; sie mie jnädich no dienem Vespräakjen!

⁵⁹Ekj ha miene Wäaj äwadocht, un miene Feet jedreit no diene Zeijnise.

⁶⁰Ekj ha nich jesiemt un spood mie, diene Jebooten too hoolen.

⁶¹De Faslen de Gottloose ha mie omjäft, dien Jesaz ha ekj nich vejäten.

⁶²Om Meddanacht sto ekj opp, om die too danken wäajen de Rajchte diene Jerajchtichkjeit.

⁶³Ekj sie een Frint aun aule, dee die ferchten, un dee, dee diene Väaschreften befoljen.

⁶⁴Von diene Jnod, Har, es de Ieed erfelt; lia mie diene Sazungen!

⁶⁵Du hast Goodet jedonen aun dienem Kjnajcht, Har, no dienem Wuat.

⁶⁶Goode Ensecht un Erkjantnis lia mie; dan ekj ha diene Jebooten jejleeft.

⁶⁷Iea ekj jedeemooticht wort, errd ekj, oba nu bewoa ekj dien Wuat.

⁶⁸Du best goot un deist Goots; lia mie diene Sazungen.

⁶⁹Läajes ha de Stolte jäajen mie utjedocht; ekj bewoa diene Väaschreften von gaunzem Hoaten.

⁷⁰Äa Hoat es dikj jeworden aus Fat; ekj ha miene Lost aun dienem Jesaz.

⁷¹Daut es goot fa mie, daut ekj jedeemooticht wort, doamet ekj diene Sazungen lieed.

⁷²Bäta es mie daut Jesaz ut dienem Mul aus 1000-de von Golt un Selwa.

⁷³Diene Henj ha mie jemoakt un jeschauft; jeff mie Ensecht, un ekj well diene Jebooten lieren.

⁷⁴Dee die ferchten, woaren mie seenen un sikj freien; dan ekj ha opp dien Wuat jehopt.

⁷⁵Ekj weet, Har, daut diene Jerechten jerajcht sent un daut du mie jedeemooticht hast en Tru.

⁷⁶Lot doch diene Jnod mie toom Troost sennen, no dienem tosaje aun dienem Kjnajcht!

⁷⁷Lot diene Erboarmungen äwa mie komen, soo woa ekj läwen; dan dien Jesaz es miene Lost.

⁷⁸Lot de Stolte beschämt woaren; dan see ha mie onen Grunt Orrajcht jedonen: Ekj denkj äwa diene Väaschreften.

⁷⁹Lot sikj no mie dreien, dee die ferchten un dee diene Zeijnise kjanen!

⁸⁰Lot mien Hoat onschuldich sennen en diene Sazungen, doamet ekj nich beschämt woa!

⁸¹Miene Seel velangt no diene Radunk, ekj hop opp dien Wuat.

⁸²Miene Uagen schmachten no dienem Wuat, endäm ekj saj: Wanea woascht du mie treesten?

⁸³Dan aus een Schlauch em Ruak sie ekj jeworden; diene Sazungen ha ekj nich vejäten.

⁸⁴Wooväl woaren de Doag von dienem Kjnajcht sennen? Wanea woascht du Jerecht eewen aun miene Vefolja?

⁸⁵De Stolte ha mie Kule jegroft, dee, dee nich no dienem Jesaz sent.

⁸⁶Aule diene Jebooten sent Tru. See ha mie vefolcht onen Grunt: Halp mie!

⁸⁷Doa fäld weinich, soo hauden see mie oppe Ieed venicht; oba ekj ha diene Väaschreften nich veloten.

⁸⁸Beläw mie no diene Jnod, un ekj well daut Zeichnis ut dienem Mul bewoaren.

⁸⁹En Eewichkjeit, Har, steit dien Wuat faust en dee Himmel;

⁹⁰von Jeschlajcht too Jeschlajcht blift diene Tru; du hast de Ieed faustjestalt, un see steit.

⁹¹No diene Veordninj stonen see vondoag doa, dan aule Dinj deenen die.

⁹²Wia nich dien Jesaz miene Lost jewast, dan wia ekj omjekomen en mienem Älent.

⁹³Opp eewich woa ekj diene Väaschreften nich vejäten, dan derch an hast du mie beläwt.

⁹⁴Ekj sie diena, rad mie! Dan ekj ha no diene Väaschreften jetracht.

⁹⁵De Gottloose ha opp mie jeluat, om mie omtobrinjen; ekj acht opp diene Zeijnise.

⁹⁶Von aule Vollkomenheit ha ekj een Enj jeseenen; doch dien Jeboot es sea wiet.

⁹⁷Woo leew ekj dien Jesaz! Daut es mien Denkjen däm gaunzen Dach.

⁹⁸Weisa aus miene Fiend muaken mie diene Jebooten, dan emma sent see bie mie.

⁹⁹Ekj sie veständja aus aule miene Liera, dan diene Zeijnise sent mien Denkjen.

¹⁰⁰Ekj ha mea Ensecht aus de Oole, dan diene Väaschreften ha ekj bewoat.

¹⁰¹Von jiedrem beesen Stich ha ekj miene Feet trigjjehoolen, doamet ekj dien Wuat bewoa.

¹⁰²Ekj sie nich von diene Rajchte aufjegonen, dan du, du hast mie jelieet.

¹⁰³Woo seet sent mienem Bähn diene Wieed, mea aus Honnich mienem Mul!

¹⁰⁴Ut diene Väaschreften kjriee ekj Ensecht; doarom hauss ekj jiedrem Stich de Läajes.

¹⁰⁵Dien Wuat es Licht fa mienem Foot un Licht fa mienem Stich.

¹⁰⁶Ekj ha jeschwuaren un hool daut, too beoobachten de Rajchte von diene Jerajchtichkjeit.

¹⁰⁷Ekj sie äwa de Mot jedeemooticht; Har, beläw mie no dienem Wuat!

¹⁰⁸Lot die doch wooljefaulen, Har, de friewelje Opfa ut mienem Mul, un lia mie diene Rajchte!

¹⁰⁹Mien Läwen es emma en miene Haunt, oba dien Jesaz ha ekj nich vejäten.

¹¹⁰De Gottloose ha mie eene Schlenj jelajcht, oba von diene Väaschreften sie ekj nich aufjeert.

¹¹¹Diene Zeijnise ha ekj mie aus Oawgoot opp eewich jenomen, dan see sent de Freid fa mien Hoat.

¹¹²Ekj ha mien Hoat jeneicht, diene Sazungen to doonen eewich bat aum Enj.

¹¹³Dee Dobbelhoatje hauss ekj, un ekj leew dien Jesaz.

¹¹⁴Mien Vestäakj un mien Schilt best du; opp dien Wuat vetru ekj.

¹¹⁵Got von mie, jie Iebel doonende: Ekj well de Jebooten von mienem Gott bewoaren.

¹¹⁶Unjastett mie no dienem Wuat, soo woa ekj läwen; un lot mie nich beschämt woaren en miene Hopninj!

¹¹⁷Unjastett mie, soo woa ekj jerat woaren; un ekj well emma opp diene Sazungen kjikjen.

¹¹⁸Du hast aule veacht, dee von diene Sazungen auferre; dan Läajes es äa Droch.

¹¹⁹Aus Ausch hast du wajchjeriemt aule Gottloose de Ieed; doarom leew ekj diene Zeijnise.

¹²⁰Ver dienem Schrakj schaudat mien Fleesch, un ekj enjst mie fa dienem Jerecht.

¹²¹Ekj ha Rajcht un Jerajchtichkjeit jeeeft; äwalot mie nich miene Bedrenja.

¹²²Sie Birj fa dienem Kjnajcht toom Gooden; lot de Stolte mie nich bedrenjen!

¹²³Miene Uagen schmachten no dienem Heil un no dienem Wuat diene Jerajchtichkjeit.

¹²⁴Haundel met dienem Kjnajcht no diene Jnod, un lia mie diene Sazungen!

¹²⁵Ekj sie dien Kjnajcht, jeff mie Ensecht, soo woa ekj diene Zeijnise erkjanen.

¹²⁶Daut es Tiet fa däm Harn too haundlen: See ha dien Jesaz jebroaken.

¹²⁷Doarom leew ekj diene Jebooten mea aus Golt un reinet Golt;

¹²⁸Doarom hool ekj aule diene Väaschreften fa rajcht; jiedrem Läajeswajch hauss ekj.

¹²⁹Wundaboa sent diene Zeijnise, doarom bewoat dee miene Seel.

¹³⁰Daut opmoaken von dienem Wuat jeft Licht, un jeft Ensecht däm Eenfeltjen.

¹³¹Ekj ha mien Mul wiet opjemoakt un lekjmuld, dan ekj ha velangen no diene Jebooten.

¹³²Drei die no mie un sie mie jnädich, no dee äa Rajcht, dee dienen Nomen leewen!

¹³³Moak miene Schräd faust en dienem Wuat, un lot kjeen Orrajcht mie beharschen!

¹³⁴Erlees mie von de Bedrekjung de Menschen, un ekj well diene Väaschreften beoobachten.

¹³⁵Lot dien Aunjesecht schienen äwa dienen Kjnajcht, un lia mie diene Sazungen!

¹³⁶Wotastreem ranen ut miene Uagen rauf, wiels see dien Jesaz nich hoolen.

¹³⁷Du best Jerajcht, Har, un jerajcht sent diene Jerechten.

¹³⁸Du hast en Jerajchtichkjeit diene Zeijnise jeboden un en woarhauftje Tru.

¹³⁹Vetäajt haft mie mien Iewa, dan miene Bedrenja ha diene Wieed vejäten.

¹⁴⁰Sea rein es dien Wuat, un dien Kjnajcht haft daut leef.

¹⁴¹Jerinj un veacht sie ekj; diene Väaschreft ha ekj nich vejäten.

¹⁴²Diene Jerajchtichkjeit es eene eewje Jerajchtichkjeit, un dien Jesaz es Woarheit.

¹⁴³Angst un Bedrenkjnis ha mie errieekjt; diene Jebooten sent miene Lost.

¹⁴⁴Jerajchtichkjeit sent diene Zeijnise opp eewich; jeff mie Ensecht, soo woa ekj läwen.

¹⁴⁵Von gaunzem Hoaten ha ekj jeroopt; erhia mie, Har! Ekj well diene Sazungen beoobachten.

¹⁴⁶No die roopt ekj, rad mie! Un ekj well diene Zeijnise bewoaren.

¹⁴⁷Verrem Morjenschemma kaum ekj un ha jeschräajen; opp dien Wuat ha ekj mie veloten.

¹⁴⁸Miene Uagen sent de Nachtwoak veropp jekomen, om äwa dien Wuat too denkjen.

¹⁴⁹Hea miene Stemm no diene Jnod; Har, beläw mie no diene Rajchte!

¹⁵⁰Noda jekomen sent dee, dee Schaundboarem nojoagen; see sent wiet auf von dienem Jesaz.

¹⁵¹Du best dichtbie, Har; un aule diene Jebooten sent Woarheit.

¹⁵²Von oole Tieden häa ha ekj ut diene Zeijnise jewist, daut du an jejrindet hast opp eewich.

¹⁵³See aun mien Älent un moak mie frie! Dan dien Jesaz ha ekj nich vejäten.

¹⁵⁴Fiea mien Rajchtstriet un erlees mie! Beläw mie no diene Zeijnise!

¹⁵⁵De Radunk es wiet auf vonne Gottloose, dan no diene Sazungen trachten see nich.

¹⁵⁶Väl sent diene Erboarmungen, Har; beläw mie no diene Rajchte!

¹⁵⁷Väl sent miene Vefolja un miene Bedrenja; von diene Zeijnise sie ekj nich aufjegonen.

¹⁵⁸De Truloose ha ekj jeseenen, un daut äakjelt mie aun, wiels see dien Wuat nich beachten.

¹⁵⁹Kjikj, dan ekj ha diene Väaschreften leef; no diene Jnod, Har, beläw mie!

¹⁶⁰De Somm von dienem Wuat es Woarheit, un aule Veordnunge von diene Jerajchtichkjeit sent eewich.

¹⁶¹Ferschten ha mie vefolcht onen Uasoak; oba ver dienem Wuat haft sikj mien Hoat jefercht.

¹⁶²Ekj frei mie äwa dien Wuat aus eena, dee groote Raup finjt.

¹⁶³Läajes hauss un veaufschue ekj; ekj leew dien Jesaz.

¹⁶⁴Säwen Mol aum Dach low ekj die om de Rajchte diene Jerajchtichkjeits-haulwen.

¹⁶⁵Groote Fräd ha dee, dee dien Jesaz leewen, un kjeen faulen jeft daut fa an.

¹⁶⁶Ekj ha opp diene Radunk jeluat, Har; un diene Jebooten ha ekj jedonen.

¹⁶⁷Miene Seel haft diene Zeijnise bewoat, un ekj leew dee sea.

¹⁶⁸Diene Väaschreften un diene Zeijnise ha ekj bewoat, dan aule miene Wäaj sent ver die.

¹⁶⁹Lot mien Schrieen dicht ver die komen, Har; jeff mie Ensecht no dienem Wuat!

¹⁷⁰Lot miene Bedd ver die komen; rad mie no dienem Vespräakjen!

¹⁷¹Miene Leppen sellen dienen Loff äwaranen loten, wan du mie jelieet hast diene Sazungen.

¹⁷²Miene Tung saul lud von dienem Wuat räden, dan aule diene Jebooten sent Jerajchtichkjeit.

¹⁷³Lot diene Haunt mie too Help komen! Dan ekj ha diene Väaschreften erwält.

¹⁷⁴Ekj ha Velangen no dienem Heil, Har; un dien Jesaz es miene Lost.

¹⁷⁵Lot miene Seel läwen, un see woat die lowen; un diene Rajchte muchten mie halpen!

¹⁷⁶Ekj sie omhäa jeert aus een veloarnet Schop; sieekj dienen Kjnajcht! Dan ekj ha diene Jebooten nich vejäten.