Read De Bibel JHF Psalm 135 Bible Online

Psalm 135 - De Bibel JHF bible

Psalm 135

¹Loft däm Harn! Loft däm Nomen Gottes! Loft jie Kjnajchts Gottes,

²Dee jie em Hus Gottes stonen, enne Väahäw vom Hus von onsem Gott!

³Loft däm Harn! Dan goot es de Har; sinjt Psalmen sienem Nomen! Dan hee es leeftolich.

⁴Dan de Har haft sikj Jakob erwält, Israel too sienem Ieejentum.

⁵Dan ekj weet, daut de Har groot es, un ons Har es jrata aus aule Jetta.

⁶Aules, waut däm Harn wooljefellt, deit hee en dee Himmel un oppe Ieed, em Mäa un en aule Deepe;

⁷Dee Donst oppstieen lat vonne Enj de Ieed, dee Blitz moakt toom Räajen, dee däm Wint rutfieet ut siene Väarotskoma;

⁸Dee de Ieeschtjebuarne Ägiptens schluach vom Mensch bat toom Vee,

⁹Tieekjen un Wunda schekjt en diene Medd, Ägipten, jäajen däm Farao un jäajen aule siene Kjnajchts;

¹⁰Dee groote Velkja schluach un stoakje Kjennichs dootmuak:

¹¹Sihon, däm Kjennich äwa de Amorita, un Og, däm Kjennich von Baschan, un aule Kjennichrikjs Kanaans;

¹²Un äa Launt aus Oawdeel jeef, aus Oawgoot sienem Volkj Israel.

¹³Har, dien Nomen, blift eewich, Har, dien Jedajchnis {2Mo.3,15} von Jeschlajcht too Jeschlajcht.

¹⁴Dan de Har woat sien Volkj rechten, un hee woat sikj erboarmen äwa siene Kjnajchts {5Mo.32,36}.

¹⁵De Jetta de Velkja sent Selwa un Golt, een Woakj von Menschenhenj.

¹⁶Een Mul ha see un räden nich; Uagen ha see un seenen nich.

¹⁷Uaren ha see un hieren nich, uk es kjeen Odem en äarem Mul.

¹⁸An jlikj sent dee, dee an moaken, een jiedra, dee opp an vetrut.

¹⁹Hus Israel, loft däm Harn! Hus Aaron, loft däm Harn!

²⁰Hus Levi, loft däm Harn! Dee jie, Gott ferchten, loft däm Harn!

²¹Jeloft es de Harn von Zion ut, dee en Jerusalem wont! Loft däm Harn (Jah)!