Read De Bibel JHF Psalm 136 Bible Online

Psalm 136 - De Bibel JHF bible

Psalm 136

¹Loft däm Harn! Dan hee es goot, dan siene Jnod blift eewich.

²Dankt däm Gott de Jetta, dan siene Jnod blift eewich.

³Dankt däm Harn äwa aule Haren! Dan siene Jnod blift eewich;

⁴däm, dee groote Wunda deit, hee auleen, dan siene Jnod blift eewich;

⁵däm, dee de Himmel jemoakt haft met Ensecht, dan siene Jnod blift eewich.

⁶Däm, dee de Ieed äwa de Wota utjebreet haft, dan siene Jnod blift eewich;

⁷däm, dee groote Lichta jemoakt haft, dan siene Jnod blift eewich:

⁸De Sonn om däm Dach too beharschen, dan siene Jnod blift eewich,

⁹de Mon un de Stierns om de Nacht too beharschen, dan siene Jnod blift eewich:

¹⁰Däm, dee Ägipten schluach aun äare Ieeschtjeburt, dan siene Jnod blift eewich,

¹¹un Israel erutfieed ut äare Medd, dan siene Jnod blift eewich,

¹²met ne stoakje Haunt un met utjestrakjtem Oarm, dan siene Jnod blift eewich;

¹³däm, dee daut Schelpmäa en 2 Deele deeld, dan siene Jnod blift eewich;

¹⁴un Israel medden derchgonen leet, dan siene Jnod blift eewich,

¹⁵un däm Farao un sien Häa em Schelpmäa schmeet, dan siene Jnod blift eewich:

¹⁶Däm, dee sien Volkj derch de Wieste fieed, dan siene Jnod blift eewich;

¹⁷däm, dee groote Kjennichs schluach, dan siene Jnod blift eewich,

¹⁸un majchtje Kjennichs schluach, dan siene Jnod blift eewich:

¹⁹Sihon, de Kjennich äwa de Amorita, dan siene Jnod blift eewich,

²⁰un Og, däm Kjennich von Baschan, dan siene Jnod blift eewich,

²¹un äa Launt toom Oawdeel jeef, dan siene Jnod blift eewich,

²²toom Oawdeel jeef sienem Kjnajcht Israel, dan siene Jnod blift eewich:

²³Dee aun ons docht en onse Läachheit, dan siene Jnod blift eewich,

²⁴un ons rad von onse Bedrenja, dan siene Jnod blift eewich,

²⁵dee aulem Fleesch Äten jeft, dan siene Jnod blift eewich.

²⁶Dankt däm Gott (El) de Himmel, dan siene Jnod blift eewich!