Read De Bibel JHF Psalm 141 Bible Online

Psalm 141 - De Bibel JHF bible

Psalm 141

¹Een Psalm. Von David. Har! Too die ha ekj jeroopen, komm schwind no mie; nemm too Uaren miene Stemm, wan ekj to die roop!

²Lot aus Rieekjastoff (Weiruak, seeta Ruak) ver die bestonen mien Jebäd, daut opphäwen miene Henj aus Owentopfa!

³Sat, Har, een Wajchta äwa mien Mul; bewoa de Däa von miene Leppen!

⁴Neij mien Hoat nich to eene beese Sach, om gottloose Haundlungen too eewen met Mana, dee Fräfel doonen; un ekj mucht nich äten von äare Lakjabeskje!

⁵De Jerajchta schleit mie: Daut es Jnod, un hee stroft mie: Daut es Eelj fa daut Haupt; mien Haupt woat sikj nich wieren; dan noch es en äarem Onjläkjsfaul mien Jebäd fa an.

⁶Sent äare Rechta de Felse raufjeschupst worden, soo woaren see miene Wieed hieren, daut see leeftolich sent.

⁷Aus eena dee de Ieed schnit (plieecht) un spoolt, soo sent onse Knoakes hanjestreit aum Raunt vom Scheol.

⁸Doch opp die, Gott, mien Har, sent miene Uagen jerecht, opp die tru ekj; schedd miene Seel nich ut!

⁹Bewoa mie fa de Schlenj, dee see mie jelajcht ha, un ver de Faulstrenj von dän, dee Fräfel doonen!

¹⁰Lot de Gottloose en äare ieejne Nats faulen, wan ekj vebie go!